Pêi pro tơdroăng mơgêi dêi pôa Trần Lưu Quang, Ngế pro xiâm phŏ hnê ngăn Chin phuh a Rôh hôp lâp tơnêi têa ‘na hnoăng cheăng hbrâ ví, khía mơhot têa kân lân lu, tí tăng tŏng xo mâu ngế hliăng tiâ hơnăm 2024, kong pơlê Kon Tum dế pêi pro tơdroăng ki séa ngăn tâi tâng hnoăng cheăng hbrâ ví khía mơhot têa kân lân lu, tí tăng tŏng xo mâu ngế hliăng tâ dêi mâu cheăm tơring, tíu pêi cheăng a kong pơlê.

Tiah mê, Khu pơkuâ hbrâ ví khía mơhot têa kân lân lu tí tăng tŏng xo mâu ngế hliăng tiâ ƀă Khu pơkuâ tơdroăng kong pơlê Kon Tum pơkâ thế mâu tơring, cheăm, tíu pêi cheăng séa ngăn mâu hno long rơchoâ ki xâm, tíu ki hiăng tơ’nhiê mơni kô trâm xía vâ tro têa lân lu, tơnêi tơhnah tơhnâp, séa ngăn hnoăng cheăng mơjiâng bro túa pơlâ, hbrâ rơnáu liăn ngân, kế tơmeăm tiô 4 tơdrêng hbrâ rơnáu vâ hbrâ ví ƀă mâu tơdroăng ki kong mê khía mơhot têa kân lân lu tâng lơ ai.

Rơtế ƀă tơdroăng ki séa ngăn tâi tâng hnoăng cheăng hbrâ ví khía mơhot têa kân lân lu ƀă tí tăng tŏng xo mâu ngế hliăng tiâ, khu kăn pơkuâ mâu tơring, cheăm a kong pơlê Kon Tum xuân séa ngăn tâi tâng, xoăng liăn ngân mâu ngế cheăng ăm hnoăng cheăng hbrâ ví khía mơhot têa kân lân lu; hbrâ rơnáu mơjiâng túa pơkâ ăm mâu tơdroăng athế tơbleăng hnoăng cheăng tí tăng tŏng xo mâu ngế hliăng tiâ a kong pơlê.