Rơnó pơtê kố, rêm a roh kơxê, tíu klê têa a Tíu xiâm pêi cheăng droh rơtăm phô̆m xông kân kong pơlê Gia Lai pơtối lôu péa vâ hnê klê têa tê kơtê ăm droh rơtăm phô̆m xông kân ai tơdroăng rêh ối pá puât a pơlê kong kơdrâm Plei Ku, kong pơlê Gia Lai. Tung rêm roh hriâm, pakĭng hnê klê têa, mâu vâi o ối châ pơtâp klê tŏng xo mâu ngế klê têa, tơdroăng ki pơlât apoăng drêng ai klâk têa. O Võ Mạnh Cường, hok tro a pơlê kong kơdrâm Plei Ku tối:

“Rơpŏng hngêi pá puât xua mê ôh tá ai liăn vâ lăm hriâm, hâi kố a hngêi droh rơtăm phô̆m xông kân kong pơlê Gia Lai po kâu lăk ƀô̆ klê têa ăm mâu vâi ó pá puât, á hâk ‘nâng ƀă hiăng kĭ hlối. Thái hnê ăm á mâu tơdroăng ki klê têa môi tiah kêt, klê kơpon kŏng’’.

Ngoh Nguyễn Tiến Thịnh, hnê klê têa dêi Kâu lăk ƀô̆ Klê têa droh rơtăm phô̆m xông kân kong pơlê Gia Lai tối ăm ‘nâi, veăng a lâm hnê hriâm, mâu vâi o ối kŭn châ hriâm sap apoăng môi tiah chêng kŏng klêa tiah lâi, i hiâm tiah lâi. Pakĭng mâu tơdroăng klêa ki koi pêng têa, klê kêt, klê kơpon kŏng, klê hmâng to vâ, ngoh Nguyễn Tiến Thịnh ối hnê tơ’nôm hbrâ mơdât klâk têa ƀă troăng vâ ví klâk têa.

“Drêng kâu lăk ƀô̆ po mâu lâm hnê klê têa tê kơtê, á xuân troh hnê mâu vâi o troăng ki klê têa, hbrâ mơdât klâk têa, hbrâ ăm mâu vâi o vâ mâu vâi o drêng trâm a têa kroăng, têa plông, mâu vâi o chiâng klê ƀă lơ ƀă mâu ngế ki ê, kum ăm mâu vâi o tung tơdroăng hbrâ mơdât klâk têa”.

Ăm kuăn veăng lâm hriâm klê têa tê kơtê, pôa Trần Văn Thanh, ối a bêng Hoa Lư, pơlê kong kơdrâm Plei Ku pói vâ kuăn dêi tơná châ pơtâp châ chăn tíu ki lĕm tro, xuân môi tiah chiâng klê têa rơkê.

“Á hlo nôkố vâi hdrêng klâk têa hên ‘nâng xua mê vâ kuăn á lăm hriâm vâ gá chiâng klê têa, a hâi tĭng djâ kuăn troh a kố klê têa vâ gá chiâng klê rơkê tâ, la ngiâ tâng lơ trâm têa xuân chiâng tŏng dêi châ tơná’’.

A Kon Tum, măng tĭng hdrối xuân hiăng tơkŭm po Leh pơxiâm po rơnó pơtê hriâm, hâi Olympic vâi hdrêng ƀă mơhnhôk tâi tâng kuăn pơlê pơtâp klê têa, hbrâ mơdât klâk têa, veăng amê ai lối 1.300 ngế vâi hdrêng. A roh leh Khu tơkŭm po mơhnhôk ƀă krếo thế mâu khu râ, mâu kơvâ cheăng dêi kong pơlê Kon Tum rak, pêi pro rơdâ tơdroăng pơtâp ivá tối tơdjuôm ƀă môn klê têa tối krê.

Tơdroăng klâk têa đi đo ai ƀă vâi hdrêng a roh pơtê hriâm. Vâ tơniăn ăm vâ chê 168.000 ngế hok tro dêi kong pơlê tung roh pơtê hriâm hơnăm kố, kong pơlê Kon Tum kơbông krếo mâu khu râ, mâu kơvâ cheăng, hngêi trung, rơpŏng ƀă lâp pơlê pơla thăm pơkuâ vâ kơdroh trâm xía vâ, ki rơhêng vâ tối cho tơdroăng klâk têa ƀă mâu vâi o. Pôa Nguyễn Xuân Truyền, Kăn phŏ pơkuâ Khôi túa lĕm tro, Tơ’noăng ivá ƀă ôm hyô kong pơlê Kon Tum tối ăm ‘nâi, rơnó pơtê hriâm kố kô mơhnhôk tâi tâng mâu tíu ki klê têa vâ tơkŭm hnê klê têa, tơbleăng tối ‘na tơdroăng hbrâ mơdât klâk têa ăm vâi hdrêng.

“Pói vâ mâu đoân viên, droh rơtăm, sinh viên, mâu vâi o hok tro, mâu nôu pâ hok tro ƀă tâi tâng kuăn pơlê ôh tá xê to thăm pơtâp môi klê têa mê ối cho môi ngế pơtâng tối mơhnhôk pú hmâ, nhŏng o dêi tơná hriâm tơdroăng ki rơkê, hbrâ mơdât klâk têa kum kơdroh klâk têa tung lâp kong pơlê vâ tơmiât troh pơkâ pêi “Toăng hngêi tơniăn”, “Hngêi trung hriâm tơniăn” ƀă “Pơlê pơla tơniăn”.

A Lâm Đồng, Leh pơxiâm po rơnó pơtê hriâm, Hâi Olympic vâi hdrêng ƀă mơhnhôk tâi tâng kuăn pơlê pơtâp klê têa, hbrâ mơdât klâk têa vâi hdrêng hơnăm 2024 xuân hiăng châ tơkŭm po a pơlê kong kơdrâm Đà Lạt. Roh leh châ tơkŭm po vâ mơhnhôk vâi hdrêng lâp kong pơlê thăm veăng mâu tơdroăng tơ’noăng ivá, xah hêi tung rơnó pơtê hriâm, mơdêk ivá, tơdroăng rêh ối, ki rơhêng vâ tối cho tơdroăng pơtâp môn klê têa, hbrâ mơdât klâk têa ăm vâi hdrêng.

Việt Nam cho môi tung mâu kong têa ai hên vâi hdrêng klâk têa rêm hơnăm tung lâp plâi tơnêi. A Lâm Đồng, tung hơnăm 2023 pơla kố nah, hiăng ai 20 ngế klâk têa, mâu khế apoăng hơnăm 2024 kố tung lâp kong pơlê troh nôkố hiăng ai 10 ngế môi tiah mê. Vi ƀan kong pơlê Lâm Đồng pơkâ mâu khu cheăng, mâu kơvâ cheăng tung kong pơlê kal tơrŭm lĕm tro tung tơkŭm po mâu tơdroăng xah hêi rơnó pơtê hriâm ăm hok tro xuân môi tiah pêi pro tro tơdroăng mơhnhôk tơkŭm po ăm vâi hdrêng, hok tro mâu râ hriâm klê têa, tơkŭm po mâu tơ’noăng klê têa ăm hok tro, droh rơtăm phô̆m xông kân tung hơnăm xuân môi tiah tung rơnó pơtê hriâm vâ mơdêk kơxô̆ vâi hdrêng, hok tro chiâng klê têa tung kong pơlê; kơdroh iâ má môi mâu ngế klâk têa.