A rôh pêi cheăng, Ngế pơkuâ Khu xiâm cheăng Khoa hok ƀă kơmăi kơmok tơbleăng tơdroăng hiăng châ mơnhông tơƀrê kơvâ cheăng khoa hok ƀă kơmăi kơmok pêi pro tiô Pơkâ hneăng hôp  mâu kăn tung lâp tơnêi têa má 13 dêi Đảng. Khĕn kơdeăn mâu tơdroăng hiăng pêi tơƀrê dêi kơvâ cheăng Khoa hok ƀă kơmăi kơmok hiăng pêi châ tơƀrê tung lối 3 hơnăm pêi pro tiô Pơkâ hneăng Hôp kân má 13 dêi Đảng.

Pôa Nguyễn Xuân Thắng khĕn kơdeăn mâu tơdroăng ki mơ-eăm tơƀrê, ing tuăn mơ-eăm vâ hriĕn plĕng ki nếo dêi tâi tâng kơvâ cheăng khoa hok ƀă kơmăi kơmok. Pakĭng mê, pơkâ thế kơvâ cheăng ‘na khoa hok ƀă kơmăi kơmok tơkŭm tah mâu tơdroăng ki pá, tơvâ tơvân ‘na luât pơkâ pêi, luât tŏng gum ki tơdjâk troh ‘na liăn; tơmâng tăng ‘nâi plĕng mâu tơdroăng cheăng ƀă kơmăi kơmok ki nếo dêi lâp plâi tơnêi tơdjâk troh mâu troăng rơhlâ pơ’lêh ngiât - pơhlêh kơxô̆, pơhlêh on tơhrik.