Lăm troh ƀă hbru tơmeăm a Hngêi trung râ má môi Bắc Sơn, kong pơlê Vân Nam, kong têa Sinuâ, pôa Phan Văn Giang ƀă pôa Đổng Quân pói rơhêng vâ hngêi trung pơtối ai hên tơdroăng cheăng hnê tối vâ djâ troăng ăm mâu vâi o hok tro ki pói rơhêng vâ pleăng hnoăng cheăng ăm tơnêi têa ƀă chiâng mâu ngế ki teăng mâ dêi hơnăm ối nếo, pơtối tơdjêp tơrŭm cheăng, nhŏng o, achê, tơrŭm cheăng tiô khôi hmâ pơla péa tơnêi têa Việt Nam ƀă Sinuâ.

Xuân tung hâi ki mê, péa ngế kăn xiâm rơtế ƀă mâu kăn khu râ, kơvâ cheăng dêi Khu xiâm ngăn Mô đô̆i gak ngăn tíu tơkăng kong péa pâ tơnêi têa lăm pôu, pêi cheăng a thôn Bát Điều Bán. Kố cho thôn ki hơniâp ro rêh ối a kopơng tíu tơkăng kong ki pêi kâ - rêh ối tiô chal nếo, ối a peăng mâ hâi lo pá kơnhŏng tơring Hà Khẩu, kơpong Hồng Hà, kong pơlê Vân Nam, kong têa Sinuâ. Diâp mâu tơmeăm khoăng ki ai pơxúa kân khât ăm thôn Bát Điều Bán, peá Ngế kăn xiâm pói rơhêng vâ thôn ki kố pơtối rế hía rế châ mơnhông hên tâ nếo, ai tơ’nôm mâu tơdroăng cheăng ki tơrŭm pơla nhŏng o ƀă Việt Nam, vâ ing mê, thăm mơdêk tơdroăng ki rơkê plĕng, veăng kum thăm mơdêk tơdroăng pêi cheăng kâ-rêh ối pơlê pơla a kơpong tíu tơkăng kong.