Tung pơla hdrối kô hía nah, tiô pơkâ thế dêi Hô̆i đong rak ngăn ivá mâu kăn ƀô̆ Xiâm tơnêi têa, pôa Nguyễn Phú Trọng, Kăn xiâm pơkuâ hnê ngăn Đảng  hnối pơkuâ tơdroăng cheăng, hlối pơlât, rak ngăn ivá. Khu xiâm kal kí, Khu kăn pơkuâ hnê ngăn Đảng, mâu kăn xiâm ƀă Khu kăn hnê ngăn Đảng hiăng troh hnê mơhno mâu kơ koan pêi hnoăng cheăng mê tơkŭm krếo mâu yăo sư, ƀok thái pơkeăng, mâu ngế cheăng khăm pơlât, mâu ngế rơkê má môi kơvâ cheăng ƀă mâu tơdroăng tơ’lêi hlâu má môi vâ pơlât, rak ngăn Kăn xiâm pơkuâ hnê ngăn Đảng.

Troh nôkố, xua kal thế pơtối pơlât ƀă vâ rak tơniăn tơdroăng cheăng pơkuâ tơdjuôm dêi Khu kăn xiâm Đảng, Khu xiâm Kal kí, Khu kăn pơkuâ hnê ngăn Đảng, ngăn a Luât Pơkâ pêi cheăng dêi Khu kăn xiâm Đảng, Khu xiâm kal kí ƀă Khu kăn pơkuâ hnê ngăn Đảng hneăng 13, ki hdrối Khu xiâm Kal kí xoăng hnoăng cheăng pêi ăm pôa Tô Lâm, Ngế cheăng tung Khu xiâm Kal kí, Kăn xiâm hnê ngăn tơnêi têa pơkuâ tơdroăng cheăng dêi Khu kăn Xiâm Đảng, Khu xiâm Kal kí, Khu kăn hnê ngăn Đảng tiô hnoăng cheăng pêi, tơdroăng pơkâ châ Khu xiâm kal kí ai pơkâ.

Khu xiâm kal kí krếo tâi tâng Đảng, tâi tâng Kuăn pơlê ƀă tâi tâng mâu lêng loi khât a hnoăng pơkuâ dêi Đảng, Rak ngăn dêi Tơnêi têa, mơdêk tơrŭm, môi tuăn, rơtế ‘no ivá môi tuăn, pơtối rak vế pêi pro mâu tơdroăng hiăng châ tơƀrê, ki kal, tung tŭm tơdroăng ki Tơnêi têa pin hiăng pêi châ tơƀrê, mơ-eăm tơkâ luâ tŭm tơdroăng pá pơloăng mơnúa, pê klêi hnoăng cheăng mâu pơkâ Hneăng hôp Đảng tung lâp tơnêi têa rôh má 13 hiăng pơkâ; rak tơniăn kal kí, kring tơniăn, hnoăng pơkuâ tâi tâng tơnêi têa ƀă kring vế tơniăn pơlê pơla, mơnhông cheăng kâ-rêh ối, tơmâng khât troh tơdroăng rêh ối, tơmeăm khoăng ăm kuăn pơlê.