Sap apoăng hơnăm troh nôkố, lâp kong pơlê Gia Lai mơnhên ai 9 roh klâk têa pro 13 ngế vâi hdrêng hlâ, ki hên cho mâu kơpong pá puât, kơpong hdroâng kuăn ngo. Khu pơkuâ Đoân Droh rơtăm kong pơlê Gia Lai tối ăm ‘nâi, rêm hơnăm, Đoân Droh rơtăm xuân tơkŭm po mâu lâm hnê klê têa tê kơtê ăm vâi hdrêng.

Drêng ai tơdroăng vâi hdrêng a mâu kơpong pá puât klâk têa tâk hên, hơnăm kố tíu cheăng kô pêi pro troh mâu tíu kơpong hơhngế hơhngo, ki xiâm cho mâu kăn ƀô̆ đoân a mâu tíu pêi cheăng vâ mâu vâi o hok tro châ lăm hriâm klê têa. Pôa Phạm Trần Anh, Kăn phŏ pơkuâ Khu pơkuâ Cheăng pêi, Mô đô̆i rong râ ƀă Rêh ối pơlê pơla kong pơlê Gia Lai tối, vâ hbrâ ví klâk têa a vâi hdrêng kal tơdroăng tơdjuôm ivá dêi lâp pơlê pơla.

Ki rơhêng vâ tối cho rơpŏng kal tơmâng hên tâ mê nếo tung tơdroăng gâk kring ƀă rak ngăn vâi hdrêng, ki má lối cho a roh pơtê hriâm la ngiâ.