Klêi kơ’nâi 2 hơnăm pơtối kơdroh tơklâm rơxế, tung 5 khế apoăng hơnăm 2024, tơdroăng rak tơniăn troăng klông tung kong pơlê Dak Nông cho ôh tá tơniăn, ƀă 57 roh tơklâm rơxế pro 37 ngế hlâ, 38 ngế tro rong.

Tâng pơchông ƀă roh kố hơnăm 2023, tơklâm rơxế a Dak Nông tâk ‘na kơxô̆ roh, kơxô̆ mơngế hlâ ƀă ngế tro rong. Xiâm kối ki hên cho xua tơdroăng hlê plĕng rak luât dêi kuăn pơlê veăng kơto rơxế xuân tá hâi plĕng hên, tơdroăng tah lối pá puât ‘na pơkuâ troăng klông a kong pơlê tá hâi teăm tơdrêng.

‘Na troăng rak tơniăn troăng klông tung la ngiâ, Thươ̆ng tă Phạm Quốc Lập, Kăn pơkuâ ƀơrô kan sát rak tơniăn troăng klông – Kŏng an kong pơlê Dak Nông tối ăm ‘nâi, tíu cheăng hiăng hbrâ séa ngăn, pâ thế khu râ kăn pơkuâ ƀă mâu kơvâ cheăng veăng pêi cheăng, thăm pơtâng tối luât, thăm lăm séa ngăn pơxâu phâk mâu ngế xôi ‘na ôh tá rak tơniăn troăng klông, mơhnhôk tơdroăng tâi tâng kuăn pơlê veăng châ hlo tơbleăng tơdroăng mâu tơdroăng pro xôi ‘na ôh tá rak tơniăn troăng klông.