A mâu hngêi trung hriâm, ƀă hiâm tuăn “hơ-ui pâ, tŏng veăng dêi po”, mâu vâi o hok tro ƀă vâi nôu pâ dế kơhnâ khât tơdroăng ki veăng tơlo liăn ngân vâ tơveăng tŏng gum tơdroăng ki hía hĕng, châi khéa dêi kuăn pơlê ki rêh ối a kơpong tro khía mơhot kân, têa lân lu. Tơdroăng ki kơnâ tâ mê, mê cho tơdroăng cheăng ki ‘nâi tŏng gum ăm kuăn pơlê a kơpong tro têa lu, mâu vâi o hok tro châ hnê tối, pơtối mơdêk hiâm tuăn ki hơ-ui pâ, tŏng gum ăm kuăn pơlê ki trâm hên xahpá, trâm hên tơdroăng ki ôh tá tơniăn.

Pơxiâm sap ing hâi ki hriâm nếo, thái cô ƀă 930 ngế hok tro Hngêi trung râ má môi Quang Trung, pơlê kong kơdrâm Kon Tum, kong pơlê Kon Tum hiăng mơdoh châ 10 phut ngăn mâu um ki hngêi trung xo ing mâu hlá tơbeăng, clip ki xup mâu kong pơlê, pơlê kong kơdrâm pêa Kơnhŏng tro têa lu.

“Hâi kố, cô rơtế ƀă mâu vâi o ngăn mâu clip, um ki păng ‘nâng vêh vâ ngăn ‘nâi nhên ‘na kuăn pơlê ki ối kơpong pêa Kơnhŏng dế tro khía mơhot kân, têa lân luô ing mê, hlo tơdroăng ki hlâ rong kuăn pơlê, hía hĕng hngêi trăng, chiâk deăng, kơpôu ro ƀă hên tơmeăm khoăng ki ê cho tơdroăng ki tro long hía kân ‘nâng pá kâi tối a pêa Kơnhŏng”.

O Nguyễn Hữu Bảo Anh, hok tro lâm 4A tối tiah kố:

“Klêi kơ’nâi ngăn mâu clip ki mê hlo tâ hơ-ui ó ‘nâng mâu kuăn pơlê ki ối pêa Kơnhŏng vâi tro trâm xêh tơdroăng ki kơklêa, kăng hngíu ƀă ai hên ngế tro têa rơlêa, klúa mơhiu lôi. Á pói rơhêng vâ khía mohot kố rĕng tâi vâ mâu kong pơlê kơpong Pêa Kơnhŏng châ ai tơdroăng rêh kâ ối tơniăn mơtiah hdrối nah nếo”.

Drêng ai tơdroăng ki châi khéa, síu hơ’nêng dêi kuăn pơlê ki ối kơpong tro khía mơhot kân, têa lân luô, Khu pơkuâ ngăn hngêi trung râ má môi Quang Trung hiăng mơhnhôk hneăng tơlo liăn ngân tŏng gum, ƀă vâi o hok tro xuân môi tiah nôu pâ mâu vâi o kơhnâ khât tung tơdroăng ki tŏng gum kơ vâi krâ-nhŏng o a kơpong hliăng tiâ xahpá. Ing tơná vâi o hok tro mơjiâng pro tơdrong kơthô ing hlá mơ-eá ka-yê mơjiâng chiâng um plâi nuih ƀă châ tối “Pơtroh pêa Kơnhŏng” tung mê ai 200.000 liăn, o Đỗ Hồng Anh, lâm 3C ai tối tiah kố:

“Kơxô̆ liăn ki kố cho liăn dêi kơ koan Pâ á ăm á vâ xah hêi Têt Trung thu la á hlo hên ngế a pêa Kơnhŏng tro trâm xâu xía kân ó, khía mohot kân, têa lân luô xâu xía, hlo hơ-ui kơ vâi krâ-nhŏng o ó ‘nâng, mê á hiăng pro môi tơdrong kơthô kố, vâ pơtroh ăm mơngế ki hliăng tiâ. Á pói rơhêng vâ pêa Kơnhŏng kô châ vêh rêh ối lĕm tơniăn môi tiah ton ƀă ôh ta ai xếo khía mơhot kân, têa lân luô”.

Bu kơ’nâi môi hdroh mơhnhôk thế mê, Hngêi trung râ má môi Quang Trung, pơlê kong kơdrâm Kon Tum hiăng veăng tơlo vâ chê 25 rơtuh liăn; 114 kơthung xup kơxŏng khăng, têa ôu; 20 kơthung têa tôu, kơƀăn kĕo; 8 plâ ếo klê têa; dâng 400 plâ hmân ếo rơtế ƀă hên kế kâ, pơkeăng pơlât. Cô Đậu Thị Lan, Kăn pơkuâ hngêi trung râ má Quang Trung tối ăm ‘nâi, tâi tâng kơxô̆ liăn rơtế ƀă mâu kế kâ ki hok tro ƀă nôu pâ mâu vâi o tŏng gum hngêi trung hiăng thâ rĕng pơtroh ăm kuăn pơlê ki ối a kopơng tro têa lân luô. Xuân tiô cô Đậu Thị Lan tối, tơdroăng ki tơxâng hâk mơnê akố, cho ing tơdroăng pêi pro mê, mâu vâi o hok tro châ hnê hriâm, pơtối pơxô̆ hiâm tuăn hơ-ui gum, tŏng veăng, pơtroh tuăn hơ-ui pâ troh a vâi krâ-nhŏng o ki trâm tơdroăng pá puât, hliăng tiâ:

“Drêng ai khía mơhot kân, têa lân luô pro a pêa Kơnhŏng mê nôkố, kuăn pơlê dế trâm pá puât, hliăng tiâ, mê kal athế hnê tối mâu vâi o ‘na tuăn mơno ki hơ-ui gum, tơdroăng ki ‘nâi hơ-ui mơjo ƀă tơdroăng tŏng gum cho ki kal. Mâu vâi o châ hlo dêi tơná hiăng châ tŏng gum, châ veăng tơlo dêi môi iâ ki klâi mê ‘lo vâ pơtroh ăm kuăn pơlê pêa Kơnhŏng ƀă mâu tơmeăm ki hơ-ui gum ‘na tuăn mơno. Hngêi trung xuân phoih ƀriê xua hlo tơdroăng ki veăng hơ-ui gum dêi mâu nôu pâ vâi o hok tro ki hnê tối ‘na tuăn mơno vâi ‘nĕng ‘nâi hơ-ui pâ kơ mâu kuăn pơlê ki hliăng tiâ, trâm xâu xía kân mê”.

A pơlê kong kơdrâm Ƀuôn Ma Thột, kong pơlê Dak Lak hiăng po hên tơdroăng ki pơxúa khât tung rơnó Têt Trung thu hơnăm kố, môi tiah: mơđah um “On tơdrong ki séa troăng dêi tuăn mơno pói vâ” dêi 63 to kong pơlê, pơlê kong kơdrâm; mơjiâng pro, diâp “Tíu ki ngăn pơchuât hlá mơ-á, tơpui tơno ƀă po mâu hnoăng cheăng pêi dêi Đô̆i”, tơ’noăng tơbleăng kơƀăn trung thu, mơjiâng pro um tơdrong; râng djâ on tơdrong, xuăng prếo. O H’Kim Anh Niê, lâm 5C, hngêi trung râ má môi Lê Lợi, ối a tơring Ea Kar, kong pơlê Dak Lak ai tối tiah kố:

“Hâi kố, á châ pêi pro hên tơdroăng cheăng, á hlo ro ƀă hơniâp ro păng ‘nâng drêng châ veăng pêi pro tơdroăng cheăng ki kân tiah kố. Kơmăng kố, á ối châ xo hên kơƀăn kĕo, liăn ngân, mơnê tăm xăng hiăng tŏng gum mâu vâi pú ki ai tơdroăng rêh ố xahpá. Á tơhrâ kô hriâm i rơkê”.

Nâ Nguyễn Phạm Duy Trang, Kăn hnê ngăn Tíu xiâm Đoân Droh rơtăm, Kăn hnê ngăn Hô̆i đong Đô̆i tối ăm ‘nâi, rơtế ƀă Dak Lak, tung rơnó leh Trung thu hơnăm kố, Tíu xiâm Đoân kô diâp 15.000 hnoăng kơƀăn kĕo ƀă 330 hnoăng liăn hriâm ăm vâi o a hên kong pơlê, pơlê kong kân; mơjiâng pro ƀă pơcháu 4 tíu plông xah ôm hêi ăm vâi o hdrêng mâu kong pơlê Gia Lai, Dak Nông, Lạng Sơn ƀă Cao Bằng. Tŏng gum liăn ƀă kế kâ ăm vâi ‘nĕng a 15 to kong pơlê, pơlê kong kơdrâm ki tro tơdjâk ing khía mơhot kân roh má 3 (cho khía mơhot kân Yagi). Tâi tâng kơxô̆ liăn ki tơkŭm tŏng gum mê vâ chê 13 rơtal liăn.

“Pêi pro tiô tơdroăng krếo thế dêi Khu xiâm pơkuâ hnê ngăn Đoân Droh rơtăm tơnêi têa, rêm râ đoân, đô̆i, ki malối cho mâu vâi o hdrêng tung lâp tơnêi têa hiăng rơtế veăng tơdjuôm hiâm mơno rak vế, pêi pro vâ tŏng gum mâu vâi o hdrêng a mâu kong pơlê pêa Kơnhŏng. Mâu tơmeăm ki maluâ iâ êt xo la pơtroh tơdroăng ki hơniâp ro, pơtối gum ivá ki rơdêi ăm mâu vâi o ki ôh tá mơhúa mê ối gum ăm hiâm tuăn mâu vâi o pơtối ‘nâi ai tuăn hơ-ui mơjo, tŏng gum kơ mâu vâi krâ-nhŏng o ki dế trâm xahpá, hliăng tiâ mê”.

A kơmăng ki xah hêi ro mê, tung tơdroăng ki hơniâp ro, kơdrâm kơdrĕng, mâu vâi o, vâi muăn châ ngăn xuăng prếo, mâu tơdroăng hơdruê xuăng ‘na Têt Trung thu, châ tơpui tơno ƀă mâu vâi o, vâi muăn mâu Pơlê kong kân Hải Phòng, kong pơlê Lâm Đồng, Bình Dương, Tiền Giang bă Pơlê kong kân Hồ Chí Minh. Khu hnê mơhno hiăng diâp 1.700 kơxu kế tơmeăm, tung mê ai liăn hriâm, rơxế mái ƀă kơƀăn kĕo ăm mâu vâi o, vâi muăn ki ai tơdroăng rêh ối xahpá a kong pơlê Dak Lak.

Xông tơpui a hâi ki po leh mê, pôa Nguyễn Hoà Bình, Ngế pro xiâm phŏ hnê ngăn má môi hiăng kơdeăn khĕn, hâk mơnê mâu vâi o, vâi muăn maluâ trâm hên xahpá la kơhnâ khât tung hriâm tâp, ‘mâi rơnêu, uăn pât, kơdo mơ-eăm mơdêk tung tơdroăng rêh kâ ối.  Pói vâ mâu vâi o, vâi muăn pơtối mơdêk hnoăng cheăng ki rơkê tơtro dêi mâu vâi o, vâi muăn Việt Nam.

“Á pói rơhêng vâ rêm ngế vâi o, vâi muăn pơrá hơniâp ro hâi leh Trung thu ki tơniăn lĕm, rơtế ƀă mâu mâu o vâi muăn tơná, pơtối rak vế, pêi pro 5 tơdroăng Pôa Hồ hnê, hlế rơkê ƀă jâ pôa, nôu pâ, koh nhuô̆m thái cô, ai phêp ƀă vâi kân, tơrŭm, tŏng gum tơveăng hơ-ui ăm mâi vâi pú ki ai tơdroăng rêh ối xahpá, ki malối, mâu vâi pú ki dế trâm hliăng tiâ, xahpá, xâu xía kân ó xua khía mơhot kân, têa lân luô, tơkêa pro, vâ mơhnhôk vâi pú kơdo mơ-eăm troh a lâm, troh a hngêi trung hriâm; kơhnâ khât tung hriâm tâp ƀă rơnêu, pât dêi hiâm mơno vâ la ngiâ chiâng khu ngế ki mơjiâng tơnêi têa pin rế hía rế kro mơdrŏng lĕm, rơkê plĕng hên tâ”.