Ƀă tơdroăng pơkâ “Ôh tá mơhrâm lôi hok tro ki pơtê tơ’noăng xua tơdroăng rêh ối xơpá’’, kơvâ ngăn hnê hriâm hiăng chêh inâi mâu hok tro kơtiê xơpá ƀă mâu hok tro ki hngêi ối hơngế ing hngêi trung tơ’noăng, tơdroăng prôk lăm pá puât vâ ai tơdroăng tŏng kum.

Pôa Dương Hùng Phong, kăn phŏ ƀơrô ngăn hnê hriâm ƀă hnê mơjiâng tuăn ngôa rơkê tơring Ƀuôn Đôn, kong pơlê Dak Lak tối ăm ‘nâi:  ai 60 ngế hok tro kal tŏng kum mơhno tíu ối pơtê ƀă kal ‘na rơxế to lăm tơ’noăng. Khu hnê mơhno hiăng ai troăng rơhlâ tơrŭm ƀă khu pơkuâ ngăn Đoân Droh rơtăm tơring Ƀuôn Đôn chêh hdrối tơdroăng vâ veăng kum tung mâu hâi tơ’noăng. Mâu vâi o kô kâ ối a Hngêi trung hnê Kuăn ngo ai tíu kâ koi ối pơtê dêi tơring ƀă châ Vi ƀan tơring veăng kum liăn kâ.