Hngêi dêi 3 ngế nâ o Rah Lan H’Kưm ối a pơlê Chuét Ngok, cheăm Chư Á, pơlê kong kơdrâm Plei Ku, kong pơlê Gia Lai hên ngế tơpui tó rêm rôh mâu vâi nôu, vâi nâ cho kŏng an dêi Khu vâi kơdrâi Kŏng an kong pơlê Gia Lai troh lăm pôu ƀă xah tó ro ƀă mâu vâi kuăn. Nâ dêi 2 ngế o kŭn cho H’Kưm hơnăm kố 15 hơnăm ăm ‘nâi: Pâ ƀă nôu dêi 3 ngế nâ o hiăng hlâ kơtăn kố 6 hơnăm. Sap ing mê nah troh nôkố, Khu vâi kơdrâi Kŏng an kong pơlê xo veăng gum rak ngăn sap tơdroăng kâ ối, troh tơdroăng hriâm dêi 3 ngế nâ o.

Mâu vâi o đi đo châ mâu vâi nôu, vâi xăng Kŏng an viên, veăng gum tŭm tơdroăng: drêng ‘nâ ăm hmân ếo nếo, ai drêng ‘nâ ăm tơ’nôm kơxop hlá mơ-éa hriâm hlá mơ-éa chêh ƀă mâu loăng chêh tơmeăm xúa tung hriâm. H’Kưm tối:

“Rêm hâi, tâng ai tơdroăng klâi mê a krếo vâi kơnôm vâi nâ veăng gum. Mâu vâi nâ xuân mơhnhôk ngin o pôi tá pơtê hriâm, thế rŭm môi tuăn pâ dêi rơpó. Á hlo chiá kơdroh iâ xơpá ƀă châ hơniâp tung hiâm. A xuân mơ-eăm kơhnâ, nguăn vâ tơxâng ƀă tơdroăng ki tơmâng tŏng gum dêi mâu vâi nâ”.

Ôh tá xê to nâ o Rah Lan H’Kưm, a kong pơlê Gia Lai ối ai 31 ngế vâi hdrêng kuăn tê, ki hên cho mâu kuăn ngo châ rêm râ khu vâi kơdrâi Kŏng an kong pơlê Gia Lai xo tŏng kum. Ƀă kơxô̆ liăn. Ƀă kơxô̆ liăn mơhnhôk veăng tơlo ing mâu kăn ƀô̆, mâu lêng a tíu pêi cheăng ƀă liăn mơhnhôk kuăn pơlê, vâi kơdrâi veăng tơlo vâ ai kơxô̆ liăn veăng gum ăm rêm ngế muăn sap 4 -5 rơtuh liăn/hơnăm. Kơxô̆ liăn ki mê, kô gum vâi hdrêng kuăn tê ai tơ’nôm liăn hriâm ƀă vâ xúa drêng kal.

Thươ̆ng tă Nguyễn Thị Ngọc Thúy, Khu vâi kơdrâi Kŏng an kong pơlê  Gia Lai ăm ‘nâi, hên vâi muăn châ xo tŏng kum, rak ngăn mê châ mơnhên tối hriâm rơkê iâ tơngi klêng, thăm rế hmâ ƀă mâu vâi nôu ki veăng gum:

“Pakĭng tơdroăng tơmâng lăm êng ngăn vâ ‘nâi tơdroăng hriâm tâ, ivá dêi mâu vâi kuăn, tung pơla chôu toh a lăm pôu, djâ vâi muăn lăm xah hêi. A xuân djâ mâu vâi muăn lăm pôu a hngêi á vâ vâi hmâ ƀă kuăn á ki kơdrâi. Drêng lâi hriâm, tŭm tơdroăng mâu vâi muăn xuân êng, tối, krếo phôn ‘na hía nhắn tin ăm nôu ƀă púi vâ ngế nôu hnê tối. Mê cho tơdroăng ki hâk mơnê”.

Xuân ƀă tơdroăng tơmâng khât dêi rêm râ vâi kơdrâi, hơnăm 2022 cheăm Phú An, tơring Đăk Pơ hiăng ai lâm hnê mâu ki ôh tá ‘nâi chư hnê ăm vâi nâ o kuăn ngo Bơhnéa. Kơnôm ing mê, ing ôh tá ‘nâi chư, hên vâi nâ o hiăng chiâng chêh chiâng pơchuât, ‘nâi riân tơ’nôm tung tơdroăng tê rôe tơmeăm. Nâ Bùi Thị Minh Dương - Kăn hnê ngăn Khu vâi kơdrâi cheăm Phú An, tơring Đăk Pơ ăm ‘nâi, ing tơdroăng ki tơƀrê mê, túa lâm hnê mâu ngế ôh tá ‘nâi chư hiăng châ po rơdâ troh mâu cheăm ki ê. Hơnăm kố, khu ngăn vâi kơdrâi mâu cheăm Kŏng an kong pơlê Yang Bắc, Yang Hội xuân po tơ’nôm 2 lâm hnê chư, tơ’mot châ 160 ngế vâi nâ o veăng:  

“Nâ o ối hên ki kơdrâ, lăm hriâm ối kơxiâp, ôh tá khên pơchuât xâu lơ ôh tá tro ah cô lơ tó ‘nâ hía hên ngế nâ pơcháu ƀai ăm thế pro a hngêi la ôh tá chêh ƀai. Êng ti lâi lơ ôh pro ƀai mâu vâi nâ tối, râng loăng chêh vâ chêh kơtô pá tâ râng ‘nêk pông tơnêi po nhâ. Drêng chiâng chêh chư apoăng mê cho tơdroăng ki mơ-eăm vâ mâu vâi nâ o rế hâk vâ tâ. Troh nôkố, mâu vâi nâ hiăng chiâng pơchuât, chiâng chêh, chiâng hriâm ƀai tơdrêng ƀă dêi kuăn ƀă kô chiâng tăng ‘nâi plĕng ngăn tung măng internet vâ hriâm tơdroăng xúa tung pêi chiâk, tăng troăng kơdroh kơklêa xăm kơtiê”.

Jâ Rơ Chăm H’Hồng - Kăn hnê ngăn Khu vâi kơdrâi Kŏng an kong pơlê  Gia Lai ăm ‘nâi, pakĭng xo veăng gum mâu hdrêng kuăn tê ƀă hnê lâm ki hnê chư ăm bâ o kuăn ngo, rêm râ khu vâi kơdrâi tung kong pơlê ối ai liăn ‘măn kơdĭng vâ hbru hnoăng mơhá ăm hok tro kơtiê ki hriâm rơkê, ki ‘nâi mơ-eăm tơkâ luât xơpá, mơjiâng rơpŏng hngêi tơtô, veăng gum  liăn pro hngêi tuăn pâ, veăng gum liăn ăm vâi kơdrâi, hbru hdrê pêt, hdrê  păn. Ing mê, rơpâu ngế vâi hdrêng ƀă vâi kơdrâi châ kơjo kum:

“Tung la ngiâ, Khu vâi kơdrâi Kŏng an kong pơlê Gia Lai pơtối rak vế pêi pro tâ nếo mâu tơdroăng ki hiăng châ pêi ai pơxúa; hnê mơhno ăm rêm râ hriâm túa pêi cheăng a cheăm tơring ƀă lâp kong pơlê vâ xúa pêi tung mơnhông cheăng kâ rơpŏng hngêi. Pakĭng mê tơbleăng mâu túa pro kâu lăk ƀô̆ ƀă mâu túa tơ’mot hên ngế veăng dêi mâu ngế tung khu; khĕn kơdeăn mơhnhôk, khĕn teăm tơdrêng ƀă mâu ngế, tíu pêi cheăng tơƀrê vâ po rơdâ tung rêm râ khu’’.

Ƀă tơdroăng hơ-ui pâ ƀă mâu tơdroăng cheăng pêi ai pơxúa, Khu vâi kơdrâi Kŏng an kong pơlê Gia Lai dế gum vâi hdrêng kuăn tê ƀă vâi kơdrâi kuăn ngo kơdroh ki xơpá, veăng pêi tro mâu tơdroăng rêh ối pơlê pơla a kong pơlê.