Nâ Nay H’Tó ối a cheăm Ia Rtô, pơlê kong krâm Ayun Pa, kong pơlê Gia Lai ƀă inâi ‘’Drôu xiâm Jarai’’ hiăng châ mơnhên OCOP 3 hơlŏng – tơmeăm OCOP apoăng dêi cheăm. Nâ khên tơnôu pro mâu trang facebook, zalo ƀă fanpage ‘’Drôu xiâm Jarai Ayun Pa’’ vâ tơbleăng tơmeăm. Nâ Nay H’Tó tối ăm ‘nâi, tơdroăng livestream tơdroăng pế drôu pro mâu ngế ki rôe hlê plĕng ‘na tơmeăm, ing mê kơxô̆ drôu châ tê tâk tơdâng ing mâu khế:

“Drêng châ OCOP 3 hơlŏng dêi pơlê kong krâm mê cho tơ’lêi hlâu, hên tơmối tí tăng troh rôe. Drêng châ OCOP tơmối vâi tăng troh châ péa xôh, tơmối ing kong ê cho hên, ai tơmối Hà Nội, Pơlê kong kân Hồ Chí Minh. Á xuân hơp đong ƀă shipper, klêi kơxuô tơmeăm á krếo vâi klêi mê pơtroh tê’’.

Xuân môi tiah nâ Nay H’Tó, tung pơla kố nah, hên vâi kơdrâi ing pơlê kong kơdrâm troh kơpong thôn pơlê, kơpong hdroâng kuăn ngo tung kong pơlê Gia Lai hiăng chiu pá hriâm tâp, ‘nâi nhên mâu tơdroăng pơxúa ki kŏng ngê̆ tối tơdjuôm ƀă măng pơlê pơla tối krê vâ mơđah, tơbleăng tơmeăm troh ƀă kơdrâm mơngế ki rôe xúa. Nâ Hoàng Thị Hồng Hà ối a thôn Quý Đức, cheăm Ia Trok, veăng roh kơchơ điê̆n tưh a fanpage Khu tơrŭm vâi kơdrâi tơring Ia Pa ƀă tơmeăm têa tôu chôu tơxông prâp. Roh livestream mơhnhôk lối 3.300 roh ngế ngăn, tơdah tơ’nôm hrĭng đơn tơmeăm.

“Tơdroăng djâ têa tôu chôu tơxông ‘nhŭng lo a kơchơ mơdró mê châ hên kuăn pơlê ƀă tơmối loi tơngah ƀă rôe. Khu pơkuâ vâi kơdrâi ai troh lăm ngăn, trâm mâ tơpui tơno ƀă hnê mơhno ăm á pro hmâ ƀă facebook, zalo xuân môi tiah tik tok vâ tơbleăng inâi dêi tơná. Kơnôm vâi kơdrâi mê tơmeăm peăng á rế hía rế mơnhông tâ, prôk troh ƀă kuăn pơlê ƀă tơmối rĕng tâ, tơbleăng tơmeăm khoăng lĕm tơtro tâ’’.

Nôkố, Khu pơkuâ vâi kơdrâi tơring Ia Pa hiăng mơjiâng châ 5 troăng pêi xúa kŏng ngê̆ thông tin djâ ăm hên ki châ tơƀrê. Mê cho tơdroăng tơbleăng “Rêm khế 1 um méa ki má môi’’, “Rêm hâi 1 tơdroăng cheăng ki kơnâ’’, ‘’Rêm măng tĭng 1 tơmeăm ƀă tơdroăng pêi cheăng Kơchơ điê̆n tưh’’ a mâu măng pơlê pơla; troăng pêi “Khu pơkuâ Khu ôh tá mơ-éa”, tơdroăng “Tơmâng rơkong tơpui dêi khu, vâi kơdrâi’’. Mâu troăng pêi kố hiăng kum vâi kơdrâi tơring teăm ƀă tơdroăng pơhlêh xúa kŏng ngê̆, tơdrêng amê tŏng kum djâ hên tơmeăm troh mơngế rôe xúa. Jâ Huỳnh Thị Ngọc Lan – Kăn hnê ngăn Khu pơkuâ vâi kơdrâi tơring Ia Pa tối ăm ‘nâi tơ’nôm:

“Ngin hâk vâ ƀă troăng pêi “Rêm măng tĭng môi tơmeăm xúa ƀă kơchơ điê̆n tưh’’. Ahdrối ngin mơjiâng troăng pêi kố mê ing mâu tơdroăng pêi cheăng vâ hnê mơhno ăm mâu ngế livestream tơdrêng a măng pơlê pơla facebook, zalo... Ing kơchơ điê̆n tưh mê hên nâ o hiăng ai roh tơ’lêi tơbleăng tơmeăm dêi tơná a măng pơlê pơla tiô troăng rơdâ’’.

Tung lâp kong pơlê Gia Lai, khu pơkuâ vâi kơdrâi mâu râ hiăng pêi pro 65 troăng pêi “Tôh vâi kơdrâi xúa kŏng ngê̆ 4.0’’ ƀă “Vâi kơdrâi pơhlêh xúa kŏng ngê̆” ƀă rơpâu ngế pêi cheăng, mơjiâng bă rak rơpâu khu zalo, facebook, tiktok, ƀâng youtube... Tiô jâ Rơ Chăm H’Hồng – Kăn hnê ngăn Khu pơkuâ vâi kơdrâi kong pơlê Gia Lai, tơdroăng xúa kŏng ngê̆ thông tin hiăng kum nâ o chôa ‘lâng pơhlêh troăng pêi pêt mơjiâng tơmeăm tê mơdró, kum mơdêk châ tơƀrê tơdroăng pêi cheăng khu ƀă mơnhông cheăng kâ.

“Ngin pơtối mơnhông tơdroăng pơtâng tối a mâu khu hiăng mơjiâng ing hdrối nah dêi khu, website, cổng thông tin điê̆n tưh dêi khu, trang zalo, facebook... tơbleăng rĕng, teăm tơdrêng ƀă mâu khu ngế mâu troăng hơlâ dêi khu, mâu Pơkâ dêi Đảng, dêi mâu Hneăng hôp Khu pơkuâ troh ƀă mâu ngế tơrŭm pêi cheăng teăm tơdrêng má môi’’.