Pơtối tơdroăng rôh hôp má 32, hâi lơ 16/4, Vi ƀan pơkuâ Kuô̆k hô̆i  ăm hnê tối ‘na luât ‘mâi hơ’lêh, tơ’nôm mâu tơdroăng Luât Pơkeăng. Hlá mơ-éa chêh ‘mâi hơ’lêh, tơ’nôm mâu tơdroăng dêi Luât Pơkeăng hiăng châ tơ’nôm a mâu túa mơdró ki nếo vâ ai tiô pơkâ ki khât, tung mê, ai tê mơdró tiô troăng tê mơdró điê̆n tưh, tơniăn séa ngăn krâu mâu tơdroăng tơdjâk troh ‘na pơkeăng. Xuân tung hâi kố, Vi ƀan pơkuâ Kuô̆k hô̆i séa ngăn Hlá mơ-éa pơtroh  pâ thế ‘mâi hơ’lêh troăng rơhlâ ‘no liăn cheăng dêi tơdroăng pơkâ dêi tơnêi têa mơnhông cheăng kâ-rêh ối kơpong hdroâng kuăn ngo ƀă kong ngo pơla hơnăm 2021-2023.

Séa ngăn tối tơbleăng tơdroăng kuăn pơlê púi vâ dêi Kuô̆k hô̆i ƀă ăm hnê tối ‘na Hlá mơ-éa chêh pơtroh dêi Kăn xiâm hnê ngăn Tơnêi têa ‘na tơdroăng Kĭ tơhrâ ăm mung liăn pơla Việt Nam ƀă Hngêi rak liăn ‘Mâi mơnhông  ƀă mơnhông lâp plâi tơnêi ăm tơdroăng Tơkêa bro hngêi trăng,  troăng klông ahdrối ƀă mơnhông kơphô̆ hmâ ƀă hyôh kong prâi pơlê kong kơdrâm Vinh, kong pơlê Nghệ An.