A pơlê kong kơdrâm Ƀuôn Ma Thuột, nôkố ai lối 60 to kơ koan chêh hlá tơbeăng, ƀơrô teăng mâ, pêi cheăng, ƀă lối 300 ngế chêh hlá tơbeăng, mâu ngế kum pêi tơdroăng cheăng dé  pêi cheăng. Tơbleăng a rôh trâm mâ, pôa Vũ Văn Hưng, Kăn hnê ngăn Vi ƀan pơlê kong kơdrâm Ƀuôn Ma Thuột tơmâng xo, mâu kơ koan chêh hlá tơbeăng hiăng chêh nhên tro tơdroăng rêh ối, mơhnhôk, tối trâu rơdâ, chêh tối tro mâu tơdroăng ki hlo hiăng pêi tơƀrê tung mâu tơdroăng mơnhông cheăng kâ - rêh ối, tơniăn  cheăng lêng kring gak tơkăng kong.

Krê kơ koan teăng mâ Kơpong Tây Nguyên - Rơ’jíu  Việt Nam hiăng hiăng veăng ‘no hnoăng kân ƀă tơdroăng mơnhông cheăng kâ - rêh ối, tơniăn cheăng lêng dêi Ƀuôn Ma Thuột tối krê, kong pơlê Dak Lak tối tơdjuôm. Pakĭng mê, hnê tối, tơbleăng um méa tơmeăm khoăng, ki rơdêi, túa lĕm tro dêi pơlê kong kơdrâm Ƀuôn Ma Thuột troh hên kuăn pơlê, tơmối, pú hmâ tung tơnêi têa ƀă kong têa ê.