Hneăng hôp rôh má 10 dêi Đại hội đồng Công ước hơnăm 2003  ‘na kring vế tơmeăm khoăng túa lĕm tro hiăng ăm hlo veăng ai 183 to kong têa tung khu ƀă lối 100 kong têa veăng séa ngăn. Tơbleăng a  Rôh pơxiâm po dêi Hneăng hôp, pôa Hà Kim Ngọc, Ngế xiâm phŏ tơpui kâ tối Việt Nam ai 15 tơmeăm khoăng kơnía git hiăng châ chêh inâi, 550 tơmeăm khoăng kơnía git râ tơnêi têa, đi đo châ tơmâng kring vế tơmeăm khoăng  ki kơnía ôh tá la lâi pơtê mơjiâng ƀă pêi klêi luât pơkâ tŏng um, luât dêi tơnêi têa pơkâ, achê kố cho Tơdroăng Pơkâ dêi Tơnêi têa ‘na Mơnhông Túa lĕm tro troh hơnăm 2045, ƀă Luât tơmeăm khoăng túa lĕm tro ton nah ki ‘mâi hơ’lêh.

Mâu kong têa tung khu Công ước hơnăm 2003 khĕn kơdeăn mâu hnoăng hiăng hmâ pêi pro, hlê plĕng ƀă ki kơdôu mơ-eăm dêi Việt Nam tung tơdroăng kring vế ƀă pơtối rak túa lĕm tro kơnía git ton nah vâ veăng rak vế tơdrêng mâu tơmeăm khoăng ki hiăng vâ hía mê, rak mâu tơmeăm khoăng teăng mâ ăm kuăn mơngế ƀă tơbleăng mâu túa um  tơmeăm khoăng châ rak lĕm krâu tung lâp plâi tơnêi.