Kong pơlê Kon Tum dế châ mơnhên tối kong pơlê pá puât má môi Tây Nguyên ‘na hngêi trăng, troăng klông. Kong pơlê dế rơhêng vâ ai troăng kân tơdrăng vâ ăm tơdroăng cheăng kâ ki ai hlâu, ai pơxúa, malối cho kơpong ôm hyô tơnêi têa Măng Deang. Pôa Lê Ngọc Tuấn, Kăn hnê ngăn Vi ƀan kong pơlê Kon Tum ăm ‘nâi, drêng hên hĭn mâu ƀai chêh ‘na troăng kân tơdrăng a Tây Nguyên châ bro, tơbleăng tung mâu rơ’jíu, um tơvi, internet dêi VOV, kăn pơkuâ kong pơlê Kon Tum pơrá tơmâng, séa ngăn.

Hên hĭn mâu ƀai chêh hiăng tối ‘na tơdroăng ki tro khât ƀă ki ai khât, tối ‘na hiâm tơchĕng tơmiât, tơdroăng ki púi vâ dêi khu kăn pơkuâ ƀă kuăn pơlê kong pơlê. Krê ƀă kong pơlê Kon Tum, tơdroăng ki ro hiăng rĕng troh, drêng tung túa pơkâ kơpong Tây Nguyên pơla hơnăm 2021 – 2030 châ tơbleăng a mơ’nui khế 6 kố nah, troăng kân tơdrăng Quảng Ngãi – Kon Tum hiăng châ Ngế pro xiâm hnê ngăn Chin phuh ‘mot tung túa pơkâ. Tiô pôa Lê Ngọc Tuấn, troăng kân hiăng vâ châ bro ăm Kon Tum mơdêk tơdroăng mơnhông.

“Ngăn mâu ƀai chêh mơ’no dêi VOV mơ’no ‘na mâu troăng kân tơdrăng a kơpong Tây Nguyên á hlo tơtro khât ƀă kong pơlê. A tơdroăng kố, pơla kố nah Ngế pro xiâm hnê ngăn Chin phuh hiăng tối nhên, xuân tơmâng xo. Nôkố ngin kal rĕng châ bro klê troăng kân tơdrăng. Krê troăng kân Quảng Ngãi - Kon Tum mê 2 kong pơlê rơtế pâ thế Chin phuh vâ tăng khu ki ‘no liăn cheăng tiô túa ki PPP”.

Jâ Nguyễn Thị Thanh Lịch, Kăn phŏ hnê ngăn pơkuâ Vi ƀan hnê ngăn kong pơlê Gia Lai ai tối tiah kố, tơdroăng ki pá kân má môi dêi kong pơlê Gia Lai tối krê, kơpong Tây Nguyên tối tơdjuôm cho hngêi trăng, troăng klông tá hâi rak tơniăn. Mâu hơnăm hdrối nah, kong pơlê hiăng mơ-eăm khât tung tơdroăng krếo thế, tơ’mot mâu khu ki ‘no liăn, malối cho pro tiah lâi mơjiâng bro hngêi kơmăi uâ pơliê mâu kế tơmeăm pêi lo ing chiâk deăng, mơdêk ki kơnía pêt mơjiâng ƀă pêi lo liăn ăm kuăn pơlê. Laga, tơdroăng ki pá ‘na troăng prôk hiăng mơdât mâu khu ‘no liăn cheăng troh a Gia Lai.

Tiô jâ Nguyễn Thị Thanh Lịch, tơdroăng ki ‘no liăn cheăng bro mâu troăng prôk tơdrăng Plei Ku – Qui Nhơn ƀă troăng kân tơdrăng ing Kơnhŏng  troh peăng Hdroh peăng mâ hâi lâ ai pơxúa khât tung tơdroăng ki mơjiâng, bro mâu hngêi kơmăi uâ pơliê mâu kế tơmeăm, bro mâu kơpong tíu pêi cheăng ƀă kơmăi kơmok ƀă mâu kơpong pêi chiâk deăng xúa kơmăi kơmok rơxông nếo ƀă hên ki ê.

Ing mê, kô tŏng kum hên hĭn mâu tơdroăng ‘na pêi cheăng, cheăng pêi ăm kuăn pơlê a kong pơlê. Teăng ăm tơdroăng ki lăm troh a mâu pơlê kong kân, tíu xiâm cheăng ƀă kơmăi kơmok tí tăng cheăng pêi, pêi lo liăn ôh tá tơniăn, lối chât rơpâu ngế kuăn pơlê ai rôh vâ pêi cheăng tơniăn.

“Drêng pơchuât ƀai chêh dêi VOV mê ngin ƀriê tung hiâm mơno khât. Ngin tối tung mâu grup, tung khu dêi Khu pơkuâ ngăn, khu dêi mâu khu râ, kơvâ cheăng, ƀă khu dêi mâu kong pơlê. Ngin hlo tiah kố rơtế nâl tơpui tơdjuôm ing tơdroăng ki tối tơbleăng ing rơ’jíu, internet mê veăng gum ‘mâi mơnhông séa ngăn, ai mâu tơdroăng séa ngăn tơtro, ai tá tơdroăng tơtro tá tơdroăng drêng mâu rôh hôp dêi Tơnêi têa mê veăng gum tơpui tơ’lêi tâ vâ Tơnêi têa ‘no liăn, tŏng kum mâu tơdroăng pá puât ăm Tây Nguyên ‘na hngêi trăng, troăng klông”.

Ngoh Lý Văn Thanh, a cheăm Đắk Sôr, tơring Krông Nô, kong pơlê Dak Nông ăm ‘nâi, tơdroăng ki ‘no liăn bro hngêi trăng, troăng klông nôkố xuân ối iâ, mâu kế tơmeăm pêi lo ing chiâk deăng, plâi kâ pêi lo pá vâ tê ƀă tơdjâk troh yă tê. Ngoh Thanh tối tiah kố tơnêi têa kal tơmâng ngăn tâ nếo troh ‘no liăn cheăng bro hngêi trăng, troăng klông, malối cho mâu troăng kân tơdrăng vâ Tây Nguyên mơnhông.

“Lâp tơnêi têa dế hlo troăng prôk kân tơdrăng châ pơkâ pêi pro hên la mâu kong pơlê a Tây Nguyên xuân dế ối tơkôm. Kuăn pơlê Tây Nguyên ai klâi, ai tơnêi tơníu hơpok lĕm, ai kơphế, sầu riêng, mâu loăng pêt tê yă kơnâ; la kuăn pơlê Tây Nguyên pin ối kal klâi, ối kal troăng prôk, ối kal mâu troăng ki prôk lăm tơ’lêi hlâu vâ tơrŭm tê mơdró. Pơchuât hên hĭn mâu ƀai chêh dêi VOV ‘na troăng kân a Tây Nguyên á hlo tối tro khât, gá tro khât. Đảng, Tơnêi têa kal tơmâng ngăn tâ nếo troh kơpong pá puât môi tiah Tây Nguyên mê nếo rĕng mơnhông ƀă chiâng krá tơniăn”.