Lơ̆m kơ dơ chŭn kơtao glơch glach tơ̆ apŭng Kông Chro, dêh char Gia Lai, pơyan ‘nâu đei lơ gre tơdruh băl chơ kơtao vih tơ̆ hnam kơmăy. Tơdrong đei kơtao hiong kơjă đĭ ưh pă đei, tơplih lơ̆m noh, kơjă kơtao sơđơ̆ng păng tĕch đei vei sơđơ̆ng ‘lơ̆ng. Ƀok Nguyễn Hữu Phúc, mĭnh ‘nu kon pơlei tơ̆ plei Brò, xăh An Trung, apŭng Kông Chro dôm sơnăm ‘nâu ling lang pơtăm dang 30hek tar kơtao. Ƀok roi tơbăt, ‘long kơtao hơnhăk ăn iŏk yua lơ hloh tơpă pơting hăm dôm ‘long pơtăm rim sơnăm nai lơ̆m tơring:

“Tơplih jing pơtăm kơtao ‘noh hơnhăk ăn iŏk yua mŭk drăm lơ hloh ‘long nai. 1 hek tar kơtao rơkăh đei dang 30 truh 40 triệu hlak jên 1 hek tar. Jang tơdrong jang kơdơ chŭn să ‘noh gre kơmăy kăt ‘noh iŏk yua lơ ƀiơ̆, jên jang tơ jur ƀiơ̆”.

Lei lăi nhen ƀok Phúc, lơ ŭnh hnam kon pơlei jang chŭn mir nai tơ̆ tơring Hơlĕch Gia Lai kŭm đei sa yua đơ̆ng kơtao. Ŭnh hnam ƀok Lê Việt Công, oei tơ̆ xăh Kông Lơng Khơng, apŭng Kbang, pơtăm 10 hek tar kơtao, iŏk yua vă jê̆ 800 tấn lơ̆m pơyan ‘nâu. Sơnăm ‘nâu, ƀok hlôi iŏk đei 70% hơgăt teh. Ƀok Công lăng ‘lơ̆ng kơtao yua kơ sơđơ̆ng anih tĕch, đei dôm hnam kơmăy răt đĭ kơna sơđơ̆ng pơtăm să.

“Dang ei tơ̆ âu ‘ngoăih kơ ‘long kơtao ‘noh ưh pă đei ‘long kiơ tơm, kơchăng nhen kơtao, kiơ̆ kơjă âu ‘noh kon pơlei pơ̆n pơtăm kơtao, đei hnam kơmăy răt pơđĭ tơmam păng ba jang gơnang đơ̆ng kơmăy kơmŏk hrơ̆ch tơ̆ kơdơ chŭn kơna kon pơlei jang đei kơsô̆ lơ”.

Tơgop lơ̆m jơnei đơ̆ng anih jang kơtao tơ̆ Hơlĕch Gia Lai, kŭm hăm tơdrong hơdrin đơ̆ng kon pơlei jang chŭn mir ‘noh jĭ tơdrong tơmơ̆t jên jang ‘lơ̆ng đơ̆ng anih mơdro sa păng pơm tơdrong hiôk đơ̆ng khŭl kơdră tơring. Dôm tơdrong jang tơplih iŏk yua teh choh jang sa, pơjing kơdơ chŭn să păng iŏk yua kơmăy kơmŏk hlôi đei tơlĕch jang pran kơtang. Ƀok Lê Thanh Sơn, Phŏ Kơdră Anih vei lăng kon pơlei apŭng Kbang, roi tơbăt pơđĭ lơ̆m apŭng đei hloh 10.400 hek tar kơtao, lơ̆m noh hloh 3.000 hek tar hlôi đei jang hăm kơmăy kơmŏk ngăl, tơgŭm ‘mơ ‘met jên jang sa păng hơtŏk iŏk yua bơ̆jang.

“Apŭng kŭm hlôi tơlĕch jang lơ tơdrong jang păng vang jang hơdai hăm Hnam kơmăy pơm sĭk An Khê pơgơ̆r krao hơvơn, roi tơbăt kŭm hăm kon pơlei jang chŭn mir pơgơ̆r iŏk yua dôm khoa hŏk ki thuơ̆t, kơmăy kơmŏk lơ̆m pơm tơlĕch đơ̆ng choh teh, pơtăm păng vei lăng truh koh iŏk kơtao, yua thoi noh mă ‘mơ ‘met đei tôch kơ lơ jên jang vă hơtŏk ‘lơ̆ng tơdrong hơrih sa, hơtŏk iŏk yua ăn kon pơlei tơgop sut pơngot tơjur dơnuh”.

Sơnăm jang kơtao 2024-2025, hơgăt teh kơtao lơ̆m tơring Hơlĕch Gia Lai iŏk đei hloh 31.500 hek tar, akŏp tơmam tŏk truh 2,4 triệu tấn kơtao. Ƀok Nguyễn Hoàng Phước, Phŏ Kơdră vei lăng Hnam kơmăy pơm sĭk An Khê, thị xã An Khê roi tơbăt, tơdrong tơgŭm đơ̆ng Khŭl kơdră teh đak hlôi tơgŭm ăn anih jang kơtao sĭk hơtŏk tơiung kơjăp lơ̆m lơ sơnăm kơ âu.

"Đơ̆ng sơnăm 2020 truh dang ei, Khŭl kơdră teh đak hlôi tơlĕch ăn dôm tơdrong tơchơ̆t găh tơ jră tĕch phă kơjă, tĕch ôn sĭk hlôi tơgŭm ăn kơjă sĭk lơ̆m teh đak tŏk tơ̆ kơsô̆ lơ đơ̆ng sơnăm 2020 truh dang ei. Kơjă kơtao răt iŏk jô̆ păh lăp tơ̆ kơsô̆ 1,1 triệu hlak jên 1 tấn lơ̆m 10 kĭ sĭk tơ̆ chŭn. ‘Nâu jĭ tơdrong hiôk tih hlôi tơgŭm kon pơlei jang chŭn mir jang đei iŏk yua păng đơ̆ng ‘noh tơmơ̆t yua trong jang ki thuơ̆t tơ̆ 4 apŭng Hơlĕch Gia Lai đei 1 tơdrong lui tôch kơ tih lơ̆m hơtŏk tơiung kơtao, tơplih trong jang ‘long pơtăm ưh kơ đei iŏk yua jing pơtăm kơtao”.

Dôm kơdơ kơtao glơch glach tŏk bŏk hơnơ̆ng pơm đei tơdrong tơplih tơ̆ dôm tơring găh Hơlĕch dêh char Gia Lai. Hăm tơdrong vang yak hơdai đơ̆ng anih mơdro sa, khŭl kơdră păng kon pơlei, tơdrong pơjing kơdơ chŭn să tơ̆ âu tŏk bŏk hơnơ̆ng đei tŭn pran vă pơm jing 1 tơring kơtao jang kơmăy kơmŏk tôm. Đơ̆ng noh, mŭk drăm tơpôl rim tơring roi ‘năr roi đei hơtŏk tơiung kơjăp.