Tơ̆ dêh char Kon Tum măt bơngai jĭ grŏnh tŏk kơtang, hơnih jang pơgang dêh char tŏk bŏk atok kơtang bơ̆ jang tang găn jĭ grŏnh, lơ̆m ou tơlĕch trong jang iung jang keh kong ƀet bơ̆ng tôm pơgang vaccine ăn 95% ‘nu bơngai, lăp lơ̆m khei 3 giĕng ou, kiơ̆ nơ̆r pơrô̆ jang đơ̆ng Khul kơdră Teh đak păng Hơnih tơm vei lăng jang pơgang. Vă jê̆ 3 khei ou ki, hơnih jang pơgang dêh char Kon Tum hlôi ƀôh đei 728 ‘nu bơngai tơpoh jĭ grŏnh păng jou jĭ grŏnh tŏk 722 ‘nu bơngai pơtêng hăm sơnăm sơ̆. Jang kiơ̆ nơ̆r pơrô̆ jang đơ̆ng Khul kơdră teh đak păng Hơnih tơm jang pơgang, atŭm hăm atŏk kơtang bơ̆ jang pơtho tơbăt truh tơ̆ rim pơlei pơla tơring hơtăih yăih, tơring kon kông, Hơnih jang pơgang dêh char Kon Tum tŏk bŏk iung jang ƀet bơ̆ng vaccine tang găn jĭ grŏnh. Ƀak si chuyên khoa II Đỗ Ngọc Hoà, Kơ iĕng Kơdră chĕp pơgơ̆r Hơnih jang pơgang dêh char Kon Tum tơbăt, hơnih jang pơgang dêh char tŏk bŏk atŏk kơtang iung jang ƀet vaccine, hơdrin iung jang keh đang 95% măt bơngai lơ̆m tôm sơnăm ƀet pơgang lơ̆m kơtă khei 3 ou hloi.