Tơ̆ Hop akŏm Ƀan châ̆p hanh Đảng ƀô̆ dêh char Đăk Lăk mă 29, Ƀĭ thư Tĭnh uy Đăk Lăk pơgơ̆r rim jăl jang, anih jang đảng, anih jang kơ teh đak pơkăp bot 'lơ̆ng jơnŭm pơgơ̆r jang 'măng mă âu athei jang mă tơnăp kiơ̆ pơkăp tơdrong jang, vei sơđơ̆ng rơih trŏ bơngai, trŏ tơdrong hơgei, tơnăp hăm sơnong jang; keh đang tơdrong pơkăp bot 'lơ̆ng jơnŭm pơgơ̆r jang chĭnh trĭ kơ dêh char hơdrol kơ năr 20/2/2025. Hăm dôm anih jang teh đak, rim tơring tam mă pơm kiơ̆ pơkăp 'măng mă âu, pơtoi chă hơlen, pơkăp bot 'lơ̆ng pơhlom 15% tơdrong pơkăp kiơ̆ tơdrong pơgơ̆r jang đơ̆ng Trung ương.

Ƀok Nguyễn Đình Trung, Ƀĭ thư Tĭnh uy Đăk Lăk ăn tơbăt, Tĭnh uy, Anih jang vei lăng kon pơlei dêh char gô tơbang dôm tơchơ̆t đơ̆ng rŏng kơ hop akŏm Hô̆i đŏng kon pơlei. Đơ̆ng rŏng kơ noh, kơdră kơ dôm anih jang teh đak păng phŏ kơdră athei pơtơm tơdrong jang: hơmet anih jang, jên hu, mŭk drăm, rim kơyâ̆u pơkăp đang kơ noh pơtơm pơm jang kơ anih jang 'nao đơ̆ng năr 1/3/2025.