Năr 7/5, tơ̆ Hải phòng, Ƀô̆ đô̆i Đak dơsĭ pơgơ̆r Tơbăt 70 sơnăm năr pơjing Ƀô̆ đô̆i đak dơsĭ Việt Nam (7/5/1955 - 7/5/2025) păng sơng iŏk Mê đai Hồ Chí Minh. Kơdră chĕp pơgơ̆r Teh đak Lương Cường, Kơdră Khul kơdră chĕp pơgơ̆r Ƀô̆ đô̆i vei lăng sơlam teh đak-Sơđơ̆ng, Kơdră tơm Khul ƀô̆ đô̆i kon pơlei vang năm păng pôk ăn Mê đai Hồ Chí Minh ăn Khul ƀô̆ đô̆i Đak dơsĭ. Pôk ăn Mê đai Hồ Chí Minh, tơmam hơpăh gĭt kăl hloh kơ Đảng, Teh đak ăn Khul Ƀô̆ đô̆i Đak dơsĭ păng iung pơma tơ̆ pơm lêh, tang măt ăn Đảng, Teh đak, Kơdră chĕp pơgơ̆r Teh đak Lương Cường hmach bơnê kơtang dôm tơdrong jơnei păng tơgop tih tên đơ̆ng Bô̆ đô̆i đak dơsĭ Việt Nam lơ̆m tơdrong jang kĕch mang nuih mơng gơh hơgei kơ Đảng, kơ hơdrech hơdrung lơ̆m 70 sơnăm ou ki. Kơdră chĕp pơgơ̆r teh đak pơma hơdăh, dôm sơnăm kơnh, tơdrong lơ̆m plei teh, tơring rơngei hiôk hian, jang hơdoi oei jing dôm tơdrong tơm hloh; mă lei hơnơ̆ng đei ƀôh ưh sơđơ̆ng, tơdrong pơjei dih băl kơtang kơ rim teh đak tih. Kơdră chĕp pơgơ̆r teh đak pơma hơdăh, đak sơsĭ, achon dơsĭ jing hơnih gĭt kăl hloh ăn atŏk tơ iung muk drăm-tơpôl, vang mơ̆t hơdoi apŭng plĕnh teh, jing hơnih gĭt kăl lơ̆m vei lăng sơđơ̆ng teh đak, sơđơ̆ng dơ̆ng kơjăp. Vei lăng gei keh kong pơm tơngla tơring đak dơsĭ, achon dơsĭ kơ Teh đak jing jơhngơ̆m đon hơpơi ‘meh vă, hơdrin kơtang đơ̆ng pơ đĭ lơ̆m Đảng, lơ̆m kon pơlei,lơ̆m khul ƀô̆ đô̆i bơ̆n, lơ̆m ou đei khul ƀô̆ đô̆i đak dơsĭ Việt Nam jing khul kăl hloh.