Dôm tơdrong đei hơlen, tơchơ̆t ah 'măng hop akŏm âu 'măn tơdrong jang pơkăp bot jơnŭm pơgơ̆r, pơtrŏ hăm tơdrong kăl pơm jang kơ teh đak lơ̆m anglŏ sơnăm jang 'nao. 'Nâu jĭ tơdrong tŏk bŏk đei kang ƀô̆, đảng viên păng kon pơlei drơ̆ng lăp, adoi jĭ trong pơtơm gah tơdrong asong pơkăp kan ƀô̆ tơ̆ Hop akŏm mă 14 kơ Đảng; pôk rơih bơngai tang măt ăn Kuôk hô̆i jăl 16 păng Hô̆i đŏng kon pơlei dôm jăl jang 2026-2031. Atŭm hăm noh, Kuôk hô̆i hơlen, tơchơ̆t, tơtom pơklaih tơnap tap, tơhlăk tơhlĭn gah trong pơkăp jang vă keh đang anih jang, iŏk yua bơngai jang, pơjing cham char pơm jang hơtŏk tơ-iung 'nao, vă jang đei jơnei dôm tơchơ̆t Hop akŏm mă 13 kơ Đảng hlôi tơlĕch.

Adoi lơ̆m 'măng hop akŏm âu, Kuôk hô̆i gô hơlen 4 tơdrong chih akŏm luơ̆t: Luơ̆t pơgơ̆r jang kơ Jơnŭm pơgơ̆r teh đak (hơmet tơplih); Luơ̆t Pơm jang Jơnŭm pơgơ̆r tơring (hơmet tơplih); Luơ̆t hơmet ming minh ƀar tơdrong lơ̆m Luơ̆t pơgơ̆r jang kơ Kuôk hô̆i; Luơ̆t tơbang hla bar kăp gĭt kơ khôi luơ̆t (hơmet tơplih). 'Măng hop akŏm âu kơchĕng pơm jang lơ̆m 6 năr minh puơ̆t, đơ̆ng năr 12 truh năr 19/2/2025.