Pơgê năr 4/6, Thủ tướng Phạm Minh Chính pơm tơm hop akŏm Khul kơdră chĕp pơgơ̆r Teh đak khei 5/2025 tơ̆ Hơnih bơ̆ jang Khul kơdră Teh đak. Hla bơar chih tơbăt bơ̆ jang đei ƀôh tơdrong jang mŭk drăm sơđơ̆ng, tơdrong tŏk jur đei vei lăng kĕ, tơdrong tŏk ‘lơ̆ng hơ iă hloh pơtêng hăm khei hơdrol păng dôm khei ou lơ̆m sơnăm 2024. Pơma pơtôch hop akŏm, Thủ tướng pơma hơdăh: tơdrong jang mŭk drăm-tơpôl hơnơ̆ng sơđơ̆ng ‘lơ̆ng, khei đơ̆ng rŏng ‘lơ̆ng hloh khei hơdrol, 5 khei blŭng sơnăm ‘lơ̆ng hơ iă hloh pơtêng hăm dôm khei ou lơ̆m sơnăm sơ̆. Thủ tướng athei akŏm lơ̆m 11 tơdrong jang tơm, lơ̆m ou mă kăl hơmet pơ ‘lơ̆ng tơnap tap trong tơchơ̆t ‘noh kăl hloh. Trong chĕp pơgơ̆r ‘noh jing rơvơn tih tên hloh, kăl đei hơmet ming kơtang, ưh kơ lê̆ kơ yuơ bơngai bu mă lei kơ yuơ kơ kon pơlei păng hơdrĕch hơdrung. Thủ tướng pơrô̆ athei jang kiơ̆ jơnei Tơdrong jang iung jang tơlĕch jang kiơ̆ “Puăn tơdrong jang tơm” kơ Hơnih tơm Chinh trĭ, iung jang hloi tơjră hăm trong jang thuê̆ tĕch răt đơ̆ng Mi, hơnơ̆ng hơmet pơ ‘lơ̆ng trong bơ̆ jang, tơplih kơsô̆, pơm kơtoei khul jang, pơjing hơyak pran atok tơ iung kơjăp ‘lơ̆ng ăn teh đak.