Kapul duah thau, pataom atau talang bol lin hu duah mboh veik 5 atau talang saong 2 paok ndap nda kaya di labik Bein bangu Lê Thị Riêng, paglaong taong abih atau talang bol lin hu duah mboh di ini tagok 16 paok kaya. Bi Tu lenh Ban raya Ho Chi Minh daok pambuak haong Gilang Sajarah Bol lin Viet Nam piah khik ramik, pataom piah saong pandar rilo abih khau tin meng harak gal, kaya ndap nda hu duah mboh, piah duh ka bruk ngak tantu angan je, ngan haong caong khin ba dom bol lin gilac mai haong ayut cuai, palei pala saong baoh sang hadei jaik 60 thun cang maong.

Uy ban Mat tran To quoc Viet Nam ban ray Can Tho pambuak haong Mban Chi huy Bol lin Bien phong ban raya jao brei 30 baoh sang Jum pataom kuhria tui jien abih tih 1,8 ti dong ka ban Can Tho hu jak ba dom gah rik daong tame ka bhum taphia negar xã  Lai Hòa saong xã Vĩnh Hải. Kuhria meng akok thun mbiah tal ini, ban raya Cần Thơ jak ba dom gah rik daong tame padang ngak 408 baoh sang Jum pataom ka urang kathaot, jaik kathaot saong baoh sang biak kan kandah, kuhria abih jaik 25 ti dong.

Balai Bien phong Hàm Luông (Mban pato tacei Bol lin Bien phong tinh Vinh Long) pambuak haong xa Tân Thủy saong xa Bảo Thạnh bahrau peih pakak danak dak rup patau “Wa Ho haong Bol lin Bien phong”. Rup patau jeng “labik bhong meraih” duh bruk pato megru kat mang, peih danak dak chinh tri, bac megru saong ngak tui jalan sahaneng, ilamo, bruk daok dang di Chu tich Ho Chi Minh. Bingun ini, Balai Bien phong Hàm Luông daong padang 2 baoh sang anit ranam, hu yaom 120 trieu dong, ka 2 baoh sang rahra gaok kan kandah.

Ban raya Dong Nai suai salih tapa pandar taka so. Mbiah tal ini, Pasak Pasang iek, ngak bruk thong minh (IOC) oh yau gauk ka du lieu meng dom gah, dom bhum palei; talei pambuak, ha tang mac jamraih oh ka sumu. Ong  Nguyễn Văn Út, Akok UBND Ban raya Đồng Nai, brei mboh 6 bilan puac thun brei kham merat  peih ngak tui bruk salih pandar taka so, pasak langyah dom danak dak pandar taka so. Ban raya  kuhria ka dom xa, phuong dalam danak dak piah hu sumu dom bruk khik iek saong ha tang pandar taka so.

An Giang lac bhum palei hu taneh pala padai yaok thun labaih 1,34 trieu ha, kuhria hu pandar labaih 1.300 tan kadung jru pacang khik phun kayau hadei tuk pandar (kuhria rah tapa hu labaih 1kg kadung/ha). Dalam tukvak 2021-2025, gah chuc nang bahrau pataom hu labaih 49 tan paok jru pacang khik phun kayau hadei pandar. Tal ini, dalam tinh An Giang hu padang 948 kavei padang, min bruk ini oh ka pabak hatai caong lagaih, rilo labik pataom bhian daok dalam bruk biak rilo.

Patui veik khaw tin ka bruk apui khuah mbang di sang mac ngak taghaoh di ban Tấn Giang, tỉnh Phúc Kiến, Trung Quốc harei 9/7 hu takik abih di nyu 28 urang metai. Gah pacang caga samar chip, dalam nan hu 183 urang lin daong saong 35 radaih padam apui khuah hu ba mai labik ini. Tong Bi thu, Po negar Trung Quoc Tập Cận Bình caong khin dom jabat chuc nang daong ka urang daok gak tavak, iek glang dom urang njauk rambuac saong pajong jak ba baoh sang gauk gar di dom urang gaok bala, tui nan brei duah thau ka bruk ba tal bala.

Iran hu pablei tabiak takik abih 10 trieu thung menyek tamo saong menyek pandar tok hadei sa malam, jaik yau piah srap gap ka bruk Bol lin tasik My aval vang kareik veik. Bruk samar chip pajeng xang menyek rah tabiak hadei tuk My katuak tayah bruk oh taong bhat dui atah 60 harei, phun jien anak meta brei ka Iran tantu cambaih laih ba menyek tabiak darak pasar.

Tui Rajaei negar Cong hoa Dan chu Congo, dom urang njom Ebola birau hu khan brei thau di dom labik dahlau di ini oh ka tamuh ruak, dalam dom urang metai dalam mang tamuh jit ruak birau di taneh ia ini tagok tal 600 urang. Mbang tamuh jit Ebola birau abih kayua chung virus takik mboh, urak ini hu vacine atau jalan tacei ba jru ruak./.