Mentri Pato mergru daok mek panuac duah thau ka Sarak Hukum daong palih ruah anek saih saong daong bruk bac megru ka urang bangsa biak takik manuac. Sa dalam dom kadha birau  njauk caik hatai lac brei palih ruah tame rilo urang, dalam nan hu anek saih meng pakat mam non tal urang bac hadei dai hoc; tui nan palih ruah pabak ralo urang bac di dom sang di karja hu mbang tui sarak daong. Daok bruk palih ruah, sarak hukum  ka anek bac lac urang bangsa biak takik manuac hu pabak tanut diem glong abih piah hu tame bac dai hoc; tui nan, hu pabak tanut diem atau palih ruah tapak tame bac thac si, tien si tui hukum di sang bac.

Peih ngak “ Danak dak 500 harei melam jhul pakhang bruk kuac duah, pataom saong brei thau angan talang di liet si”, Bộ Chỉ huy Quân sự TP Đồng Nai saong Đội K72 daok samar peih praong labik duah di xã Minh Đức (huyện Hớn Quản, tỉnh Bình Phước klak), labik birau duah mboh hu 3 labik hu kaya kan talang; dalam nan brei pacang hu dua labik ghor dar dom urang dalam trun labaih 1,2 m. Di labik kuac duah hu mboh rilo kaya kan daok ala taneh: mbaih Phao AK, 6 mbaik mbut kalam, 2 bình tông, 4 thong klaik juah takai gam haong klaik khan bai tăng, yun, talei ka-ing. 

Melam karoi 19/7, Festival Biển Khánh Hòa 2026 tamat blaoh hadei 3 harei peih ngak dalam  chreih chrai hu rilo bruk ngak ilamo, nghe thuat, padhih the thao daong yulit biak gheih oh labik halei hu. Bruk ngak hu oh lac yaih khan thaik binguk Khánh Hòa harei pagam tinh bo daok peih tabiak rilo bruk ngak mbang, ba mbuan lagaih piah ka karja palei hu dang tabiak ngak dom bruk pakat dunya dalam tukvak anak tal. Tuknak anak tal, Khánh Hòa daok kuhria peih ngak rilo bruk pakat dunya, dalam nan hu bruk pakacah chung ket Urang kumei siam binai Dunya mbang 73 saong Urang kumei siam binai Hoàn vũ Miss Cosmo. 

Yam ndoc So Y te tinh Dong Thap birau ba tabiak Bruk pasang iek prein yawa yaok thun, pasang iek ruak oh mek jien ka bhap bini dalam tinh thun 2026. Tui nan, tinh Đồng Tháp kham merat iek glang prein yawa ka taong abih bhap bini tukvak camereip njauk ngak tui bruk ba tabiak. Bruk brei pataom tame pasang iek prein yawa ka urang dalam sarak karja, dalam nan hu urang ngak bruk daong taneh ia, urang jaoh jo daong raong dalam bhap bini atau dom labik raong daong urang kan kandah tui sarak karja, urang sang kathaot, jaik kathaot, urang umo taha.

Dua harei tapa, di xã Đất Mới, tỉnh Cà Mau rah tabiak gam gam 4 mbang glut jaleih taneh rah tui ar kraong, ba theik rilo drap ar saong cakak jalan nao mai dalam palei. Karja  bhum palei daok samar daong bhap bini ramik pasiam bruk khut tayak. Tui nan, pachreih bhap bini paglong bruk pacang caga, brei panduan ba drap ar chiat jien nao labik hu salamat; Takik brei bruk nao mai di labik tapen kraong daok ra-ai talah piah khik brei salamat.

Kapal ahaok pajeng tuai damuai praong C919 kayua Trung Quoc ngak tabiak, brei peih kapal ahaok pajeng tuai dunya akaok meti par nao Bắc Kinh - Ulan Bator, Mông Cổ meng harei 12/8 anak tal. Bruk ba kapal ahaok C 919 tame par meng Bắc Kinh - Ulan Bator brei mboh bruk peih praong pajeng ba tuai damuai dunya meng janih kapal ahaok ini. Hadei 3 thun pajeng tuai damuai, janih kapal ahaok ini pajeng hu 42.000 mbang.

Sang megik Islam di Pari lac sa dalam dom danak dak Sang megik praong abih di urang Islam danei angan negar Prang, birau pahadar 100 thun padang ngak. Danak dak hu padang meng thun 1926 piah pahadar yaok pluh ribau lin Islam mai tal dom labik Phap meblah di chau Phi metai dalam mbang Mesruh metak Dunya mbang ka sa. Urak ini, Islam lac agama praong dhi dua pak Pháp, taneh ia hu bhap bini urang Islam di Tay Au.

Hadei labaih sa bilan meriak gauk biak chreih chrai di grauk negar Bắc Mỹ, World Cup 2026 tamat padeih Tây Ban Nha mbang jayak, brei mboh bruk huy makna praong di gah caoh mbanh dat blong dunya akaok meti hu 48 kapol  nyaom hu mbaok tame saong 104 mbang pakacah hu peih ngak di klau taneh ia lac Mỹ, Canada saong Mexico. Sa dalam dom bruk ngak hu siam mekre di World Cup 2026 lac bruk khik brei hu salamat dalam lac tukvak pakacah praong abih meng lavik mai./.