Page ini 6/7 di Bein bingu Lê Thị Riêng, UBND TPHCM, Bộ Tư lệnh Quân khu 7, Mban tacei ba bruk duah pataom saong brei thau angan di talang liet si hu ngak Adat duah pataom talang liet si di Bein bingu Lê Thị Riêng, phường Hưng Hoà. Hu mbaok di labik ini, Thu tuong Lê Minh Hưng khan lac: “ Bruk ini oh padeih tuk daok hu asar kadha duah pataom, atau talang  dom liet si  oh ka pataom ginup. Yau halei jeng brei  kham duah  ka ba hu, piah ba dom anh hung liet si mai haong baoh sang, bhum palei di urang”. Dalam page ini bol lin pataom hu 7 atau talang liet si, camereip dauh hu angan sa urang saong dom kaya hadei jaik 60 thun.

Mban tacei ba jalan 515 tinh Tay Ninh birau peih ngak dalam praong prang Ndam padhi saong ba nao dar 173  talang urang lin halan hatian, urang ilamo Viet Nam var klak rup drei di taneh Campuchia, hu duah pataom saong ba mai palei negar mbang ka 2, bilan pandiak  2025 -2026.  Tapa 25 mbang ngak bruk di taneh Campuchia, gah bol lin ngak bruik di tinh Tay Ninh duah pataom ba mai palei hu 9.183 talang liet si, dalam 282 talang hu thau angan saong labik daok.

Kuhria tal abih adit blaoh dalam Ban raya HCM hu labaih 251.400 bhap bini pasang iek prein yawa tui Danak dak iek ruak ka taong abih bhap bini. Rilo harei hu labaih 10.000 mbang bhap bini dut iek prein yawa. Ini lac bruk siam, brei mboh danak dak daok tame  tukvak ngak drah samar. Tui PGS-TS-BS Tăng Chí Thượng, Yam ndoc Sở Y tế TPHCM, yaok sa xã, phuong, dac khu njauk brei kham merat jeng bruk siam di Danak dak, iek bruk dut iek prein yawa di bhap bini lac sa dalam dom taka so brei mboh bruk khik iek  di bhum palei.

Kong an tinh An Giang pambuak haong karja xã Ba Chúc saong Sang bac Tiểu học Lạc Qưới peih ngak  “ Danak daong ka adei nao bac”. Danak dak ini, Mban peih bruk hu alin 100 paoh kaya pandap dalam nan hu tapuk siphau, katap saong dom kaya  bac da-a  tal dom adei anek saih hu rai diuk kan kandah, rik tame pabak prein pachreih dom adei tame thun bac birau. Tapa Danak dak rik tame pakhang bruk pambuak gah kong an haong karja palei saong bhap bini labik taphia negar.

Dom bhum taneh pala durian di Dong Nam bo daok tame bilan paik baoh min suai hu urang blei. Do dom xã pala rilo durian di Ban Dong Nai, urang blei durian Thái yaom meng 50.000 – 60.000 dong sa kilo tui baoh praong atau sit, trun biar ralo dut saong labiah 130.000 dong sa kilo baoh karei bilan. Di xã Châu Đức (TPHCM), yaom durian Ri6 meng 25.000 -32.000 dong sa kilo. Yaom nan oh ka njauk caong khin di urang pala dalam tuk jien buh tame ngak, njauk ndem tal khak saong jien pah urang ngak, tagok glong dut saong thun dahlau.

Cuc Khik iek Bruk tame tabiak saong Daok veik Nhat Ban brei ramik pasiam jien le phi ngan haong dom harak gal likau brei daok veik ka urang negar langiu. Tui nan, jien kuhria meng 10.000 Yen (labaih 62 USD) ngan haong urang daok veik ala 3 bilan, daok veik 5 thun lac 75.000 Yen ( labaih 465 USD). Tukvak daok veik dak suai, jien daok glong. Karja Nhat Ban brei mboh  bruk tagok jien je piah pabak ka bruk hu rilo urang negar langiu mai taneh ia ini tagok samar.

Jabat Khi tuong Han Quoc ( KMA) brei ngal tui panuac kakei birau meng bilan 7, salih ka  dua pakat  yau dahlau diah 3 pakat. Ini lac mbang akaok meti Han Quoc  brei ramik bruk pathau khan caga dahlau ka langik pandiak kayua langik salih karei. Mbang akok meti, KMA brei pabak jalan kakei melam nhiet doi, brei thau tuk melam langik pandiak meng 25 do C tagok. Tui nan, kakei  bhap bini brei takik ngak bruk di pandiak.

Iran ba linh cữu Đại Giáo chủ Ali Khamenei nao tapa ban ine Tehran dahlau tuk ba tame cuh. Linh cữu ong Khamenei, hu me-om hala dok negar Iran, gam linh cữu dom urang  dalam baoh sang metai di mbang patuh  phao di harei 28/2 pajeng meng radaih nao tapa dom ban medil dalam ban ine tal Mblang kapal haok  Mehrabad. Tui bruk ba tabiak, ndam padhi  dui atah meng harei ini tal harei 9/7, blaoh ba ong Khamenei dar di kalan Imam Reza di ban Mashhad, bhum palei di ong./.