Di palei Cam Craoh Tang, xa Hàm Thuận Bắc, tinh Lam Dong (labik huyen Hàm Thuận Bắc, tinh Binh Thuan klak) ong Thông Long hu thau tal lac urang hu angan je yuk saranai. Oh lac sa janih yau nan ong Thông Long daok lac sa urang tacei pato brei ka rilo rai rah dam dara ranaih dalam palei, daong ka urang Cham khik ramik hu ragam ragu meng kan, ngak brei khik ramik asal ilamo bangsa.

      Amuk Thông Thị Hạnh, Akaok Mbang ngak bruk mat trân palei Craoh Tang, xa Hàm Thuận Bắc, tinh Lam Dong brei thau, ong Long oh lac sa urang ba akaok nao dahlau dalam bruk ngak mbang patagok kinh te, dak padang palei pala bahrau, blaoh daok lac sa urang abih hatai jai hu mbaok tame bruk dak padang Ndang, dak padang mejam chính trị, khik ramik saong cak rok patagok dom yaom ilamo meng kan di bhap bani urang bangsa Cam.

       “Dahlau diah baoh sang ong Thông Long jeng kan kandah rilo, min mai meng hatai kham merat di drei yau nan ye urak ini mbang angui di sang ong jeng kein laghaih jang. Ong Long jeng hu khik ramik bruk ngak meng kan yau ye yuk saranai, jeng ye tacei pato brei ka dom anek kamuan yuk saranai piah duh ka bruk ngak adat cambat dalam bhum palei. Urak ini ong hu biak rilo anek saih tui bac yuk saranai”.

     Yaom lac yam tapa umo labaih 70 thun blaoh min ong Thông Long jeng caik abih pren yava, hatai jai brei ka bruk cak rok patagok di bhap bani Cam labik ini. 

        Langiu di bruk rik daong pren yava gam haong Mbang Kapul dang bruk palei Cam Craoh Tang, xa Hàm Thuận Bắc, ong daok hu pok ngak urang taha akaok palei, urang mong iek bruk peih ngak harei roya di kalan Pô Chei pak di ini, ngak brei khik ramik ilamo Cam dalam palei.

        Ong Thông Long brei thau, dalam tukvak bilan pandiak, ong bhian peih bac magru yuk saranai ka dom anek kamuan dalam palei. Sap yava di saranai pang rah tapa medhil lac mbuan mbiah min piah ralai pagam haong sap ginang, paranưng ye caong khin urang ma-in njauk hu ilamu, abih di nyu lac bruk mek suan yava dalam tuk yuk saranai.

        Ong Thông Long klah rabha, yaom lac manuac urang mai bac oh yaok abih angaok tuk tangin min ong jeng mboh bui sambai jeng ye ba rup tame tacei pato abih drei. 

        Urak ini dom urang hu ong tacei pato yuk saranai ye lambaok hu ong piah duh dalam harei roya di palei pala pak di ini. 

          Urang Cam, sap saranai nan lac ragu ragam ginreih gheih ghang, pambuak pagam anek manuac haong yang bhang. Sap saranai nan oh meda lahik nao hu kayua lac hu blaoh dom urang anek, dom asaih di ong daok patui veik khik ramik.

        Tuk sap saranai yava tagok gam haong sap ginang, paranưng yava prong di kreh palei Cam nan jeng lac sap pok payua di bangsa, kakei ka bruk khik ramik ilamo meng kan tapa dom rai rah manuac urang.

       Yau ye ong Thông Long di palei Cam Craoh Tang, xa Hàm Thuận Bắc, tinh Lam Dong, dom rai rah harei hadei meda patui yuk saranai yau bluh yava tagok sap ndom dalam hatung hatai di urang bangsa Cam, khik sap yava saranai saong caong khin ka sa rai diuk sron mbuan saong haniem phol./.