Di mbon Trang Yôk, xa Krông Nô, tinh Đắk Lắk rilo urang thau amuk H'Wai Triêk lac urang bhian nao duah kubo bol lin. Sa pluh thun tapa, mahit di halei hu urang daok dalam labik mesuh metak meng kal dahlau… amuk jeng duah nao tal. Mahit di halei hu daok sa urang thau… amuk jeng tagok jalan nao duah. Gaok njauk mai gait nao sa drei. Gaok njauk mai hu anek likei pajeng amaik nao meng page mbiah tal malam. Oh thau tantu hu dom mbang nao blaoh gilac mai sang dalam hatai mblung mabuk dan saong drut druai. Urang kamei nan oh ka hu sambang sahaneng tal bruk padeih duah. Kayua amuk tuk halei jeng je hatai lac di sa labik halei nan urang sa-ai di drei jeng daok cang urang dalam sang mai raok.

 “10 thun ini mai nao duah, adei taluac oh mada klak sa-ai drei, kham merat duah kubo atau talang ka ba hu, oh hu kubo drei jeng drut druai, nao jaik ye nao sa drei, nao atah ye hu anek pajeng, nao miat miat, gam nao gam duah sua tangi.”

Oh thei daok hadar dua anek amaik H’Wai hu nao abih dom jalan, tapa dom mbon palei. Y Lịch Triêk, anek likei bhian pajeng amaik nao atah, jeng tok hadar lac, dua urang hu nao rilo dalam tinh, langiu tinh, nao tal rilo gok kayau halau ia craoh:

“Gah Đầm Ròn jeng nao duah, gah Lắk jeng nao, nao 3 labik oh duah mboh, blaoh meng di var nao taom mbaok saong dom mikva palei, hu dua urang ndom meyai haong mik cei dalam sang, hu dar ong angan hagait angan hagait blaoh mik ceik mai khan, amaik lac meda lac cei drei paje. Tangi veik dom urang di nan hu duah mboh takai phun halei oh, nan lac hu takai phun. Harei ini bui sambai tuk duah mboh hu mik cei paje.”

Sa angan. Sa takai gok phun. Sa inem krung. Hadei labaih 50 thun… grauk abih meda nda lac var abih. Min jeng daok di nan hatai kham merat di urang adei kamei saong glo akaok kanal hadar di dom urang dar kubo ayut cuai sahabat.

Labaih 50 thun, kraong ia jeng daok nduac. Taneh riya jeng apuh kophi. Hu mbang jalen di urang ngak apuh gaok njauk labik sa-ai ndih blaoh jeng oh thau. Tal harei ini, dom urang bol lin Kapul K51 gilac mai di ini. Dom urang nan kuk trun, haong ong taha saong dua palak tangin thaoh. Dai uy Y Nhai Drao brei thau:

“Taneh ini meng kal urang pala kophi, kuac cakac sa mbang gaok atau talang min urang oh thau. Kapul K51 pataom atau talang tok daok talang thaoh, oh thau talang halei di urang halei kayua nyu srau kadau abih paje, nan biak kan kandah ka bruk thau cambaih laih talang halei di thei.”

Di ala tal taneh bahrau hu duah mai tal hadei yaok pluh thun nao duah… oh tok lac atau talang. Nan lac sa urang sa-ai, sa urang ayut cuai, daok cang labaih 50 thun piah hu ieu njauk angan di drei. Thieu ta Nguyễn Chí Tiến, urang dalam Kapul K51 brei thau:

“Tuk duah mboh dom va, biak lac mboh dom va ndih gilac di ceik glai khol dahlak hulin mboh biak drut druai, jeng oh thau ndom mayai hagait, hu ba dom va mai sang nan lac bruk blaoh dalam hatai dahlak hulin mboh biak bui sambai.”

Hu dom urang gilac mai hadei mesuh metak meng dua takai di drei. Hu dom urang gilac mai di bara ayut cuai. Daok bol lin Y Chông Triêk lahik labaih 50 thun ka meng hu gilac mai sang dalam sap ieu “sa-ai ley” di adei kamei… di harei sa-ai tabiak nao oh ka samu hadar mbaok sa-ai./.