Kapul Mỹ Phú, phuong Mỹ Phong, tinh Dong Thap, gam saong bruk “Phun kruac bung bein dahlak”, bak hadah krah di mikva urang ngak nong hu mbaok tame kapul ngak ini; salih ka bruk hadei tuk paik baoh, urang ngak nong dut kilo kruac bung pablei tui jalan ngak meng kal mai, ye urak ini mikva ba tabiak sa jala sahaneng biak gheih mekre: tuai damuai meda ruah bruk hu ka drei dom phun kruac bung di bein hu yaom jien labaih 10 trieu dong/thun. Oh lac padeih di bruk blei pablei kaya ngak nong, tuai damuai daok hu ta-eng drei tui iek luac jalan sangka, daong sang bein meng tuk phun tabiak bangu tal tuk paik dom baoh kruac bung siam di abih. Meng bruk ngak karei ini, langiu jien mek tame meng dom bein baoh kruac bung pablei tabiak langiu negar, urang ngak nong di Kapul kuan Mỹ Phú hu peih tabiak sa kein laba karo kajap. Gam haong bruk ngak nan, ini jeng lac bruk ngak siam gheih piah paglaong  yaom kaom angan je saong ba kaya nong palei pala nao tal jaik jang haong urang blei pandar. Ong Huỳnh Văn Hiếu, Akaok Kapul kuan Mỹ Phú brei thau:

“Bruk drei pandar di ini meng khak huu ke atau lac khak vi sinh, daok jru ye lac jru sinh hoc. Drei pandar njauk yau nan, piah ginup tanut pablei tabiak tabiak langiu negar.”

Piah khik asar siam samu gauk, urang ngak nong oh daok ngak ban glai ban glo ini ha sit diah ha sit barat blaoh pambuak jeng kapul gam haong gauk klah rabha ilamo saong njauk hatai jalan pala, klah rabha bruk trun yaom jien buh tabiak ngak. Ong Võ Thành Tài, Akaok kapul Urang ngak nong hu ilamo pala kakao xa Vĩnh Hưu, tinh Dong Thap brei thau:

“Hu 14 urang, ye urak ini yaok bilan taom gauk sa mbang piah nyaom biai mek hu ilamo siam gheih, pasiam ka dom bruk oh ka lagaih dalam bruk pambuak di drei… Jaik tal drei kuhria peih praong parilo dom urang piah kapul pala kakao ini dak harei dak karo kajap saong siam gheih jang”.

Daok ngan haong Danak dak patagok gah ngak nong hacih tui PGS di Dong Thap; hade isa tukvak peih ngak, Danak dak ini oh lac sa janih brei daong salih jalan ngak tabiak, parilo jien mek tame ka rahra, blaoh daok padang majam pambuak meng bruk ngak tabiak, ngak kaya ta, bruk pablei; gam haong nan pambak tabiak jalan diuk rai hacih hijao dalam bhap bini. Ong Đoàn Thanh Hiền, xa Mỹ Thọ, tinh Dong Thap brei thau:

“Ndom mayai lac Danak dak ngak saron mbon siam makre tui jalan huu ke ini lac biak gheih. Piah daong ka dom po bein ngak tabiak baoh pa-aok hu siam, patakik pandar khak, jru hoa hoc, salih tapa huu ke. Ini lac caong khin, hatai caong di darak pasar urak ini biak khin asar siam dom kaya yau ini. Nan tukvak tapa asal dahlak saong dom urang dala kapul pa-aok tui tanut PGS jaik yau hu ngak tui siam luac jalan ngak tabiak pa-aok salamat tui PGS”

Tui Kapul Urang ngak nong tinh Dong Thap, tal ini dalam tinh hu padang 18 kapul, kapul urang ngak nong hu ilamo dalam gah pala drak. Tapa bruk pato pasram, salih ilamo ky thuat saong pambuak ngak tabiak, urang ngak nong dak harei dak ngak siam asar siam kaya ngak nong meng akaok tame saong parilo jien mek tame ka mikva. Min ini nyu jeng lac nen tang piah paglaong yaom kaom kaya, daong prein ka dom gah ngak kaya, pablei tabiak saong daong ngak jalan patagok di gah ngak nong di bhum palei./.