Khánh Hòa hu ba tabiak bruk ngak tui lek taka so ka drap ar ilamo bangsa Cam saong patagok labik parang iek meng online. Bruk ngak lek taka sok daong dom ilamo siam gheih di bangsa Cam patruh tabiak labik gilang muyim atau inem mek, duh brei ka bruk roh duah, pato megru, yaih khan saong pambuak tal tuai damuai jirah dalam negar saong di dunya. Tui dom gah ngak mbang pablei salih, bruk khik takai tuai dauai urang jirah oh lac dang daok di mblang langiu langik tasik blaoh nyu daok lac di dom asal kadha ilamo gah likuk yaok drap ar. Meng gah meta maong ini, ilamo Cam oh lac drap ar njauk brei khik ramik blaoh daok jeng kein lagaih piah padang dom kaya ngui brei ka jirah rivang karei. Ong Alain Nguyễn, Tong Yam ndok labik padeih padei Hoàn Mỹ, tinh Khanh Hoa brei thau:

“Buh jien tame di tinh Khanh Hoa hu labaih 10 thun, dak harei khol dahlak dak mboh yaom kaom, ilamo bangsa Cam daong khol dahlak akau hu dom asal kadha piah khan yaih. Yau nan ye, khol dahlak hulin biak khang hatai piah yaoih khan ilamo Cam, tapa di nan, patagok dom kaya kan ndap nda jirah rivang ilamo dom bangsa. Oh lac mai tal Viet Nam tok piah menei ia tasik, oh lac tok hu mbang lac hu blaoh njauk lac ilamo piah urang duah thau, urang khan dak dalikal brei ka anek taco urang”.

Dom urang jru ilamo ndom mayai lac, salih lek taka so daok peih tabiak kein lagaih ba tabiak drap ar ilamo urang bangsa Cam nao tal jaik jang haong tuai damuai tapa dom janih kadha lek taka so saong ilamo ngak kong pambuak urak ini. Min, piah dui pachreih tuai damuai hu hatai caong khin rivang iek ilamo dalam, salih taka so brei pagam haong paglaong ilamo urang ngak bruk. Kapul urang tacei ba, urang ngak jirah rivang saong bhap bini ngak bruk drap ar brei hu caga ilamo piah pathau khan njauk ilamo nao tal tuai damuai. Pho Giao su, Tien si Ngô Văn Doanh, urang meng dahlau daok dalam Kapul Hoi dong Drap ar ilamo pakat negar ndom meyai brei thau lac:

“Kajap ilamo ye mboh biak siam paje, lagaih ka bruk yaih khan, biak dui pachreih, samar drah. Yau nan min njauk hu lac brei thau hu dom ilamo siam gheih, ilao takik ye tok ndom ka hu min. Rilo meng lac tuai damuai jirah daok di negar langiu, tuk dom urang nan tame mai, ilamo tuai damuai hu karei, oh njauk lac nao me-in yau bhian, dom urang nan daok hu ilamo jang urang tacei ba”.

Langiu di bruk paglaong asar siam kaya jirah rivang ilamo, bruk peih praong darak pasar tuai damuai jirah dunya meng dom kaya ndap nda karei jeng brei hu sangka jang. Sa jalan nao bahrau hu sangka lac patagok jirah rivang Halal pagam haong ilamu Islam Cam. Tui dom urang roh duah, gam haong bruk parilo tuai damuai mai meng Trung Dong saong dom negar Islam, bruk padang dom jitvu njauk tanut Halal pambuak haong pandar ilamo bangsa Cam brei peih mblang praong brei patagok ka gah jirah rivang. Sa-ai Huỳnh Thanh Tâm, Kapul Dan toc hoc saong Nhan hoc Ban raya Ho Chi Minh langyah lac:

“Yaom lac, bhap bini Islam di Ban raya Ho Chi Minh oh rilo min ini lac pasak kinh te dang akaok dalam negar, daok dui pachreih rilo gah buh jien tame, tuai damuai mai meng Trung Dong meda hu pandar dom jitvu Halal, pagam haong ilamo Islam Cam di Ban raya Ho Chi Minh”.

Tui bhum tinh Khanh Hoa – bhum palei hu majam bimong kalan Cam rilo abih gam haong bhap bini bangsa Cam daok meng kal dahlau mai– khik ramik drap ar pagam haong bruk ngak po di bhap bini. Amuk Thái Thị Lệ Hằng, Yam ndok So Ilamo, Pahat padhih saong Jirah rivang tinh Khanh Hoa ndom meyai lac, tuk urang tapak hu mbaok tame khik ramik saong patagok ilamo siam gheih, drap ar oh lac hu khik ramik blaoh daok brei bruk daok dang mbang ngui karo kajap tapa bruk patagok jirah rivang.

Băng: Thái Thị Lệ Hằng

“Kayua yau habar khol drei oh khik ramik, oh patagok dom ilamo siam gheih piah tuk tuai damuai mai tal Khanh Hoa urang hu thau di ini hu mikva bangsa Cam, ndung bak ilamo bangsa, hu rilo kaya jirah rivang gheih karei piah rivang me-in. Tapa di nan, pato megru anit ranam ilamo bangsa siam gheih, dom danak dak ilamo njauk kurang meda hu khik ramik hu.”

 Meda hu mboh lac, di dalam jaman taka so, khik ramik ilamo bangsa Cam oh lac sa janih khik ramik dom ilamo di jaman meng kal blaoh daok brei prein diuk ka drap ar. Tuk ilamo kong, ilamo saong bhap bini pambuak pagam haong gauk, ilamo Cam oh lac hu khik ramik blaoh daok jeng prein patagok jirah rivang, daong padang gah ngak kong ilamo saong yaih khan thaik thaot Viet Nam tabiak dunya./.