Iar Biar harei trun, jalan betong dalam palei Lầu Nàng, xa Ia Lốp, tinh Đắk Lắk sameng tagok sap urang nao tabak takai. Tuk malam mai, majam gom jamariak ia harei hadah tagok. Amuk Vi Thị Phương, rahra daok di palei Lầu Nàng chreih chrai brei thau: bruk salih ini rah tabiak labaih meteh bilan ini, meng tuk hu danak dak jalan gom ndien kayua dam dara halan tian pagam di jalan pasak dalam palei. Danak dak hu ngak salah blaoh, jalan sup saong majua yaok tuk biar harei trun urak ini jeng labik urang taom gaok, pasram padhih.

“Bui sambai lo, dalam palei thei thei jeng bui sambai, kayua hu gom truac hadah jalan ka dom anai nao mai mbuan, mboh hadah jang saong gheih jang. Dalam palei jum tangin khik ramik ka jalan dak harei dak gheih jang”.

Jalan ndien ini ieu lac sa di dalam dom danak dak dam dara hu peih ngak dalam Danak dak Dam dara halan tian bilan pandiak he 2026 kapul sinh vien Sang bac Dai hoc Can Tho pambuak haong kapul dam dara bhum palei ngak di dua xa Ia Lốp, saong Ea Rốk, tinh Dak Lak. Dom bruk yau pakajap sang ka baoh sang njauk khut tayah kayua angin ribuk, padang labik bac megru ka anek saih baoh sang kathaot, padang mbklang taong mban atau peih danak dak salih hareik katak mek kaya alin, jeng pamaong tal dom hatai caong cambaih laih di rahra bhum tapen negar, salih ilamo saong pacang khik alam langik, sangka prein yava.

Tui ong Ngân Văn Thành, Phaok Akaok UB Mat tran Negar Viet Nam xa, Bi thu Ndoan xa Ia Lốp, dom danak dak jeng hu rahra hu mbaok khik ramik, pandar tuk ngak salah, daong yaom kaom di bruk halan tian hu dui atah hadei danak dak.

“Dom ayut kapul dam dara ndoan vien, buh abih tian tian daong mikva rahra ngak dom danak dak, dom bruk lagaih, ba mai kein lagaih ka mikva rahra saong bhum palei. Dom danak dak yau truac hadah jalan bhum palei hu mikva taduan saong taong yaom glaong, daok danak dak mblang taong mban ye ba mai hatai pasram padhih ka urang, kapul dam dara saong mikva.”

Oh lac caik veik dom danak dak mboh di meta, tui dom urang dam dara, danak dak halan tian daok ba mai dom bruk ba drei tame biak hu makna di bhum tapen negar Dak Lak. Ngan haong rilo sinh vien, ini jeng ieu lac mbang akaok meti uak takai tal bhum tapen negar, tapak taom gaok urang jakar bol lin daok nhak bruk saong mboh raidiuk daok rilo kan kandah di rahra. Sinh vien Nguyễn Phú Quý, sang bac dai hoc Nam Can Tho brei thau, dom bruk ba drei tame nan ngak ka mbang nao ini oh lac sa bruk halan tian, blaoh daok lac kadha bac megru lagaih ka ilamo thau ka bruk di drei di urang dam dara.

“Tuk adei ngak bruk nan ye mboh biak chreih chrai otmanot. Tui dom adei lac sa urang sit umo ye hu prein yava, prein hatai saong hadah krah ye adei brei jum tangin haong dom ayut sinh vien piah daong grauk urang”.

Yaok danak dak tok lac sa banah bruk sit, min tuk mai meng hatai caong di rahra saong hu ngak meng hatai thau ka bruk di drei di rai rah dam dara, dom bruk rik daong nan daok ngak jeng bruk salih ka dom mbon palei bhum tapen negar Dak Lak./.