Dua harei hadei di tuk palei Nhin ba pataom meng di dua palei Nghĩa Hưng 1 saong Nghĩa Hưng 2 jeng palei Nghĩa Hưng 2, xa Biển Hồ, sa-ai Siu Ayun, urang hu angan je dalam palei, gam haong urang dang akaok palei pasang iek dom canah jalan blaoh mikva caong mong samar hu tuh mbe tong. Hadei di ba pataom, kadha blaoh mikva sangka oh lac tok angan iew bahrau di palei, blaoh dom bruk mikva caong khin hu langyah samar drah halei oh. Sa-ai Siu Ayun brei thau, tuk bahrau pang mahit jalan ngak ba pataom haong dua puk palei di urang Yuen, rilo urang dalam palei daok saneng kuhria huac kanda lac karei adat cambat tanarakun, bruk mbang angui daok dang. Min tapi tapa rilo mbang ndom biai nao mai, pathau khan saong jak ba, mikva hu thau cambaih jang, bruk ramik oh ngak lahik nao asal ilamo di puk palei, blaoh brei palaghaih piah ka mikva bhap bani pambuak pagam gauk, daong ba gauk piah cak rok patagok.  

"Yau meng blaoh khaol dahlak akau jeng hu saneng kuhira, jeng hu panuac ndom ka jalan mbak nao mai dalam palei. Urang akaok palei urak ini jeng hu ilamu glaong jang, sami samar, gam haong di nan thun umo ranaih jang, iew phun nao sa baoh ye pang chip. Dahlak akau jeng caong khin lac meng urang akaok palei ka tal urang ngak gah mat tran ngak ka bhap bani, nao jaik bhap bani jang nan ka meng daong ba hu ka bhap bani."

Caong khin bhap bani jaik taphia karja, karja jaik taphia bhap bani jeng ba tabiak caong khin bahrau gam saong kapul nyaom urang ngak bruk di puk palei. Ngan haong sa-ai Đỗ Văn Túc, Akaok palei Nghĩa Hưng 2, xa Biển Hồ, hadei di 15 thun ngak akaok palei, vaktu masa bahrau ini rilo kateik geik di abih. Hadei di ba pataom, palei bahrau hu labaih 600 baoh sang, labaih 2.400 urang. Puk palei prong jaik klau mbang dut haong dalau diah. Meyah khik iek tui jalan klak ye kan si pal hu hatai saneng, hatai caong khin di bhap bani. Kayua yau nan ye, hadei di tuk ba pataom, Chi mbo saong Mban bhap bani palei hu dak padang danak bruk cambaih laih ka yaok janih, parabha puk palei jeng dom labik bhap bani, parabha urang jakar mong iek yaok labik.  

“Palei pala prong, panuac ndom saong ilamu karei di gauk. Anak tal piah pandar ilamu ngak kong tui lek taka angka tame dalam rai diuk, labik daok di urang Yuen yau habar, urang bangsa takik yau habar, ngak habar piah duh ka bhao bani saong ngak siam bruk ngak di drei, nan lac dom kadha dahlak daok saneng kuhria. Hadei di tuk taduan mek sarak ye drei mai dak padang chip danak bruk ini".

Meng 40 palei yau dahlau diah, hadei di ramik dak blaoh, xa Biển Hồ daok 23 palei, trun tukik daok 42,5%. Gam haong bruk ba pataom sa akaok, puk palei jeng pasiam siam purna dom mbi thu chi mbo, akaok palei tui jalan ngak pasiam tanut ilamu, pren ngak bruk saong ba pandar ilamu ngak kong tame dalam bruk ngak, bruk khik iek glang puk paga. Dalam tinh Gia Lai hu ngak salah blaoh bruk ramik meng 2.693 trun daok 1.400 palei, to dan pho.

Ong Nguyễn Thanh Vũ, Phaok akaok So Noi vu tinh Gia Lai brei thau, patrun dom akaok bruk nan ieu lac sa jalan ngak di bruk ramik pasiam. Kadha prong di abih dalam nan ieu lac bruk paglaong asal urang ngak bruk di puk palei piah ka karja jeng nao gam haong labik daok, duh ka bhap bani siam jang tuk bruk khik iek dak harei dak prong jang. Tinh daok patui bruk pasiam kapul jabat, langiu di nan pasang iek glang, taong yaom saong dak padang danak bruk pato pathram urang ngak mbi thu chi mbo, urang akaok palei piah ka nyu pabak hu hatai caong khin ngak bruk di puk palei dalam jaman bahrau.

Hadei di tuk dak ramik puk palei, to dan pho, tinh Gia Lai hu ramik jaik sa meteh akaok di puk palei. Min tapi baoh jeng siam mekre di jalan ngak ini oh lac sa janih brei mboh taka jabat tukik nao, blaoh daok lac di bruk patui dak padang kapul nyaom urang jarka di puk palei ginup pren khang, salih bahrau jalan ngak piah duh ka bhap bani hu siam jang./.