Taduan khol dalak hulin dalam baoh sang sit di phuong Đồng Xoài, Ban raya Dong Nai (tinh Binh Phuoc klak), ong Dương Đức Thùng (menek di thun 1954, bangsa Nung) dan madeit pok panuac khan gilac dom thun bilan daok dam biak gheih ghang.

Menek saong praong tagok di xa Quốc Toản, huyen Trà Lĩnh, tinh Cao Bang klak, bilan 8/1974, urang dam nan angan Dương Đức Thùng tagok jalan jeng bol lin, hu mbaok tame jalan peih paha bhum Meraong negar saong Jalan ngak Ho Chi Minh sajarah. Thun 1990, ong tabiak bruk ngak di bol lin tui sarak oh daok prein saong gam haong baoh sang palih tinh Binh Phuoc jeng bhum palei ka dua piah daok dang mbang ngui.

Di riyak bruk jah glai pala kayau ngak kong tuk nan, urang bol lin Wa Ho nan kham merat khik gilac, ta-eng tangin drei sangka labik glai kayau praong yaok hecta di dalam ban Đồng Xoài piah pacang khik alam langik. Rahra bhum palei iek praong ieu ong meng angan anit ranam “Urang krah bijak khik glai”.

Bahrau di ini, tuk karja bhum palei jak ba daong brei taneh padang jalan Hải Thượng Lãn Ông, oh hu ha sit rabha hatai, ong halan tian alin hadiah labaih 2.000m² "taneh riya ameh" di baoh sang drei piah ngak jalan. Klah rabha hatai brei ka bruk ini, ong Thùng ndom meyai lac:

“Dahlak hulin mboh taneh ia nagar saron mbon blaoh hatai biak bui sambai saong caong khin rik daong peih jalan ka palei pala, peih jalan ka xa phuong. Dahlak caong khin jalan ngak ini tapa thun hadei hu salah blaoh, kayua hu 2km. Labik daok padang ngak, gam haong UB Bhap bini phuong kham merat, ngak aval drah piah ka rahra mboh saong sahnang hatai.”

Oh lac sa janih ba drei ngak dahlau, urang bol lin meng dahlau daok nao tal yaok baoh sang, gaok yaok urang piah jak ba mikva gam gauk jum tangin. Meng bruk langyah siam lagaih di ong Thùng, pambuak haong jalan tacei ba di karja, ngak jeng riyak sa hatai hu pambak tabiak khang catang. Tal ini, hu jeng jalan atah 1,9km, praong tal 28m.

Ong Bùi Xuân Linh, Phaok Akaok UB Bhap bini phuong Đồng Xoài brei thau, jalan Hải Thượng Lãn Ông hadei di tuk salah blaoh oh lac sa janih ngak salah majam ha tang, pambuak tapak dom labik daok rahra haong jalan Quoc lo 14 blaoh daok jhul tagok ka bruk pablei salih pambuak bhum, patagok khang catang gah pablei salih – jitvu saong pasiam ban medin gheih ghang hacih sa-at. Bruk halan tian, ba drei ngak dahlau di urang krah bijak Dương Đức Thùng lac sa kareih hadah krah ngak jeng riyak sa hatai praong dalam bhap bini rahra.

“Bruk rahra alin taneh ngak jalan hu pambak tabiak hatai thau ka bruk di Karja saong rahra dalam bruk padang ban raya medin. Meng bruk sa hatai di rahra dalam jalan ini brei hu pambak tabiak, jeng sa bruk naih gheih ka dom danak dak patui veik dalam bruk jak ba rahra alin hidiah taneh ngak jalan. Piah dom jalan meda hu ngak samar, malam mai ye kein lagaih ka rahra, bhum palei”.

Tui baoh kadha “hadiuk lac brei nao” di Urang bijak angan Dương Đức Thùng urak ini jeng kadha bac siam gheih ka rairah sit thun umo di bhum palei. Phạm Nguyễn Minh Trinh, Bi thu Ndoan phuong Đồng Xoài brei thau:

“Dalam tukvak mai meng anak daok tal asal dalak, jeng yau dom ayut dam dara brei jhul khang bruk salih lek taka so, daong rahra dalam bruk peih gak dom harak gal karja. Dalam tukvak mai meng anak tal, hu jalan bilan pandiak he taka so, tapa jalan ngak nan, Kapul dam dara brei hu dom bruk daong mikva rahra ngak harak gal karja samar drah jang, njauk lagaih jang.”

Sa urang bijak bangsa Nung jeng daok gandi gandang buh prein ka raidiuk meng baoh hatai hadah siam gheih di abih. Rai daok dam di ong pacang khik taneh ia negar, tuk salamat sron mbon ye ong khik glai saong peih jalan ka rahra. Raidiuk di Urang krah bijak Dương Đức Thùng lac sa kadha adaoh gheih, kakei ka rairah harei ini ka yaom kaom ka bruk halan tian saong hatai anit ranam taneh ia neger siam makre gheih ghang./.