Urak ini, Viet Nam hu 2 baoh darak jaik yau sa drei brei ka darak pasar online, mek labaih 90% banah darak pasar, nan ieu lac Shoppee saong Tiktok. Thun 2025, dom gah ngak mbang pablei salih hu mbaok tame saong jien pablei ndap nda kaya kan di angaok dom darak pasar online tagok 30%, jien pablei kaya di dom darak ini jeng tagok labaih 30%.

Ong Lư Nguyễn Xuân Vũ – Pan akaok Tong yam ndok Kongti Co phan Kapul Xuân Nguyên brei thau, jien mek tame meng bruk pablei kaya di Shoppee mek labaih 30% taong abih jien mek tame di gah ngak mbang pablei salih.

Yaok bilan, Kong ty Xuân Nguyên pablei angaok darak ini hu yaok ribau harak kakei blei kaya ia hani dalkor, min tapi jaik yau oh hu laba. Kayua jien tame darak pasar gam haong jien papaok, yaih khan,… tagok tal jaik 40%. Min tapi gah ngak mbang pablei salih urak ini jeng daok njauk hatai kayua oh hu bruk palih ruah halei karei. Ong Lư Nguyễn Xuân Vũ ba panuac likau, jabat karja brei kein lagaih patagok rilo darak pasar online kayua urang Viet Nam dui ba, pasang iek saong hu bruk pasang iek di jabat karja ka dom tanut jien bayar ka darak pasar, jitvu…

“Dahlak hulin pok panuac likau brei ka do bhum palei meda padang darak pasar online, khan tal lac dom mentri, dom gah jeng padang darak ini. Langiu di nan, dom gah ngak mbang pablei salih praong (hu phun jien karja-PV) meda padang majam darak pasar praong yau ye: SaiGon Co.op, Satra… padang darak pasar online. Ini hu maong yau darak bahrau daong gah ngak mbang pablei salih ngak tabiak meda ba kaya nao tal urang blei pandar haong dom tuai damuai blei kaya angaok darak pasar online”.

Dang di urang jru ilamo, ong Nguyễn Quách Nhi, urang gah pablei salih online, Yam ndok gah Pambuak bruk di Kongti Co phan METUB Viet Nam, langyah brei thau lac: Gah ngak mbang pablei salih bayar labaih 30% ka darak pablei kaya jak jeng. Min piah pablei hu kaya ye gah pablei salih brei bayar rilo jien karei yau ye: yaih khan, ba tal tangin, pambuak… Kayua yau nan ye karja brei hu sarak pacang khik bruk gak tabiak dalam negar anak bruk patagok khang kajap di darak pasar online:

“Pagap yau ye darak nagar Indonesia ye Rajaei di nyu biak khang kajap pacang khik gah ngak mbang pablei salih gap mbiah saong sit. Dom urang nan pandar dom darak pablei salih ndien tu saong dom darak taka so njauk brei patakik tagok jien tame darak biak glaong ngak brei khat lahik tal gah ngak mbang pablei salih dalam negar. Nyu pasang iek di darak pasar maong yau lac jien tame darak karei blaoh karja brei palagaih.”.

Urak ini, gah ngak mbang pablei salih pablei ndap nda kaya di darak pasar online daok njauk kateik geik, langiu jien tame darak hu yaom biak glaong ye jitvu logistics di dom darak jeng pan ta-eng sadrei, gah ngak mbang pablei salih oh hu palih ruah jitvu gah langiu yaom lac buh jien tabiak biar jang. Kayua dom jien tame darak biak glaong nan rilo gah ngak mbang pablei salih brei thau hu harei dom urang nan pablei di angaok darak pablei salih labaih 2.000 harak kakei blei, min oh hu kein laba, gaok mai dak pablei dak lahik jien. Langiu di bruk mek jien tame darak glaong, darak daok pandar gah ngak mbang pablei salih bhian brei kein lagaih piah patrun yaom pablei. Amuk Vũ Kim Hạnh- Akaok Kapul gah ngak mbang Kaya Viet Nam asar siam brei panuac ndom meyai lac:

“Karja njauk brei adat tanut glaong di abih ka jien jitvu, jien kein laba saong pandar dom tanut pablei salih online brei ngak tantu katih gai di nyu. Gam haong nan, brei pandar dom darak oh hu pakauk gah ngak mbang pablei salih palih ruah dom jitvu logistics pajeng ba, papaok… di gah langiu, oh lac độc quyền di dom urang nan.”

Urak ini, bruk blei pandar salih nan gah ngak mbang pablei salih brei salih bruk pablei ndap nda kaya kan, min, piah ka gah ngak mbang pablei salih ngak tabiak “ta-eng drei luai ngak” di “mblang danao” ini ye biak kan tuk darak pablei salih online rilo meng lac gah ngak mbang pablei salih di negar langiu. Darak pasar daok pan “iku” nan ta-eng drei brei tagok yaom meng di halei, tanut halei atau ba tabiak dom sarak biak oh lagaih saong gah ngak mbang pablei salih brei njauk tui hatai meyah oh khin jhul tabiak “mblang me-in” ini./.