Ong Thạch Nhứt menek di thun 1951 dalam sa baoh sang urang ngak nong Khmer Kathaot di bhum palei di tinh vinh Long. Gam saong dom bruk rik daong dalam jalan ngak bruk, thun 1981 ong hadah mbaok meta hu tame Ndang. Nan oh lac hatai hadah mbaok meta di ong blaoh daok lac bruk bui sambai di baoh sang saong bangsa Khmer di bhum palei. Labaih 40 thun daok dalam Ndang lac 40 thun ong khik kajap ilamo di urang ndang, tuk halei jeng ba drei ngak dahlau, naih gheih dalam grauk abih danak dak di bhum palei. Thun 2021, ong hu jao alin Huy hieu 40 thun daok dalam Ndang – kaya alin hidiah hu makna praong dalam taduan ka sa jalan buh abuh hatai jai tung tian karo kajap, thau ka bruk di drei saong bak hatai tian.

Hadei di tuk padeih ngak bruk karja di thun 2012, ong Thạch Nhứt jeng oh ruah rai diuk lahei tukvak masa ka drei blaoh patui daong bhum palei dalam dom danak dak bruk ngak rahra. Tui rup ong, urang jakar yaom lac padeih ngak bruk jeng daok hu bruk haong palei gam saong mikva palei pala. Jalan sahaneng nan hu daong brei ka ong tuk halei jeng hu angan je saong sap ndom dalam bhap bini urang bangsa Khmer di bhum palei. Ong Lê Hoàng An, Akaok UB Bhap nini xa Ngãi Từ, tinh Vinh Long brei thau:

Bruk mboh njauk siam gheih di mik cei ini nan lac dom anek bik di gait thei thei jeng hu mbang bac tal labik tal adhua, jeng hu bac dai hoc ngak bruk dom jabat di karja di bhum palei. Baoh sang di Cei Nhứt lac naih gheih dalam yaok bruk ngak di bhum palei, padang baoh sang ilamo, pahacih sa-at labik dalam palei sang cei tuk halei jeng ba drei ngak dahlau.

Oh lac sa janih naih gheih dalam bruk rahra ong Thạch Nhứt daok ieu lac urang pasang, urang ame naih gheih dalam baoh sang. Dom harei bahrau khin kamei, raidiuk di diuk pasang mik cei biak kan kandah. Kinh te rilo meng lac pambak tame bruk ngak nong, jien mek tame oh karo, anek bik daok sit. Min meng hatai uak drei tagok, bruk tari taring ngak bruk saong hatai chreih mekre ngak mbang, diuk pasang ong dak harei dak uak drei tagok tani tanat dalam raidiuk.

Bruk ngak ka rilo urang iek praong ong Thạch Nhứt jang lac angan je di ong dalam bhap bini bangsa Khmer di bhum palei. Meng rilo thun pambuak pagam haong bruk ngak dalam rahra bhap bini, thau ka adat cambat saong tuk halei jeng daok dang tapak tung tian, thau ka bruk di drei nan ong hu mikva je tame, anit ranam. Ong Thạch Nhứt ndom lac:

Tuk hu raya adat praong hu rilo menuac urang dahlak hulin tuk halei jeng tagok ndom panuac pachrei kakei mikva acar Khmer ngak njauk jalan di Ndang saong hukum di karja. Kham merat ngak mbang patruh kathaot. Drei kathaot miat miat ye kan ka karja. Kayua kathaot ye karja brei daong, nan drei brei kham merat ngak mbang piah ka abih kathaot.

Di umo 75 thun, mbuk patih tui thun bilan min ong Thạch Nhứt jeng khik hu bruk kambuon kahnat gandi gandang, jaik taphia saong tuk halei jeng suhsah hatai saneng kuria brei ka bruk patagok di bhum palei. Ong brei thau, bruk ngak ka ong bui sambai abih hu lac raidiuk di mikva urang bangsa Khmer dak harei dak hu paglaong tagok, jalan mbak praong laneing lanoi kajap jang, anek kamuan hu bac megru ginup jang rilo dut saong meng dahlau. Ong caong khin dalam tukvak mai meng anak tal, dom bangsa, agama di bhum palei brei hu patui gul pataom, gam haong gauk pakacah ngak mbang, patagok kinh te baoh sang piah padang palei pala dak harei dak ginup meda, siam mekre./.