Ngan haong rilo urang ruak ung thu baoh than tukvak khu trú, dahlau diah, bruk neh klak ung thu baoh than sumu haong bruk cakak taong abih baoh than. Yaom lac daong taong ruak patruh ung thu, jalan ini jeng daok caik veik dom bruk mbuan ruai suai atah tuk urang ruak tok daok sa baoh than ngak bruk di nyu.

Meng bruk nan hu pachreih ka dom bac si Sang iek ruak Bình Dân duah sa jalan nao bahrau: pandar rilo abih bruk cakak bướu khik baoh than, daong taong ruak siam lagaih min jeng khik rilo abih baoh than ka urang ruak, tui bruk hadah krah di y khoa dunya. TS.BS Trang Võ Anh Vinh, Phaok akaok Jabat Jalan kuhria taong abih di Sang iek ruak Bình Dân brei thau, rilo jalan sahaneng roh duah hu mai meng dom asal kadha gaok bhian harei dalam bruk ngak lâm sàng. Urak ini Sang iek ruak Bình Dân hu labaih 10 kapul ngak ilamo ky thuat ini, daong rilo urang ruak khik hu baoh than, siam ruak drah:

“Bruk ngak ka dahlak chreih sabai abih lac dom bruk salih bahrau di drei hu bam ai kein lagaih ka urang ruak. Dahlau diah, dom ilamo ky thuat blac raih mbuan ngak ka urang ruak mbuan ma-ik oh pasang iek hu tuk hadei blac raih. Urak ini, rilo urang ruak tok hadei labaih 5 harei meda hu tabiak sang iek ruak saong aval drah pasang iek hu bruk me-ik. Dom tuk yau nan, dahlak hulin mboh biak bui, oh khin taduan hu sa panuac mayaom halei veik”.

Tui TS.BS Giang Minh Nhật, Phaok akaok Jabat Pasiam prein baoh hatai – Sang iek ruak Rahra Gia Định, yaom kaom praong abih di roh duah oh daok di dom bruk pathau khan ilamo khoa hoc bo di bruk ngak tabiak co so du lieu saong jalan taong ruak njauk hu, daong patakik dom bruk ngak iek oh njauk hu, patakik jien buh tabiak taong ruak saong palagaih abih halau prein ngak y te:

“Tapa roh duah, khol dahlak hu thau kapul jru hoa tri karei gauk ye ngak kan kandah tal cơ baoh hatai bhian rah tabiak di tukvak taong ruak halei. Tuk brei thau urang ruak mbuan ruak trak, abih di nyu nan lac di tukvak akaok meti, khol dahlak hulin tui iek baoh hatai jaik jang piah dil samu pacang cakak meyah hu bruk oh bhian”.

Piah dom jalan sahaneng meng caneng urang ruak jeng dom danak dak roh duah hu yaom kaom, tui PGS.TS.BS Mai Phan Tường Anh, Phaok Yam ndok Sang iek ruak Rahra Gia Định, bruk hu makna abihoh lac hatai chreih takre di yaok bac si blaoh daok lac labik daong meng sang iek ruak. Dom thun jaik ini, sang iek ruak jhul khang bruk buh jien tame ka roh duah ilamo khoa hoc tapa Labik Roh duah lâm sàng – Salah bahrau hadah krah. Meng puac thun 2024 tal ini, labik hu daong pathau khan 59 kadha harak mbao dunya, peih ngak rilo kadha saong ngak iek lâm sàng, daong ngak jeng labik piah dom urang bac si tui roh duah saong salih bahrau hadah krah. PGS.TS.BS Tường Anh ndom meyai lac:

“Sang iek ruak Rahra Gia Định lac bruk di sang iek ruak – sang bac nan klau gang jamang dalam nan hu taong ruak, roh duah ilamo khoa hoc saong pato tuk halei jeng nao taphia haong gauk. Asar siam di dom mbang nyaom biai ilamo khoa hoc jeng brei mboh tapak prein roh duah di sang iek ruak. Tuk bruk roh duah hu khik tani tanat bhian, asar siam dom danak dak hu paglaong, hu urang ngak bruk dalam saong langiu negar raok taduan di dom bruk ilamo khoa hoc”.

Sarak 57 di Mentri Rajaei ka bruk patagok samar ilamo khoa hoc, kong nghe, salih bahrau hadah krah saong salih lek taka so pakat negar hu daong prein saong kein lagaih piah ka dom sang iek ruak jhul khang ilamo khoa hoc kong nghe, salih bahrau saong salih taka so. Taphia di nan, bruk hu makna lac padang ilamo roh duah, labik sa bac si oh lac taong ruak blaoh daok oh padeih duah panuac langyah ka dom asal kadha rah tabiak meng bruk taong ruak./.