Dalam baoh sang kayau pabung kiak klak ban sambo bar tui tukvak, Urang hu angan Nghe nhan H’Brơi dan dan ba ayun dai ru taco meng kadha adaoh bhap bini Bunong bhian randap. Di dom ganing kayau lac dom harak meyaom hu khik ramik tapa rilo rai rah yau brei mboh ka bruk patui veik di sa baoh sang meda bruk ngak kat mang. Menek tabiak saong praong tagok dalam sap caing di ame, sap adaoh bhap bini di amaik, hatai anit ranam ilamo Bunong hu nao tame amuk meng daok sit. Nghe nhan H’Brơi brei thau:

“Dahlak hulin thau saong ndom dom kadha adaoh bhap bini ini meng sit. Meng dahlau diah, yaok mbang mbon palei hu raya, dahlak hulin bhian tui amaik nao adaoh. Daok di sang ye pang amaik adaoh ru anek, ru taco nan rah rah mbang tame rup drei tuk halei jeng oh thau. Bac pasram adaoh bhap bini jeng oh biak kan, hu makna lac ciuk pang, kanal hadar blaoh pasram adaoh tui…”

Tui urang bangsa M’nong, kadha adaoh bhap bini oh lac kadha adaoh yau bhian blaoh daok khik hu sajarah, adat cambat saong adat daok dang di bhap bini. Meng dom kadha adaoh ru, adaoh dam dara tal kadha adaoh akayat, taong abih jeng payua panuac pato di mukkei ka hatai anit ranam, bruk gul pataom saong hatai thau ka bruk ngak. Nghe nhan H'Brơi payua anit ranam kadha adaoh bhap bini ka rai rah patui hadei di nyu.

Praong tagok dalam sap adaoh di amaik, sa-ai kamei H'Như, anek kamei di amuk H'Brơi ndam gam saong dom danak dak ilamo bhap bini di mbon palei. Urak ini, sa-ai lac Akaok kapul tamia bhap bini Bunong di xa Nâm Nung, tinh Lam Dong. Sa-ai H'Như brei thau:

“Meng di daok sit akau dahlak hulin hu tui amaik nao pasram adaoh, pasram tamia gam haong mik nai mik cei dalam kapul ilamo bhap bini di xa. Amaik lac akaok kapul nan dahlak hulin bhian hu adaoh dom kadha adaoh bhap bini, dom ragam tamia bhap bini saong rah rah jeng bruk chreih takre haong kadha adaoh bhap bini saong ragam tamia M’nong di drei.”

Yaaok dom mbang harei raya adat atau raya adaoh tamia ilamo bhap bini, thaik thaot dua anek amaik amuk H'Brơi gam parang iek hu ieik yau ye bruk bhian randap. Dalam sap kong caing sameng tagok dalam mbon palei, amaik adaoh dom kadha adaoh bhap bini biak bangi pang, tame tung tian. Urang anek kamei hlai tui meng dom ragam tamia gheih ghang, siam mekre.

Dom thun jaik di ini, kapul adaoh tamia bhap bini xa Nâm Nung hu mbaok tame rilo mbang adaoh tamia, pambuak me-in ilamo dalam saong langiu negar saong mek hu bruk pok meyaom glaong. Blaoh amuk H'Brơi, sa-ai H’Như daok patui brei apui chreih takre ilamo bhap bini M’nong nao tal rai rah sot thun umo. Amuk H'Thương Knul, Phaok Akaok Mbang Ilamo – Rahra, HĐ Bhap bini xa Nâm Nung, tinh Lam Dong ndom meyai lac:

"Amuk H'Brơi urak ini lac akaok kapul kong caing – adaoh bhap bini, daok anek kamei amuk dang dui ba kapul tamia bhap bini. Dalam rilo thun tapa, dua anek amaik hu chreih chrai hu mbaok tame khik ramik saong pato ilamo bhap bini ka rai rah sit thun umo. Dalam dom thun tapa, kapul urang nghe nhan ilamo bhap bini kayua Nghe nhan H'Brơi ba kapul hu mbaok di rilo raya, mbang adaoh tamia dalam saong langiu tinh saong mek hu rilo hadiah pok meyaom…"

Meng baoh sang sit di mbon palei Ja Rah, urang Nghe nhan angan H’Brơi daok kham merat patui bruk di baoh sang gam saong dom bruk hu lagaih ka mbon palei. Meyah rai rah mukkei rik prein ka kat mang ye rai rah urak ini drei daok rik daong patagok ilamo bangsa. Meng sap adaoh dai ru di amuk, panuac kadha adaoh bhap bini di amaik tal dom ragam tamia di anek kumei, gok agha ilamo M’nong jeng daok karo kajap nduac tapa dom rai rah, piah ka sap caing, sap adaoh miat miat hu sameng tagok di kreh mbon palei harei ini./.