Dalam baoh sang sit di ala takai ceik palei Tà Điệk, xa Vĩnh Thạnh, tinh Gia Lai, ong Yang Danh jeng daok tataoh paban compute yaok harei. Ong tari taring vak cih ka ilamo bangsa BaNa. Takik thei thau lac, jalan ba ong nao tal harei ini hu ngak meng tuk bahrau umo 13 thun, tuk urang likei Yang Danh gam haong rilo anek saih dom tinh Tay Nguyen truh tapa talei ceik Truong Sơn tabiak bhum Barak bac megru saong hu gaok Wa Ho. Ong Yang Danh hadar hadar blaoh khan brei thau lac:

“Wa Ho Chi Minh sua tangi dahlak hulin lac kamuan bangsa hagait? Dahlak hulin javap calei lac bangsa BaNa, blaoh Wa sua tangi hu anek kamuan hagait haong anh hung Núp lei? Blaoh Wa sua tangi dom kamuan huak hu trei lei, ngui cuk hu sir lei, huak hu bangi lei. Blaoh Wa pachreih kakei lac dom kamuan lac dom pajaih bhong meraih di bhum Meraong, di Trường Sơn Tay Nguyen, dom kamuan daok di langiu ini brei kham merat, bac megru ka krah joi piah hadei ini negar yasa dom kamuan tame Meraong negar padang veik taneh ia negar drei”.

Dom panuac pato kakei di Wa Ho hu pachreih urang anek saih bangsa BaNa oh padeih bruk bac megru, pasram pahat. Thun 1969, hadei di tuk salah blaoh danak dak bac pho thong, Yang Danh ruah bruk ngak harak mbao saong ngak bruk di Rayo Sap ndom Viet Nam di Ha Noi. Tal thun 1975, ong patui bac di Khoa Mbao chi, Sang bac Tuyên huấn Trung uong, blaoh jeng urang ngak harak Bao Gia Lai – Kon Tum. Jeng yau dom mbang nao ngak bruk di labik, mbang daok haong mikva, ong meng mboh lac rilo ilamo siam gheih bhap bini bangsa BaNa daok njauk brei khik ramik. Ong Yang Danh brei thau lac:

“Luac jalan bac magru mek hu dom bruk siam gheih ngak ka asal drei dom sahaneng, dom bruk ngak saong bruk ndom puac njauk lagaih jang. Nao ngak jeng daong mikva chai padai, garaoh hareik, malam manyum tapai caik tal lavik malam blaoh dahlak hulin jeng hu vak gilac abih. Dom adat cambat dahlak hulin jeng vak abih ka dom sang rông, kong caing, adat klauk kabao piah hadei ini dom urang puac, thun ini dahlak hulin umo 80 thun min jeng daok tataoh akhar huroh di compute”.

Lac bruk di sa urang ngak harak mbao chi hu daong ka ong jeng urang pataom khik ilamo bhap bini bangsa, oh ka tuk halei atah di bruk khik ramik ilamo bangsa. Ong hu patabiak 10 kadha roh duah, pataom khik, lang sap ka ilamo BaNa, yau ye: Alak tapai, kaya mbang, apuh, adat klauk kabao, dom ariya… saong rilo danak dak hu bam ai ka ong yai glaong abih di Kapul Van nghe bhap bini Viet Nam. Tui ong Tấn Thành, Bi thu Ndang uy xa Vĩnh Thịnh, tinh Gia Lai, prein ngak praong abih di nghe nhan Yang Danh lac sa urang hu angan khik ramik ilamo bangsa BaNa:

“Ong khik ilamo saong akhar huroh saong hu likau pato akhar huroh bangsa BaNa brei ka urang jakar ngak bruk di dom mbang dom gah. Nan lac sa dalam dom prein ngak di ong Yang Danh, sa urang tuk halei jeng suh sah ka bruk khik jiva ilamo. Lac tuk neh xa mai tal di ini ye dom raya adat di dom bhum palei jeng da-a ong piah rik daong ka bhum palei piah khik ramik ilamo siam gheh di urang BaNa dalam bhum Giarai”:

Oh lac dom urang ngak bruk ilamo, rilo rai rah urang jakar papar sap di bhum palei jeng thau tal angan Yang Danh tapa dom kadha vak mbuan mbiah bo praong dalam. Tui amuk Đinh Thị Nớt, Phaok Bi thu Ndang uy xa Vĩnh Thịnh, tinh Gia Lai, dalam dom kadha di Yang Danh, ilamo – raidiuk di urang bangsa BaNa rah tabiak mbuan mbiah, jaik taphia.

“Nghe nhan Yang Danh rilo meng lac cih vak ka adat cambat. Page papar meng tuk 5 tal tuk 5 meteh, hadei di nan patui bruk papar rayo tinh. Kadha di wa nan vak yau ndom mayai biasa, khan kadha biak mbuan mbiah, jaik taphia”.

Luac jalan labaih meteh abap pagam haong ilamo bangsa di Nghe nhan Uu tu angan Yang Danh oh lac daong hu makna tame bruk khik ramik, patagok ilamo bangsa, blaoh daok truac hadah apui halan tian, jeng lac sa kreih camin hadah ka bruk ngak dalam rahra saong hatai anit ranam taneh ia palei negar./.