Luac labaih 1 thun blaoh tapa, sa-ai Ja Si Môn, Bi thu Chi bo Palei Ha Wai, xa Đơn Dương, tinh Lam Dong tuk halei jeng jal val haong bruk ngak. Dahlau tuk ngak bruk pagam tinh, klak pakat huyen saong pagam xa, mikva bangsa Cru di huyen Đơn Dương klak jeng hu rilo that tian. Di dahlau harei pahadar 1 thun ngak bruk karja palei 2 pakat, Bi thu Chi bo Ja Si Môn gilac paglaong bruk di drei dalam bruk pathau khan, jak ba rahra ngak tui jalan ramik dak, pagam 3 palei: Ha Wai, Ma Đanh saong Thôn Mới hu taong abih 1.026 baoh sang rahra:

“Asal kadha bruk pagam palei dalam tukvak mek panuac ndom mayai di mikva Rahra, mikva Rahra biak njauk hatai, biak buh abih hatai tian. Mikva hu mbaok tame abih drei, daong prein abih dom jalan di Karja dalam tukvak anak tal palei brei dak harei dak patagok jang veik”.

Tinh Lam Dong urak ini hu 49 bangsa. Taong abih dalam tinh hu 883 urang hu angan je jeng ye hu rahra jie tame saong anit raanam, iek praong saong lac labik pambak ka hatai karo kajap di bhap bini. Tukvak tapa bruk di taha palei, urang hu angan je di Lam Dong dak harei dak brei mboh cambaih laih tuk dom urang nan lac urang ba drei ngak dahlau dalam bruk pagam labik hanh chinh, pandar ilamo khoa hoc ky thuat tame bruk ngak nong, khik ramik adat cambat, ilamo bhap bini, khik ramik an ninh siam mekre di labik, padang bruk gul pataom taong abih bangsa dalam negar.

Sa-ai Ban Niêng Ha Dang, bangsa K’Ho dhan kapul Lạch, phuong Lang Biang – Da Lat, brei thau, meng hu dom taha palei pato tacei rahra sangka patagok kinh te baoh sang, palei dak harei dak sron mbon:

“Brei ka gah an ninh siam mekre dalam bhum palei, bruk di taha palei lac biak hu makna. Urang Taha palei di ini lac urang biak hu angan makna pato megru ka dam dara, blaoh mbon palei khik ramik an ninh siam mekre, njauk ndom tal lac bruk srau kadau yau kanjah jhak dalam rahra, peih nduac radaih samar kacah gauk, pataom gauk menyum alak mbie tapa malam, co klaik. Taha palei lac tatua pambuak haong kapul an ninh Phuong gam haong gauk khik ramik siam mekre karo kajap di labik bhum palei”.

Daok di kreh bhap bini, thau ka that tian caong takre, caong khin di yaok rahra, dom taha palei, urang hu angan je di tinh Lam Dong lac tatua pambuak kajap bruk di Ndang saong hatai di rahra. Amuk Cil Bri, Phaok Yam ndok So Bangsa saong ugama tinh Lam Dong, brei thau, thau pang panuac ndom mayai di dom urang taha palei, urang hu angan je, labik hu mbaok pathau khan ndom meyai ka tinh peih tabiak rilo danak dak brei ka bruk patagok kinh te – xa hoi, khik ramik saong patagok ilamo bhap bini njauk saong siam lagaih. Jeng mai meng dom panuac ndom meng dalam hatai di dom taha palei, urang hu angan je patui veik brei caik dahlau bruk buh jien tame ngak ka bhum atah bayah saong bhum urang bangsa takik piah paglaong raidiuk ka rahra, pasamu gauk ka bruk patagok:

“Dalam tukvak masa meng thun 2026-2030 tinh Lam Dong patui bruk brei caik dahlau bruk buh jien tame ka bhum urang bangsa takik saong bhum ceik tui jalan pataom tame pasak, hu makna, mek rahra ngak pasak saong jalan ngak paglaong asar siam raidiuk lac bruk dut pagap siam lagaih. Hu makna jang veik lac brei kein lagaih piah mikva dom bangsa takik paglaong prein ngak, hu mbaok tame dalam jang tame luac jalan patagok di dalam tinh”.

Di dom salih bahrau khang kajap di Lam Dong harei ini, urang taha palei, urang hu angan je jeng yau ye dom mbaik “gang hadiuk” dalam mbon palei, lac labik pambak hatai di dom bangsa. Meng angan je, ilamo saong bruk ngak ka bhap bini, dom urang nan lac yau ye baoh tatua pambuak bruk di Ndang saong hatai di rahra daong ba jalan di Ndang, sarak di Karja nao tame raidiuk, pabak bruk gul pataom taong abih bangsa dalam negar, khik ramik ilamo bangsa saong padang mbon palei dak harei dak patagok./.