Di xa Thạnh An – sa labik daok rilo kan kandah ka kein lagaih nao mai, danak dak pasang iek oh mek jien hu ba mai jitvu y te nao tal jaik jang haong rahra. Oh njauk brei nao mai atah dhua, oh njauk brei cang suai, rahra hu pandar tapak haong kapul bac si meng sang iek ruak angaok. Bruk ba drei tame ngak ka rilo menuac urang katuak saong njauk hatai. Sa-ai Đỗ Thị Ngọc Duyên brei thau hadei tuk ba amaik ame nao pasang iek ruak:

“Dahlak hulin biak njauk hatai tuk hu dom bac si gah pakat angaok mai tak ini pasang iek ruak ka rahra di xa. Biak lagaih, thau dhar phol dom bac si. Bhian ye dahlak hulin nao pasang iek prein yava lac tame huyen, kan kandah abih lac bruk nao mai"

Meng dom bruk cambaih laih yau ye di Thạnh An, Ban raya Ho Chi Minh daok peih praong jeng sa danak dak praong dalam bhum. Tui jalan ngak di Ban uy, dalam thun ini, taong abih rahra brei hu pasang iek ruak, pasang prein yava takik abih sa mbang. Meng dom sang iek ruak puac abih tal balai y te di labik, sa majam sangka prein yava daok dak harei dak ngak jeng, tui jalan ngak oh luai ka rahra njauk klak gilac gah likuk. Min tuk prein yava hu khik kajap, ban raya patui veik ba tabiak sa kadha tangi glaong jang: rahra hu biak mboh haniem phol halei oh?

Di phuong Thủ Đức, sa bruk bahrau hu peih ngak piah javap calei kadha tangi ini. Salih ka bruk dut pagap meng dom tanut kinh te – xa hoi, karja tame bruk pasang duah tapak bruk maong mboh di rahra ka raidiuk yaok harei.

Amuk Trần Thị Hồng Thúy, Phaok Akaok phuong Thu Duc brei thau, bruk padang asal kadha “phuong haniem phol selamat” oh ngak tabiak dom lek taka gheih, bo piah ka karja maong gilac drei:

"Biak nao, dalam dom harak phieu pasang iek jeng daok dom asal kadha rahra oh ka njauk hatai ka ha tang, labik, jalan mbak, labik me-in bhap bini… Dom bruk daong panuac ndom nan daong karja hu maong mboh jang ka asar siam duh bruk saong hu jalan langyah cambaih laih. Khol dahlak mboh lac bruk ini brei mboh njauk bruk daok rah tabiak, yaom lac bruk ini oh ka glaong, jeng daok hu yaom glaong jang dut haong dom taka so gheih min oh brei mboh njauk bruk maong mboh di rahra."

Meng bruk kuhria hu, bhum palei hu brei mboh cambaih laih dom asal kadha brei caik dahlau piah pasiam, meng ha tang, alam langik tal asar siam jitvu karja. Di gah bhap bini ye, sa-ai Nguyễn Thị Minh Phương, Akaok Khu pho 39 ndom lac, dom salih bahrau di dom tukvak tapa hu ba mai rilo salih bahrau hu mboh cambaih laih dalam raidiuk rahra, meng ha tang tal bruk daok dang mbang ngui. Blaoh bruk hu yaom glaong abih, tui sa-ai Phuong, lac bruk salih dalam bruk karja pang saong taduan panuac di rahra.

“Bruk hu yaom glaong abih lac yau ye hadei di tuk rahra roh duah blaoh ye daok da-a khol dahlak hulin ndom mayai that tian. Hu mik nai mik cei ndom mayai lac karja thau pang panuac ndom di rahra lac biak bui sambai, tapa di nan dak harei dak pasiam saong caong maong karja sangka buh jien tame ngak jang piah Thu Duc hacih hijao gheih ghang, anek kamuan hu raidiuk siam jang.”

Thun 2026 – pahadar 50 thun Ban raya Ho Chi Minh mek angan Chu tich Ho Chi Minh, oh lac sa sa janih piah maong dom jalan tapa, blaoh daok lac tukvak ban raya ta-eng ba tabiak dom tanut chuan patagok glaong jang. Tuk rahra mboh khang kajap jang, sahnang hatai jang, haniem phol jang dalam raidiuk di drei, nan jeng lac tuk dom yaom kaom di sa ban medin njauk diukrai hu mboh cambaih laih di abih./.