Kapul urang dam dara daok dalam Sang bac Dai hoc Khoa hoc Tu nhien (Dai hoc Negar Ban raya Ho Chi Minh) kayua sa-ai Lê Văn Cường ba akaok, cuh galau nyang pok tagok paban duh paling di labik roh duah di Bein bangu Lê Thị Riêng.

Dalam bruk praong prang yau nan, sa-ai Cường drut druai brei mboh hatai anit ranam gam saong rairah nao dahlau, njauk haong adat “Menyum ia hadar tal halau”. Sa-ai brei thau, kapul roh duah di drei hu tui jaik bruk roh duah meng dom harei akaok meti meng jalan pandar mata radar brei ka bruk roh duah.

Meng bruk roh duah hu, kapul roh duah langyah saong tacei tabiak dom labik hu bruk pambuak tal atau talang bol lin. Tui sa-ai Cường, oh lac hu makna ka gah ilamo khoa hoc, bruk di kapul daok lac bruk brei mboh cambaih laih ka bruk saong hatai di rairah jaman hadei brei ka urang bol lin krah bijak:

“Kapul biak drut druai tuk jabat thau bruk roh duah mboh hu labik ndih di bol lin krah bijak. Kapul dahlak hulin caong khin bruk dut pagap hu njauk, dom bruk ngak hu siam pambuak tal caong khin di grauk urang”.

Rilo harei jaik ini, amuk Lê Thị Xuân Hương (urang di phuong Nhiêu Lộc, daok di Quan 3 klak) harei halei jeng vaih mai Bein bangu Lê Thị Riêng piah ba ahar mi, ia menyum, pabak prein ka kapul roh duah atau klang.

Oh padauk hu bruk drut druai, amuk Hương brei thau mbang roh duah, pataom atau talang di ini hu rahra Ban raya Ho Chi Minh biak sangka. Amuk brei thau, asal drei lac anek taco Wa Ho, nan bruk daong prein saong pahadar tal dom rairah bol lin hu ngak bruk saong adat ngak phol dhar meng ribau thun mai.

Kayua yau nan ye, bruk daong ha sit prein yava ka kapul jabat chuc nang ngak ka mikva mboh biak la-I la-an tung tian hatai jai. Caong khin praong abih di amuk lac lakau dom urang jaleih trun ka taneh ia negar hu aval drah gilac mai haong baoh sang, palei negar:

“Caong khin taong abih dom bol lin hu mai sang danaok di drei, dom thun ini mai duh ka taneh ia negar blaoh urak ini daok ndih trun yau nan biak pandik pandua. Khin urang hu kubo siam gheih”.

Cuh galau nyang anak patau pahadar di Bein bangu Lê Thị Riêng, ong Trần Văn Thông (daok di phuong Bảy Hiền, daok di quan Tân Bình klak) mboh biak drut druai tuk bau tal bruk cakac duah, pataom atau talang di ini.

Tui ong, dom harei tapa, khau tin duah mboh atau talang di dom bol lin pamedeih hatai mboh drut druai praong dalam hatai rahra bhap bini. Kayua dom bol lin hu ndih gilac di labik ini tukvak biak suai, jaik 60 thun.

Mbang roh duah ini hu ngak praong saong bruk buh prein biak praong, brei mboh bruk sangka praong dalam brei ka bruk bayar phol dhar di Ndang saong Karja. Ong Thông brei mboh hatai je ka bruk siam gheih hadei mbang pataom ngak ini:

“Dahlak hulin tadhau ayuh dom kapul ngak bruk di Bein bangu Lê Thị Riêng rilo prein yava, piah ngak habar khol drei hu bruk langiu di caong khin, tui yau jalan di Trung uong”.

Adat “Menyum ia hadar tal halau” hu pambak praong dalam tapa bruk roh duah, payaom atau talang bol lin di Bein bangu Lê Thị Riêng. Dom rahra Ban raya Ho Chi Minh tuk halei jeng tui iek yaok khao tin, caong khin gilac mai haong baoh sang, ndih padeih padei di dalam ala hatian taneh amaik./.