Tui jalan rahra dang akaok saong thau ka bruk ngak wajip di drei, rilo panuac ndom mayai di urang jakar, nghe si, gru pato, po acar urang Khmer ngan haong hatai caong hu dom sarak, jalan ngak dalam Danak dak kuhria iek brei patui veik nao tame raidiuk, ba mai bruk salih bahrau lagaih ka bhum urang bangsa takik.

Di bhum taneran kraong Cuu Long, labik hu labaih 400 baoh sang baha Khmer saong rilo urang nghe nhan, nghe si daok kham merat khik ramik ilamo bangsa. Ong Thạch Thiệu, Phaok akaok Kapul seni Nghe thuat taong abih Khmer – Sang adaoh Cao Văn Lầu, tinh Ca Mau brei thau, ong biak takre haong jalan ngak patagok ilamo saong urang menuac dalam Danak dak kuhria iek, min jeng daok rilo suh sah hatai.

“Danak dak kuhria iek Pathau khan politik mbang ini hu ndom cambaih laih bruk sangka ka urang nghe si saong urang ngak bruk ilamo. Min, biak nao dalam raidiuk di nghe si urang Khmer daok rilo kan kandah. Caong ka Ndang, Karja hu sarak daong cambaih laih jang piah adei sa-ai sahnang hatai hadah krah, buh abih hatai tian ka ilamo bangsa”.

Kapul Nghe thuat taong abih Khmer – Sang adaoh Cao Văn Lầu lac sa di dalam dom labik daong khik ramik saong pambak dom yaom kaom nghe thuat bhap bini di bangsa Khmer. Min piah khik ramik saong patagok hu drap ar nan, kapul nghe si urang ma-in brei hu sangka jang ka kein lagaih paneh atau raidiuk. Danak dak kuhria iek Pathau khan politik Nyaom roya XIV jeng hu ndom cambaih laih: “Sangka ka kapul urang nghe si, caik dahlau patagok dom labik pato pakai ilamo, nghe thuat; hu sarak daong dom banah kadha nghe thuat bhap bini”. Dom jalan ini brei daong prein piah ilamo bangsa Khmer patui veik naih gheih dalam raidiuk jaman bahrau.

Meyah ilamo lac binguk yava di bangsa, ye baoh sang baha lac labik khik ramik binguk yava nan dalam raidiuk di urang bangsa Khmer. Sang baha oh lac labik sa janih ngak adat, blaoh nyu daok ieu lac labik ilmao, pato megru karei di urang bangsa Khmer, labik khik ramik sap ndom, akhar huroh, adat saong nghe thuat bhap bini bangsa.

Di xa Tịnh Biên, tinh An Giang, Sang baha Krăng Chay lac sa dalam dom bruk naih gheih dalam danak dak pato akhar huroh Khmer brei ka dam dara, peih raya adat, khik ramik ilamo bangsa. Po Gru Đại đức Chau Sa Rươl, po gru di sang baha, brei mboh bruk samu gauk glaong ngan haong jalan patagok ilamo dalam Danak dak kuhria iek Pathau khan politik, gam haong nan payua dom panuac ndom mayai pok tagok angaok.

“Mikva bangsa Khmer biak bui sambai tuk mboh Ndang saong Karja sangka tal ilamo bangsa. Rilo baoh sang baha hu buh jien tame, pasiam praong laneing lanoi. Min, jeng daok dom baoh sang baha oh daok karo, ngak kan kandah tal bruk ngak ilamo, bac akhar huroh di mikva. Caong hu daong veik piah khik tani tanat siam jang”.

Oh lac gah ilamo nghe thuat, dalam Danak dak kuhria iek Pathau khan politik daok caik banah hu makna ka pato megru, hu maong yau “bruk brei ngak dahlau”, lac sa bruk patagok anek muac. Ngan haong mikva bangsa Khmer, pato megru lac bruk khik ramik sap bahsa, akhar huroh bangsa. Ong Lâm So Rone, Phaok Akaok Sang bac Kreh pakat Pali – Vinh Long ndom meyai lac:

 “Khaol dahlak biak njauk hatai gam saong jalan patagok pato megru taong abih dalam Danak dak kuhria iek. Min, urak ini di bhum mikva bangsa Khmer, bruk pato pakai gru pato sap Khmer jeng oh ka hu ginup. Caong ka Ndang, Karja hu sarak karei jang ka urang ngak, co so vat chat, daong anek kamuan bac megru siam saong khik hu sap bahsa saong adat cambat di bangsa drei”.

Tapa dom panuac ndom brei mboh bruk njauk hatai, je tame di mikva urang bangsa Khmer tame jalan di Ndang, gam haong nan brei mboh hatai caong khin khik ramik ilamo, paglaong pato megru, raidiuk dalam bhap bini bangsa takik./.