Yaok harei, yaok hadei 4 tuk page, di labik Tapen kraong Ninh Kiều (Ban raya Can Thơ), di angaok mbaok kraong ia chreih chrai jang tuk dom gilai pajeng ba tuai damuai jirah rivang darak di ia Cái Răng. Kuhria rah tapa yaok harei, labik Tapen kraong Ninh Kiều hu labaih 150 minit mbang gilai hu adat brei nduac angaok ia dalam bhum labik IV, oh ka kuhria tal yaok pluh gaiy patuh mac jamreih, gaiy di rahra ngak bruk. Rilo jalan tapa kraong Hậu tal pulao cồn Sơn saong dom labik jirah rivang bhian ciuk pambuak di riyak praong tuk langik oh lagaih. Kayua yau nan ye, bruk pasang iek kein lagaih siam makre dahlau tuk gilai tabiak lamnge lac bruk njauk ngak. Ong Trần Văn Minh, Yam ndok Lamnge Jalan angaok ia dalam bhum labik IV brei thau:

“Urang angaok gilai, urang peih gilai brei hu harak brei adat, hu ilamo, harak brei adat njauk lagaih haong kapal gilai ghe. Langiu di nan daok hu lac bruk pasang iek tuai damuai, brei ka taong abih tuai damuai jirah brei cuh ao phao dahlau paban rup tuk gilac trun ia kraong. 100% abih baoh gilai tabiak tapen ia trun kraong hu pasang iek ka bruk srap gap ginup kaya ndap nda daong menuac urang.” 

Di Vinh Long – bhum palei hu majam kraong ribaong rilo hu rilo jalan ia pasak yau ye kraong Tiền, kraong Hậu, Cổ Chiên, Hàm Luông, Măng Thít saong jalan gilai meng tasik tame kraong Hậu, mbuan rah tabiak bala kayua langik tasik atau gaok bala di angaok jalan ia tuk halei jeng daok mbuan si tamuh tabiak.

Urak ini dalam tinh hu 168 labik tapen taduan raok tuai damuai trun tagok kraong saong labaih 400 labik tapen ia dalam bhum. Ong Trương Quốc Phương, Phaok Yam ndok Pabah Jalan trun tagok ia kraong di dalam tinh Vinh Long brei thau: jabat chuc nang bhian pathau khan ka yaok rituh po gilai gaiy, po gilai saong rahra; gam haong nan paglaong bruk pandar, pajeng ba saong taong bhat catang dom bruk ngak chung.

“Khol dahlak hulin khik njauk inum taong bhat catang dom bruk ngak chung di dom baoh gilai, urang angaok gilai oh ngak tui dom adat ka bruk tut angan, tut angan pasang iek; oh hu harak brei adat, harak mbaoh tangin ka ilamo, pajeng biak rilo urang njauk tanut di nyu; menyum alak mbie tuk peih ba vah gilai.”

Tui Kapul pambuak Jirah rivang Bhum taneran kraong Cuu Long, Langiu di dom jabat chuc nang, jeng daok dom bruk oh lagaih dalam bruk jirah rivang di jalan ia. Oh takik tuai damuai urang jirah daok ngak tui hatai drei, pandar dom baoh ghe gilai oh karo oh siam brei ka bruk khik kajap salamat; dalam tuk dom po gilai tok srap gap ao ndon di ia piah gah pasang iek tapa ka hu, oh ka tacei ba pandar atau oh khik kajap hu ginup dom kaya daong saong asar siam di kaya daong.

Ong Nguyễn Văn Vũ, Yam ndok Kongti TNHH MTV Jirah rivang Nguyễn Vũ brei thau, hadei di rilo mbang njauk bala jalan ia, brei salih meng jalan sahaneng langyah bruk rah tabiak blaoh tapa bruk srap gap pacang caga dom bruk oh lagaih:

“Tuk hu angin praong ye kakei urang wah gaiy gilai njauk nduac tame ar pataok gilai. Di tuk nan, urang wah ghe gilai brei langyah, brei nao tui gah angin yuk atau nao cagar gah angin yuk, oh nao cakak gah angin yuk. Urang peih nduac ye khik kajap bruk lac oh menyum alak mbie, hu harak brei peih wah gaiy gilai hu bac megru ilamo. Tuai damuai brei cuk ao phao tuk daok angaok gilai.”

Brei mboh pathau khan lac jalan langyah pacang caga meng aval, meng atah, min, biak khin hu bruk ta-eng ngak di yaok rahra saong tuai damuai; tani tanat ngak tui adat ka salamat jalan angaok ia. Tok lac tuk sa jabat pasang iek, gah ngak mbang pablei salih pajeng ba saong urang hu mbaok tame jalan ia gam haong gauk ngak njauk adat ye meng daong patakik gaok bala chak dalam bilan hajan ribuk./.