Ong Nguyễn Văn Vững, xa Ba Sao, tinh Dong Thap brei thau, bhum ngak tabiak kaya di bhum palei labik di ong rilo meng lac taneh njom lakhun nan bruk pa;ih ruah pajaih padai brei ka njauk haong kein lagaih taneh riya. Tapa rilo mbang pala, ong taong yaom hu dom pajaih padai kayua Jabat Padai Bhum taneran kraong Cuu Long palih ruah yau ye OM17, OM18, OM19 saong OM54 jeng hu rilo bruk brei caik dahlau.

“Dahlak hulin mboh pajaih OM18 mek hu jak jeng abih saong ngak tabiak rilo mbang pala. Dalam nan naih gheih abih ka bruk pala hu, lac mbuan pala, biak lagaih. Patui bilan pala, meyah langik  lagaih ye labaih 97 harei lac yuak padai.” 

Urak ini, Jabat padai Bhum taneran kraong Cuu Long daok salih khang tui jalan pandar ilamo kong nghe sinh hoc, kong nghe taka so saong pandar siam lagaih halau gen piah ngak tabiak dom pajaih padai siam glaong, randap lagaih haong bruk langik salih karei saong pabak hatai caong di darak pasar. Tal ini, hu 51 gah ngak mbang pablei salih hu mbaok tame pandar saong pablei salih dom pajaih padai di Jabat roh duah insitut.

Tui ong Lê Thanh Tùng, Phaok akaok gam Taong Thu ky Kapul pambuak gah padai brah Viet Nam, yaom lac asar siam brah Viet Nam dak harei dak hu paglaong tagok min yaom kaom tagok di asar brah saong jien mek tame di urang ngak nong oh ka hu samu. Kayua di nan, Danak dak patagok karo kajap 1 trieu hecta ka asar padai siam glaong, tathuak nerak biar pagam haong cakrok hacih hijao hu caong takre brei salih drei khang ka gah kaya ndap nda padai brah dalam tukvak anak tal.

“Kapul pambuak biak khin ngak talei pambuak di HTX, urang ngak nong, gah ngak mbang pablei salih, dom jabat roh duah saong jabat hu ilamo piah gam haong gauk ngak jak jeng jalan ngak di Danak dak 1 trieu hecta. Tapa di nan jhul tagok bruk ngak mbang hacih hijao, takik tathuak nerak, peih praong bhum pandap tamo saong padang majam pambuak ka asar brah tathuak nerak biar di Bhum taneran kraong Cuu Long.”

Dalam tuk gah padai brah daok salih meng jalan ngak patagok bruk ngak hu, bruk palih ruah pajaih oh lac pamaong tal bruk ngak hu atau asar siam ka brah, blaoh daok brei pabak hatai caong di gah ngak nong hacih hijao, lagaih haong bruk langik salih karei saong takik tathuak nerak sang kreih camin.

TS Trần Ngọc Thạch, AKaok jabat Padai bhum taneran kraong Cuu Long langyah, majam padai pajaih di Viet Nam urak ini mek hu rilo jak jeng ka asar siam brah yau tanut laman, mbau pahe bangi saong yaom kaom dinh duong. Min, caong khin di darak pasar dalam harei hadei brei hu glaong jang, caong khin hu pajaih padai oh lac hu asar siam rilo blaoh daok brei hu lagaih haong dom jalan pala patakik palai ia, takik tathuak nerak saong lagaih haong langik kan kandah.

Jalan akaok mbram ngak ini jeng njauk lagaih haong Sarak Nghi quyet ka 57 di Mentri Chinh tri, dalam nan ndom khang ka bruk mek ilamo khoa hoc, kong nghe, salih hadah bahrau saong salih taka so ngak prein patagok. Ngan haong gah padai brah, bruk nan oh lac roh duah tabiak dom pajaih padai hu siam glaong blaoh daok jhul khang dom ilamo khoa hoc tame bruk ngak mbang.

“Piah roh duah, ngak tabiak kaya ndap nda, urak ini khol dahlak hulin jeng pasamu ka hatai caong di darak pasar urak ini, ngan haong brah pahe bangi khol dahlak hulin hu hagait, brah patih asar atah hu hagait v.v.. Pagam saong dom halau prein ye khol dahlak hulin brei pataom tame dom banah bruk praong yau brah patih asar atah hu yaom biar, yaom pablei tabiak langiu negar glaong. Daok dom brah karei ye hu dom banah piah ka brah langiu karja, dom gah ngak mbang pablei salih hu mbaok tame yau ye brah pahe bangi.”

Di Bhum taneran kraong Cuu Long, meng dom mblang hamu padai lagaih haong pandiak bhang, njom ia mbak tal jalan padang bhum pala 1 trieu hecta padai siam glaong, tathuak nerak biar di thun 2030, pajaih padai patui veik khik bruk “hu makna” dalam luac jalan pasiam gah padai brah./.