Jaik 1 bilan blaoh tapa, di Bein bangu Lê Thị Riêng, tuk menuac urang daok jal val nao mai, ye di dalam talei paga, hu dom urang bon lin daok kham merat roh duah dom tal taneh piah duah ayut cuai. Di ini, bruk ngak samar chip tuk halei jeng nao tui tani tanat. Kayua, di ala yaok tal taneh nan meda lac sa urang ndih gilac jaik 60 thun.

Trung si Vũ Đức Tâm, Kapul bon lin K74, dalau hu ngak daong bruk min jeng hu halan tian hu mbaok tame danak dak roh duah atau talang bol lin di Bein bangu Lê Thị Riêng. Mbang akaok meti hu mbaok tame danak dak roh duah dom sa-ai, dom cei dom va, Trung si Tâm hadar tani tanat bruk atau talang akaok meti mblo tabiak hadei yaok tal taneh:

"Dahlak hulin mboh biak bhian dalam hatian, kayua ini lac mbang akaok meti ngak bruk ini. Tuk duah mboh atau talang akaok meti, dahlak hulin biak drut druai saong mboh thun dalam rup. Abih di nyu nan lac, dom kaya yau blah tăng, ao pacang hóa, talei siu đạn, kadung radaih…biak bhian randap haong bol lin nan ngak ka akau dahlak hulin mboh drut druai jang. Dahlak hu lin biak bui sambai kayua bruk hu ngak yau akaok meti, jeng yau hu rik daong dalam Danak dak 500 harei malam ini".

Bein bangu Lê Thị Riêng dahlau diah lac Tanah kubo Đo Thành, atau daok ieu lac kobo Chí Hòa – Chợ Quán. Labik ini lam dar rilo bol lin saong rahra halan tian klak rup drei dalam mbang Taong praong Tong tien cong di thun nethak Kra Mau Than 1986. Jaik 60 thun tapa, inem mek sajarah hu ndih dalam ala takai phun, danao ia saong ha tang di sa ban medin bahrau. Bruk njauk ndom tal lac mbang pataom harei ini oh mai meng harak labik kubo atau harak labik bol lin bo nyu mai meng sa blah thaik binguk sambo patih – juk jaik yau oh hu angan di angaok Internet, cuak thaiksa uranaih dang taphia sa talei labang atah, di ala lac rilo atau rup daok cang lam dar. Mboh blah thaik nan di puac thun 2018, kien truc su Nguyễn Xuân Thắng, urang dalam Kapul Daong baoh sang bol lin Viet Nam oh meda klak tapa:

Tuk mboh thaik binguk akaok meti, hu cuak thaik jaik taphia. Khol dahlak hulin oh hu khau tin pagam tui nyu, oh thau hu di Viet Nam ha oh, jeng oh thau pambuak tal mbang mesuh atau mbang pamatai di halei. Min thaik thaot, bruk angui cuk khan ao di uranaih biak dreih yau uranaih Viet Nam dahlau tuk peih paha taneh ia nan dahlak hadar gilac saong maong iek biak tani tanat. Daok thaik thaot dom atau rup daok cang lam dar, jeng oh cambaih lac kapul bol lin atau rahra.

Rilo thun tapa, hadei thaik binguk ka dua hu duah mboh. Dalam thaik mboh sa urang likei pan kalaoh jru rao hacih mbaih laka dang taphia talei labang lam dan rilo urang. Gah likuk lac labik daok rahra saong bimong sang padang ia. Ini lac inem hu makna piah roh duah ka labik kabo.

Min bruk lagaih jang di nyu mai meng hu duah mboh thaik binguk hu sambo di hang thong tan AP brei cuak thaik di harei 12/2/1968, cuak gilac bruk lam dar di “talei labang ka klau di Sai Gon”. Klau thaik binguk rah tabiak di klau tukvak karei gauk. Piah pambuak dom banah klaih klaoh ini jeng sa toa ndo ka njauk, ong Thắng saong kapul urang roh duah lahik jaik 4 thun.

Meng klau blah thaik binguk meng jaman mesuk metak jaik yau oh hu angan, meng tal harak labik klak, pauac khan di urang menuac tal ilamo ngak kong ramik dak baoh kadha, roh duah tame ngak saong radar pasang tame taneh… Taong abih hu pasang dut iek saong ngak tantu piah pataom tame yaok labik roh duah, pataom atau talang bol lin di Bein bangu Lê Thị Riêng.

"Biak nao hu rilo urang daok pan rilo khau tin, abih di nyu nan lac dom rahra hu diuk rai di labik rah tabiak mbang mesuh atau labik hu dom labang lam dar dahlau diah; blaoh dom urang gah diah, meda lac bol lin Amirik dahlau hu mbaok dalam mbang mesuh metak di Viet Nam, bol lin Viet Nam Cong Hoa meng kal. Urak ini ngak habar ka dom urang nan pabak khau tin, nan lac anek kiar akaok meti piah ka drei meda thai tantu labih roh duah dom bol lin.”

Meng 3 thaik binguk oh hu angan tal labaih 100 atau talang hu ba tagok taneh lac jalan ngak hu ilamo, bruk karo kajap saong hatai thau dhar phol biak praong. Gah anak jeng daok jalan atah piah dut iek AND, dut pagap harak gal saong bayar gilac agaan ka dom sa-ai. Min harei ini, yaom lac oh ka thau hu angan je, dom sa-ai hu gilac mai haong ayut cuai, hu padeih padei di labik hu angan je njauk lagaih./.