Dom harei ini, sang bhap bini mbon palei Puăn, xa Ea Phê, tinh Đắk Lắk chreih chrai sap Kong caing saong ragam tamia. Langiu di bruk sangka bein phun dahlau bilan yuak kuak, dom urang nghe nhan saong kapul adaoh tamia di mbon palei srap gap pasram dom kadha caing, ragam tamia piah hu mbaok tame dom danak dak ba drei tame raya Durian tinh Dak Lak mbang ka sa akaok meti.

Ong Y Cư Ayun, rahra urang di mbon palei Puăn brei thau, bahrau ini, xa peih tal pato kong caing, brei kein lagaih dom urang nghe nhan pasram, pasiam ilamo ky thuat, srap gap dom kahda gheih karei duh ka raya.

“Meda lac durian jaik tal ye gah kapul kong caing mbon palei Puăn drei kham merat abih prein hu mbaok tame paoh caing saong tamia ka siam jang. Drei caong khin harei raya brei ka durian piah ka mikva drei patagok bruk ngak mbang blei salih kinh te, pala durian, caong khin durian hu yao jang ka tani tanat raidiuk di rahra bhap bini”.

Ieu lac bhum pasak hu labaih 850 ha taneh pala durian, xa Ea Phê maong Harei Raya brei ka Durian oh lac bingun yaih khan kaya ngak nong blaoh daok lac kein lagaih yaih khan ilamo di 23 bangsa daok diuk rai dalam bhum. Tui amuk Nguyễn Thị Kim Oanh, Akaok UB Bhap bini xa Ea Phê, bruk naih gheih di bhum palei di harei raya durian lac dom danak dak yaih khan ilamo Bru - Vân Kiều, pagam haong bruk patagok jirah rivang bhap bini.

“Ba drei tame Harei Raya brei ka durian mbang ka sa thun 2026 di tinh Dak Lak, xa Ea Phê jeng hu padang jalan ngak dom danak dak kaya mbang, parang kaya OCOP saong parang iek dom bruk di urang bangsa Bru - Vân Kiều. Bruk naih gheih di xa ieu lac brei peih ngak jalan saong pamaong tal dalam harei hadei ye brei paglaong jirah rivang bhap bini ngan haong urang bangsa Bru-Vân Kiều”.

Di xa Krông Pắc, labik rah tabiak dom mbang brei payaom baoh durian dalam raya, bruk srap gap jeng hu jhul khang. Langiu danak dak payaom di tinh, bhum palei daok peih veik 5 danak dak ba drei tame meng bilan 8 tal akaok bilan 9. Ong Lại Đức Đại, Akaok UB Bhap bini xa Krông Pắc brei thau, bruk payaom hu caong khin padang talei brei pambuak di sang bein, gah ngak mbang pablei salih pataom blei saong pablei tabiak, gam haong nan daong padang angan je durian Dak Lak tui majam yaom kaom.

“Xa khol dahlak caong khin biak rilo tame danak dak pablei payaom kaya durian, ini lac sa kein lagaih peih tabiak bruk ngak gah kaya ini tui majam ngak tabiak jeng yau lac kein lagaih piah yaih khan angan je durian Krông Pắc saong durian tinh Dak Lak.”

Dak Lak urak ini hu jaik 45.000 ha taneh pala durian, meblah labaih 1/5 taneh dalam negar; thun 2025, bruk pablei tabiak langiu negar mek hu labaih 1,1 ty USD, ba durian jeng sa di dalam dom janih kaya ngak nong hu pala rilo di Dak Lak. Kayua yau nan ye, Harei Raya Durian mbang ini oh lac pok meyaom janih baoh kayau ini, blaoh daok brei mboh hatai caong takre padang angan je kaya ngak nong pagam haong ilamo bhum taneh Tay Nguyen, patagok jirah rivang saong paglaong yaom kaom tagok di gah kaya ty dolla. Tuk dom ragu ragam kong caing sameng tagok di bilan durian tathak, nan jeng ieu lac tuk Dak Lak khan haong ayut cuai dalam negar saong dunya kadha ka sa bhum taneh thau ngak kein lagaih kaya ngak nong jeng bruk daong prein patagok kinh te – xa hoi./.