Tuk ia harei tame cek malam trun, Kubo Hàng Dương jeng daok hadah manyek tapang jen saong athak galau hor. Yaok ribau urang dan dan nao tapa yaok talei kubo, ba hatai pahadar dom Anh hung liet si var drei klak rup ka taneh ia nagar. Di majam sang guk Con Dao, tuai damuai jirah meng grauk labik jeng pataom mai di ini piah duah thau dom sajarah praong glaong di taneh ia.

Brei thau ka hatai drut druai, sa-ai kamei Đặng Phương Hải, tuai damuai mai meng phuong Ngọc Hà, Ban Ha Noi brei thau, Sang guk Con Dao ieu lac sa labik gait sahaneng tal dahlau di abih tuk yam takai mai pulao Konlon ini, kayua ini lac inem mek sajarak blaoh lac urang Viet Nam halei jeng khin hu mai rivang:

"Dahlak lac sa urang Viet Nam thei thei jeng khin hu sa mbang pambuak takai mai tal Con Dao. Tui hatai dahlak biak mboh drut druai tuk uak takai mai tal majam sang guk Con Dao”.

 Gam tui hatai drut druai yau nan, amuk Trịnh Thị Thu Hà, tuai damuai mai meng Ha Noi brei thau lac, bruk ginreih sanak jak di Con Dao oh lac daok dalam dom angan tantu cambaih laih, blaoh nyu daok ndung bak dalam hatung hatai thau tal dhar phol brei ka labaih 20.000 urang bol lin daok ndih di bhum taneh ini.

"Tuk mai tal sang guk Con Dao, khol dahlak hulin mboh hu bruk kateik geik, dom pandik pandua ka rup pabhap oh ngak ka hatai di dom bol lin patrun. Bol lin katmang tuk halei jeng khang hatai, sa bruk ngak praong, sa bruk sahaneng ka taneh ia dalam hatai piah brei ka bruk bebas di bangsa negar”.

Tui kuhria roh duah di Mban Pasang iek inem mek pakat Negar Con Dao, meng akaok bilan 7 tal ini, hu labaih 72.500 mbang urang tuai damuai mai rivang Kubo Hàng Dương, Kubo Hàng Keo, muyim saong dom labik inem mek karei. Bruk tagok ralo tatuak ini ba tabiak caong khin glaong ka bruk neh rabha jalan mbak, pahacih sa-at, iek glang an ninh siam mekre jeng yau labik dhua ndih daok.

Piah duh lagaih ka bruk tuai damuai tagok rilo, UB Bhap bini di pulao Con Dao ngak salah blaoh bruk pagheih thaik thaot, majam truac hadah saong paglaong bruk taduon raok pajeng ba. Amuk Phạm Thị Tám, Phaok Akaok Muyim – Gilang tapuk di Con Dao brei thau, labik daok pambuak haong So Ilamo saong Pahat padhih Ban raya Ho Chi Minh rrabha bruk ka kapul daok iek harei malam 24/24 tuk di dom labik inem mek.

"Piah khik kajap bruk ngak siam brei ka hatai caong jirah rivang di tuai damuai urang mai Con Dao, khol dahlak hulin patui veik patagok tukvak ngak bruk ka urang langyah piah ngak habar ka biak siam bruk pato megru pathau khan ka bruk katmang. Gam haong nan, ngak jeng bruk gheih ghang siam mekre praong prang ngan haong Harei pahadar 27/7 di pulao Con Dao”.

Taphia bruk raok tuai damuai urang jirah, bhum palei Konlon jeng sangka iek praong tal bruk ngak dhar phol. Ong Nguyễn Văn Mạnh, Phaok Akaok UB Bhap bini kaoh pulao Com Dao brei thau, karja hu pasang iek tani tanat dom baoh sang liet si, urang daong bruk kat mang piah ngak ginup dom sarak daong di Karja.

"UB Bhap bini di pulao pambuak haong UBMT Negar Viet Nam pasang iek dom baoh sang sarak raidiuk kan kandah ka sang daok, peih bruk pandar pakajap sang danaok ka baoh sang urang liet si, baoh sang daok di danak dak sarak karja. Jeng ye anek bik adei sa-ai urang thuong binh, liet si, bhum palei jak ba dom gah ngak dhar phol pahla hu dom paok kaya alin hidiah yau ye: kadung bai, tapuk, kaya bac megru… alin hidiah ka dom kamuan piah tame thun bac bahrau”.

Con Dao tuk ieu lac sa baoh bhum taneh merah bhong meraih ginreih di taneh ia nagar. Labik ini oh lac sa labik daok khik inem krung ka sa jaman mesuh matak saong kol khamang blaoh daok yau ye baoh tapuk praong cih vak dom kadha dalam jaman sron mbon salamat saong patagok di taneh ia nagar. Menuac urang mai tal pulao Con Dao dalam bilan 7 oh lac sa jalan pahadar meng jaman dahlau, blaoh daok ieu lac yau baoh panuac kakei pahadar ka rai rah harei ini hapah brei ka bruk khik ramik saong padang taneh ia negar njauk haong bruk yau angan var klak rup drei di rai rah urang nao dahlau./.