Labik puac tapuk peih, gam haong dom akaok baoh tapuk hu angan makna, ngak ka rilo anek saih di sang bac Tieu hoc Thạnh An oh abih khin hu thau, chreih chrai. Puac yaok akhar huroh dalam tapuk bahrau hu parang angaok kla dalam sang bac, adei Nguyễn Tuyết Trăng, anek saih bac tal 5 sang bac Tieu hoc Thạnh An khan lac, labik di ini gaok mai daok chreih mekre jang dut haong gilang tapuk:

"Hu labik puac bac tapuk di ini lac dom ayut tuk daok di ini hu laneing lanoi. Tuk anek nao bac, yaok tuk tabiak me-in atau nao bac mai sang hu tukvak anek gilac mai di ini piah puac tapuk."

Ini lac danak dak gilang tapuk hijao puac tapul gam haong Xich lo, peih pakak dalam danak dak ngak halan tian bilan pandiak hacih hijao, njauk ndom tal lac hu bruk hu mbaok di dom anek saih Viet Nam di langiu negar.

Amuk Đinh Thị Liễu, Akaok Sang bac Tieu hoc Thạnh An brei thau, sang bac hu padang sa labik puac tapuk peih, jaik taphia haong langik tasik. Labik puac tapuk ngak jeng labik ba drei tame ka anek saih, blaoh daok daong paglaong ilamo pacang khik alam langik tapa bruk ngak jeng labik hacih hijao dalam sang bac saong patagok hu ilamo bac puac tapuk.

“Rilo thun ngak urang dang akaok di sang bac, dahlak hulin mboh dom adei bhian bac puac tapuk tuk nao tal sang bac saong gilang tapuk kayua di sang ye amaik ame di dom adei daok ngak mbang duah jien nan takik maong iek tal bruk bac magru puac tapuk di dom adei yau habar. Kayua yau nan sang bac khin peih praong labik ini, tuk dom adei nao me-in dat caoh balaong di mblang sang bac mboh dom ayut cuai daok puac tapuk, dom adei khin hu thau saong meda hu puac tapuk tui, meng nan ngak jeng bruk puac tapuk jeng yau patagok ilamo suai atah ka dom ayut cuai.” 

Tanut bahrau di danak dak Bilan pandiak hacih hijao thun 2026 di Ban raya Ho Chi Minh lac bruk hu mbaok di rilo anek saih sinh vien Viet Nam daok tui bac di dom negar yau ye Singapore, Thái Lan, Úc, Anh,…

Bahrau trun kapal ahaok meng nagar Úc mai tal Ban raya HCM oh ka bak 24 tuk, Phương Hồng Ngọc (daok di Vinh Long) hu nao tal xa pulao Thạnh An, gam haong kapul halan tian di anek saih bac di langiu negar. Ngọc tacei ba dom adei sit me-in kadha, adaoh saong gam haong gauk mbang dom var huak kayua dom urang halan tian srap gap caga.

M’Ngọc ndom meyai lac, tuk daok bac pakat tieu hoc di bhum palei, ayut cuai tuk halei jeng pachreih yaok bilan pandiak bhang kayua hu dom sa-ai halan tian peih ngak rilo daanak dak hu makna, kadha me-in hu makna. Kayua dom inem krung nan hu pachreih Ngọc tut angan hu mbaok tame Kapul anek saih Viet Nam bac di negar Uc pathau khan palih ruah urang halan tian. Njauk haong mbang padeih bilan la-an, Ngọc samar drah blei harak ve ahaok par mai palei negar hu mbaok tame danak dak mbang ini:

"Lac sa urang sit umo hu bac megru di labik dhua glaong siam makre, adei caong khin hadei di ini oh lac adei blaoh daok rilo ayut cuai karei meda ba dom ilamo drei bac hu ba mai Viet Nam, daong patagok palei negar saong buh abih hatai tian meng prein dam dara di khol adei.”

Oh lac sa janih hu mbaok tame labik bac puac tapuk, dom anek saih bac di langiu negar daok klah rabha ilamo bac megru, cih jalan ka anek saih bhum palei. Nguyễn Quang Anh, Phaok akaok majam Salih hadah krah Viet Nam – Uc, hu samar drah gilac mai Viet Nam piah srap gap ka dom danak dak di Bilan pandiak hacih hijao mbang ini di Ban raya HCM:

 "Ini lac mbang camreip adei hu mai dom xa daok rilo kan kandah di Ban raya Ho Chi Minh piah duah thau ka raidiuk di rahra jeng yau dom adei anek saih di ini. Tapa di nan, adei caong khin meda hu daong dom adei rilo jang saong daong dom adei hu kein lagaih patagok dalam harei hadei.”./.