Piah jeng urang hu raidiuk meda kaya yau harei ini, diuk pasang sa-ai Đường hu rah tapa dom harei dom bilan kathaot, rambah duah jien. Bruk njauk pok meyaom lac marat hatai patruh kathaot, hu njauk hatai saong kham pagam haong apuh pakak piah uak drei tagok tani tanat dalam raidiuk di bhum palei.

Meng dom sao taneh akaok meti di amaik ame, dua diuk pasang salih phun pala piah parilo jien mek tame. Meng pala padai, amraik talu, kophi, tal pala pa-aok blait, tangei,… mboh phun pala halei hu yaom lac dua sa-ai ba tame pala, gam pasiam taneh, parilo kaya pala hu, duah jien tame ka sang drei.

Langiu di bruk pala, dua sa-ai daok raong glang tapol pabui, limo, pabe,…Tuk hu labaih ye dua adiuk pasang sa-ai blei taneh piah peih praong bruk ngak mbang. Urak ini baoh sang dua adiuk pasang sa-ai hu 6 ha taneh pa-aok blait, 1 ha hamu padai ia, 2 ha taneh pala phun katut panak harei brei jien mek tame tani tanat jaik rituh trieu dong yaok thun.

Tuk mboh yaom kophi jaik ini tagok, baoh sang adiuk pasang sa-ai hu pala tablak phun kophi tame bein pa-aok blait saong pala amraik talu meyah mboh yaom hu lagaih. Sa-ai Võ Thị Nẫm brei thau:

"Meng dahlau pala amraik talu, kophi jeng hu jien mek tame, min tapi phun amraik talu oh hu karo kajap yaok phun kophi saong phun pa-aok blait, nan ye dua diuk pasang sa-ai salih tapa pala pa-aok blait abih. Saong urak ini daok brei paik baoh. Dua diuk pasang sa-ai jeng kuhria blaoh meng trun 1 ha kophi dalam bein pa-aok blait. Meyah lagaih ye hadei ini brei yah klak phun pa-aok blait salih tapa pala tablak phun amraik talu tame pablak saong phun kophi".

Piah brei hu siam lagaih brei ka bruk pala, diuk pasang di sa-ai hu mbaok tame dom tal bac magru pasram, pandar dom jalan ngak ilamo khoa hoc ki thuat gam haong duah thau saong paham tani tanat ka darak pasar pablei dom janih kaya nong urak ini piah hu jalan salih phun pala njauk lagaih, ba mai siam lagaih kinh te glaong. Sa-ai Võ Văn Đường brei thau:

"Urak ini tacei ba di urang jakar gah ngak nong ngak tui bruk pala pa-aok blait huu ke, takik pandar khak hoa hoc, rilo meng lac khak var ro lamo kabao, pong nerang,… mboh jeng siam lagaih. Taong abih lac, urak ini ngak tui ilamo khoa hoc gah pachreih ngak nong pato tacei drei ngak mboh jak jeng jang".

Piah paglaong bruk siam lagaih di bruk ngak mbang, diuk pasang di dua sa-ai oh tuk halei luai taneh thaoh, bruk apuh pakak jal val luac thun, abih yuak padai, pa-aok blait tal tangei, lange.

Oh lac brei ka sa janih ngak kinh te naih joi, baoh sang dua sa-ai daok tuk halei jeng ba drei nao dahlau dalam dom danak dak di dom palei, xa, yau ye: Hu mbaok tame padang palei pala bahrau, padang baoh sang ilamo, thau gul pataom, daong gauk, daong mikva piah gam haong gauk patagok. Ong Lâm Văn Nhu, Akaok palei 4, xa Trà Tân, tinh Lam Dong brei thau.

"Dalam palei 4 hu baoh sang ong Võ Văn Đường lac sang urang ngak nong ngak mbang naih joi, mbang akaok meti, baoh sang biak kan kathaot, min tal ini kinh te baoh sang hu patagok tani tanat, meng bruk pala pa-aok blait, lange, tangei, padai,… Anek di ong nan jeng hu sa urang nao ngak bol lin. Dua diuk pasang jeng biak kham merat ngak mbang, baoh sang hu 5-6 ha taneh pa-aok blait, kinh te biak tani tanat".

Baoh sang sa-ai Võ Văn Đường urang bangsa Chau Ro lac dom urang ngak nong tari taring di taneh palei di drei, nan oh lac hu sa janih truh kathaot blaoh daok jeng baoh sang tagok kaya meda, hu rilo mikva dalam palei meyaom, nyu yau ye sa baoh kreih camin piah bac megru saong ngak tui./..