Tuk 7 page, bilik bac di Balai Bien phong Vĩnh Hải mboh biak chreih chrai dom sap ndom klao di dom adei anek saih. Di labik bhian randap haong sap riyak dan saong angin, gam haong raidiuk ngak mbang duah jien di mikva bhum tapen tasik, dom baoh kompute harei ini hu jeng sa bah mbang peih tabiak raidiuk dunya bahrau brei ka dom adei sit. Dom urang di angaok tal pato lac dom bol lin cuk quân hàm hijao. Meng bruk peih, padam compute, pandar tikuh, paban kacaoh akhar tal bruk vak akhar huroh, khik piah du lieu atau pasang iek tệp tin, taong abih jeng tacei ba cambaih laih, mbuan thau, njauk lagaih haong ilamo di yaok adei. Adei Vũ Thị Ngọc Anh brei thau:

"Anek hu dom cei bol lin pato bruk peih compute, bruk kacaoh akhar, pandar tikuh, padam compute, pasiam akhar. Dom ilamo nan biak lagaih ka anek, daong anek bac megru siam jang."

Rilo di nyu dalam nan meng lac anek saih hu mbaok di tal bac daok bac pakat tieu hoc. Rilo adei daok biak takik dalam bruk pandar compute, gaok mai hu adei mbang akaok meti hu pandar compute. Kayua nan, bruk pato jeng hu dom urang jakar boll in bien phong srap gap pasiam. Dai uy Chung Văn Lương, akaok kapul ndom biai bruk karja Balai bien phong Vĩnh Hải, sa dalam dom urang jakar tapak pato dom adei, brei thau:

"Bruk pato ka dom adei pandar biak rilo bruk, ngan haong dom adei bo hu ilamo glaong ye dom adei meda tapak pandar tani tanat dom janih compute drei tok tacei ba dom ilamo, salamat khau tin di angaok mang. Daok ngan haong dom adei hu ilamo pandar compute daok oh ka tanat ye drei brei pan tangin tacei yaok jalan ka dom adei piah dom adei dak harei dak pandar siam tin hoc."

Oh lac sa janih pato ilamo pandar compute, tal bac daok srap gap caga ka dom adei ilamo ka internet saong labik taka so. Dom adei hu tacei ba bruk duah harak bac megru, duah khau tin, thau ka khau tin jhak kanhaj saong pacang khik du lieu ta-eng menuac urang tuk hu mbaok pandar mang xa hoi. Dalam bruk salih lek taka so daok rah tabiak khang catang, dom ilamo nan brei daong dom adei ngak jeng bruk randap pandar internet njauk bruk ngak, salamat saong jak jeng siam lagaih.

Meda ndom mayai lac, tal bac oh lac ba mai dom ilamo tin hoc mbuan mbiah blaoh daok brei ka dom adei hu kein lagaih bahrau. Yaok kadha bac ka bruk pandar compute atau bruk duah khau tin di angaok internet jeng daok daong dui katut panak bruk atah karei di bhum tapen tasik saong ban medin. Adei Thạch Võ Lam Tuyền brei thau:

“Thun ini adei daok hu tame mai di ini bac megru nan thau veik ka rilo bruk pandar compute jeng yau tame internet piah duah thau ka harak gal bac megru”.

Meng di dom kadha bac di tal bac, dom adei dak harei dak ngak jeng ilamo ta-eng bac, srap gap duah ilamo saong khang hatai jang dalam luac jalan bac megru di drei. Ini oh lac tal bac tin hoc, blaoh daok lac yau ye baoh tatua pambuak baa nek saih bhum kan kandah nao tal jaik jang luac hujung jalan salih lek taka so daok rah tabiak yaok harei dalam raidiuk. Daok ngan haong dom urang boll in quân hàm hijao di Balai Bien phong Vĩnh Hải, langiu bruk pacang khik taneh riya tasik kaoh pulao, khik ramik an ninh bhum tapen tasik, dom sa-ai daok gandi gandang pabam dom kein lagaih bahrau ka rairah sit thun umo. Dai uy Nguyễn Duy Khánh ndom mayai lac :

"Piah srap gap ka dom adei dom ilamo ka gah tin hoc saong ilamo lek taka so saong dom asal kadha mek khau tin angaok mang Internet saong mang xa hoi duh bruk bac megru ka dom adei jeng yau daong dui katut bruk atah gauk ka salih lek taka so di dom adei di ban medin saong palei pala"./.