Di dom harei ini, di sang baha Xung Thum, xa Lai Hòa, bruk bac megru rah tabiak mboh bui sambai chreih chrai. Hu labaih 300 adei anek saih di dom pakat bac pho thong di bhum palei hu mbaok tame dom tal bac megru akhar huroh Khmer meng tal 1 tal tal 3 kayua sang baha peih ngak.

Dalam tal bac, sap papaoh akhar huroh, sap puac kadha yava tagok ragam samu gauk. Rilo adei hu pambuak pagam haong tal bac bilan pandiak he rilo thun danak saong maong ini lac luac tukvak hu makna abih dalam mbang padeih padei, kayua oh tok lac bac akhar huroh, dom adei daok hu kein lagaih piah taom gaok ayut cuai sahabat, gam haong gauk hu mbaok tame dom danak dak siam gheih. Adei Thái Thị Si The mai bac akhar huroh Khmer di sang baha Xung Thum, brei thau:

"Tame yaok mbang padeih pandiak bhang he lac adei gilac mai bac akhar huroh Khmer kayua sang baha peih ngak, thun ini adei bac tal 3 akher huroh Khmer. Urak ini adei hu vak, puac siam, langiu di nan adei hu bac ka ngu phap nahu nan biak siam ka dom adei.”

 Tui dom adei bahrau tame ngak krein randap haong akhar huroh Khmer, dom acar saong gru pato tuk halei jeng kham merat pato tacei yaok thaik thaot akhar, yaok bruk puac akhar, daong dom adei thau biak mbuan mbiah. Acar Tăng Trãi, Phaok Akaok sang baha Xung Thum, ndom meyai lac:

"Akaok meti ye khol dahlak hulin pato dom ane anek akhar, baoh huruh akhar, vak akhar, bac rah rah, yaok harei tok bac 5 akhar min piah ka dom adei bahrau tame bac. Hadei nan tuk dom adei ndaom blaoh ye brei pagam akhar, papaoh akhar saong tame kadha bac. Ini lac jalan piah pato dom adei siam lagaih di abih”

Meng dom kadha bac sanang mbuan nan, dom adei rah rah ngak jeng bruk bac, vak saong thau sap bahsa bangsa di drei. Ini jeng lac bruk hu makna piah dom adei bac thau dom ilamo siam gheih bangsa Khmer dalam harei hadei.

Piah brei kein lagaih ka anek saih, langiu di dom tal bac di sang baha, Acar, Mbang pasang iek sang baha Xung Thum daok pambuak nyim dom labik sang bac pho thong dalam bhum piah peih bruk pato. Meng nan, dom adei hu bac jaik sang, nao mai mbuan mbiah jang, rilo meng lac dalam bilan hajan ini.

Oh lac sa janih di labik pato ilamo, dom tal bac bilan bhang pandiak he di sang baha daok lac labik bac megru ilamo adat cambat daok dang, daong dom adei plaih atah dom bruk kanjah jhak dalam rahra, pandar tukvak padeih padei he biak siam saong hu makna angan siam.

Tui dom acar dalam sang baha, bruk khik ramik sap ndom, akhar huruh bangsa ieu lac bruk di taong abih bhap bini. Kayua yau nan, tal bac akhar huroh Khmer daok hu khik tani tanat sumu yaok thun ngan haong bruk samu gauk saong daong prein di amaik ame, urang tui agama bhat jeng yau karja palei. Po Gru Kim Thương, Akaok sang baha Xung Thum, xa Lai Hòa, brei thau:

"Mada ieu sa bruk ngak njauk kayua lac dom adei hu tamat blaoh thun bac pho thong blaoh ye 2 bilan padeih bhang pandiak lac tukvak brei ka dom adei mai tal sang baha piah bac akhar huroh Khmer, saong ngan haong sang baha Xung Thum yaok thun, ini lac caong khin di urang tui agama, dom adei anek saih saong po acar dalam sang baha piah gam khik ramik akhar huroh Khmer.”

Meng dom tal bac gheih mekre dalam mblang sang baha, akhar Khmer daok hu pato meng rai ini tapa rai diah. Oh lac sa janih hu daong khik ramik sap ndom di bangsa, dom tal bac bilan pandiak he daok lac labik raong pabam urnam ilamo bhap bini siam gheih di bangsa Khmer, meng nan, patui veik hu khik ramik saong pambak tabiak karo kajap dalam raidiuk harei ini saong harei hadei./.