Kayua vaktu harei jal val brei ka bruk ngak duah jien saong bruk di sang yau nan jaik abih dom var pasram hu peih ngak di malam. Yaom lac mai meng rilo palei Cam karei di gauk min dom urang thei thei jeng mboh hadah mbaok meta, thau ka bruk di drei saong kham merat ba mai dom kadha adaoh tamia biak gheih ghang di abih ka harei raya. Sa-ai Châu Thị Thúy Hằng, palei Cuah Patih, xa Ninh Phuoc, tinh Khanh Hoa.

"Dom adei sa-ai kamei mai meng rilo palei karei gauk..."

Oh lac dom urang kamei tamia, dom urang likei jeng caik rilo masa tukvak, hatai kham merat ka yaok kadha tamia. Dalam nan, dom kadha hlai ragam bhap bini bangsa Cam hu dom urang ma-in sit thun buh prein tame hadah krah paneh, pambuak di ragam bhap bini saong suan yava di ragam bahrau. Sa-ai Thuận Ngọc Vũ Linh, palei Bal Riya, xa Ninh Hai ndom meyai lac:

"Taong abih adei sa-ai mai di ini pasram..."

Daok tui sa-ai Phú Văn Thiện, palei Pabhan, xa Thuan Nam, yaom lac biak jal val haong bruk di baoh sang, min sa-ai hu pataom tukvak piah hu mbaok tame pasram, kayua sa-ai hu ramik tukvak piah hu mbaok pasram, kayua sa-ai caong khin harei raya ilamo bangsa meng suai paje.

“Hu mbaok tame pasram khol dahlak mbih kadha pasram biak gheih..."

Tui tukvak labaih 20 minit, danak dak seni nghe thuat di kapul Khanh Hoa hu padang tani tanat, dalam nan hu dom asal kadha danak dak adaoh tamia, yaih khan ka banah raya adat, adat cambat ilamo bhap bini di bangsa Cam; me-in hlai ragam bhap bini bangsa, adaoh kadha bhap bini, tamia adat ndung bak ilamo bangsa. Langiu di nan, rilo urang daok hu mbaok tame sa mbang rilo kadha karei gauk, meng adaoh tal tamia saong parang iek adat cambat di bhap bini bangsa. Sa-ai Lộ Thị Minh Thùy, palei Baoh Hadeng, xa Ninh Phuoc brei thau:

"Dahlak mboh biak bui tuk hu mbaok Harei raya Ilamo bangsa Cam..."

Daok sa-ai Quảng Thị Thanh Thoảng, palei Padra, xa Phuoc Huu chreih chrai brei thau ini lac danak dak ilamo praong, piah pok meyaom saong pambak tabiak dom yaom kaom drap ar banrik di bangsa Cam nan khol dahlak biak chreih chrai uan tabuan:

"Srap gap ka harei ilamo bangsa Cam 2026..."

Harei raya Ilamo bangsa Cam mbang ka VI ieu lac tukvak piah patagok bruk gul pataom, pambuak gauk, bac tangi saong khan ka gauk dom ilamo dalam bruk khik ramik, patagok dom yaom kaom ilamo bhap bini di rahra urang bangsa Cam. Gam tui di nan, ini jeng lac kein lagaih piah yaih khan thaik thaot bhum palei, anek menuac saong dom ilamo biak gheih karei di bangsa Cam nao tal rilo bhap bini rahra dalam saong langiu negar.